ދިވެހިރާއްޖޭގެ އިންޖިނޭރުންގެ ދުވަސް ކުލަގަދަކޮށް ފާހަކުރުމަށް މުޅިރާއްޖޭގެ ތަޢުލީމީ އެކިއެކި އިދާރާތަކަށް ޚާއްސަކޮށްގެން އިންޖނޭރިންގ ދާއިރާގެ ކެރިއަރ ގައިޑެންސް ޕްރޮގްރާމްތަކާއި ސައިޓް ވިޒިޓްތަކެއް ކުރިއަށް ގެންގޮސްފި އެވެ.

ރާއްޖޭގެ އިންޖިނޭރުންގެ ދުވަހާ ގުޅިގެން މިނިސްޓްރީ އޮފް ކޮންޓްރަކްޝަން، ހައުސިންގ އެންޑް އިންފްރާސްޓްރަކްޗަރ އިން އިސް ނަގައިގެން މިނިސްޓްރީއޮފް އެޑިއުކޭޝަނާއި ދައުލަތުގެ އެސްއޯއީތައް ގުޅިގެން ހުރިހާ އަތޮޅުތަކާއި ސިޓީތަކުގެ ޔުނިވަރސިޓީ، ކޮލެޖްތަކުގެ ދަރިވަރުންނަށް ބޭއްވި މި ވިޒިޓްތަކަކީ ދާއިރާއާ ގުޅޭގޮތުން މައުލޫމާތު ދިނުމަށް ބޭއްވި ސެޝަންތަކެކެވެ.

އެގޮތުން ރާއްޖޭގެ އެކި ކަންކޮޅުތަކުގައި ތަރައްޤީގެ މަޝްރޫޢުތައް ހިންގާ ސައިޓްތަކަށް ދަރިވަރުން ގެންގޮސް މަޢުލޫމާތު ދީފައިވެ އެވެ. މި ޕްރޮގްރާމުގެ ތެރެއިން މިހާތަނަށް ތަޢުލީމީ 28 އިދާރާތަކަށް ޕްރޮގްރާމްތައް ވަނީ ހިންގާފައެވެ. އަދި އިތުރު ޕްރޮގްރާމްތަކެއް ސެޕްޓެންބަރު މަހުގެ ނިޔަލަށް ކުރިއަށް ގެންދިޔުމަށް ހަމަޖެހިފައިވާ ކަމަށް ކޮންޓްރަކްޝަން، ހައުސިންގ އެންޑް އިންފްރާސްޓްރަކްޗަރ އިން ވަނީ ބުނެފަ އެވެ.

އެސްއޯއީތަކުގެ ފަރާތުން މިހާތަނަށް ކުރިއަށް ގެންގޮސްފައިވާ ޕްރޮގްރާމްތަކަށް ބަލާއިރު އެމް.ޓީ.ސީ.ސީގެ ފަރާތުން ބޮޑުތަކުރުފާނު މަގު ޑިވެލޮޕްމަންޓް ޕްރޮޖެޓް ސަރަޙައްދުގައި ކުރިއަށްގެންދިޔަ ސައިޓް ވިޒިޓްގައި ޣިޔާޘުއްދީން އިންޓަރނޭޝަނަލް ސްކޫލާއި ކަލާފާނު ސްކޫލްގެ ދަރިވަރުން ވަނީ ބައިވެރިވެފަ އެވެ.

އެމްއޭސީއެލް ގެ ފަރާތުން ވިލާ އިންޓަރނޭޝަނަލް ހައި ސްކޫލްގެ ދަރިވަރުން ވެލާނާ އިންޓަރނޭޝަނަލް އެއާޕޯޓްގެ ސައިޓް ވިޒިޓަށް ގެންގޮސްފައިވާއިރު އެފް.ޑީ.ސީގެ ފަރާތުން ޣާޒީ ސްކޫލްގެ ދަރިވަރުން އަމާން އުދެރެސް ޓަވަރުތަކަށް ގެންގޮސް ސައިޓް ދައްކާލާ މައުލޫމާތު ދީފައިވެ އެވެ.

ފެނަކަ ފަރާތުން މިހާތަނަށް މުޅިއެކު 23 ސްކޫލެއްގައި ވަނީ ކެރިއަރ ގައިޑެންސް ޕްރޮގްރާމްތައް ހިންގާފައެވެ. އަދި ސްޓެލްކޯގެ ފަރާތުން ކެރިއަރ ގައިޑެންސް ޕްރޮގްރާމް އަދި ޕަވަރ ހައުސްތަކަށް ކުރިއަށް ގެންދިޔަ ސައިޓް ވިޒިޓްތައް ވެސް ފާހަގަކޮށްލެވެ އެވެ.

މީގެ އިތުރުން މޯލްޑިވްސް ނޭޝަނަލް ޔުނިވަރސިޓީގެ ސިވިލި އިންޖިނިއަރިން، އިލެކްޓްރިކަލް އެންޑް އިލެކްޓްރޯނިކް އިންޖިނިއަރިންގގެ ދަރިވަރުންނަށް މާލެ-ތިލަފުށި ލިންކް ސައިޓް ދައްކާލާފައިވެ އެވެ. ކޮންސްޓްރަކްޝަން މިނިސްޓްރީން ކުރިއަށްގެންދިޔަ މި ވިޒިޓްގައި ޤައުމީ ޔުނިވަރސިޓީގެ ގިނަ ދަރިވަރުންތަކެއް ބައިވެރިވެފައިވެއެވެ. 

މި ޕްރޮގްރާމަކީ މި ދުވަހާ ގުޅިގެން ގައުމީ ފެންވަރުގައި ކުރިއަށް ގެންދެވުނު ކާމިޔާބު ޕްރޮގްރާމެއް ކަމަށް އެ މިނިސްޓްރީން ބުންޏެވެ.

މި އަހަރުން ފެށިގެން، ކޮންމެ އަހަރެއްގެ އޮގަސްޓު މަހުގެ 30ވަނަ ދުވަހަކީ، ޤައުމީ ފެންވަރުގައި ފާހަގަކުރާ، "ދިވެހިރާއްޖޭގެ އިންޖިނޭރުންގެ ދުވަސް" ކަމުގައި ރައީސުލްޖުމްހޫރިއްޔާ ހަމަޖެއްސެވީ، މި ޤައުމުގެ ތާރީޚުގައި މިހާތަނަށް ހިންގުނު އެންމެ ބިޔަ އުމްރާނީ ތަރައްޤީގެ މަޝްރޫޢު ކަމުގައިވާ، ސިނަމާލެ ބުރިޖު އިފުތިތާހުކުރެވުނު ދުވަހަކީ، އޮގަސްޓު މަހެއްގެ 30ވަނަ ދުވަސް ކަމަށްވާތީ، އިންޖިނޭރުންގެ ދުވަހުގެ ގޮތުގައި ފާހަގަކުރުމަށް އެންމެ އެކަށީގެންވާ ދުވަހަކީ، އެ ދުވަސް ކަމަށްވާތީ އެވެ.

އިންޖިނޭރުން ޤައުމަށް ކޮށްދެއްވާ ޚިދުމަތްތަކުގެ އަގު ވަޒަންކުރެއްވުމުގެ ގޮތުން، 2026 ވަނަ އަހަރުން ފެށިގެން އިންޖިނޭރުންގެ ޤައުމީ އެވޯޑް، ސަރުކާރުން ދެއްވަން ފައްޓަވާނެކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިހާާރު ވަނީ އިޢުލާނު ކުރައްވާފަ އެވެ.