ފާއިތުވި 2024 ވަނަ އަހަރާ އަޅާބަލާއިރު މިއަހަރުގެ މިހާތަނަށް ރާއްޖެ ޒިޔާރަތްކުރި ފަތުރުވެރިންގެ އަދަދު 9.4 އިންސައްތަ އިތުރުވެއްޖެ އެވެ. 

ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާ ގޮތުން މިއަހަރުގެ އޮގަސްޓު 30 ވަނަ ދުވަހުގެ ނިޔަލަށް 1,482,668 (އެއް މިލިއަން ހަތަރު ލައްކަ އަށްޑިހަ ދެހާސް ހަ ސަތޭކަ ފަސްދޮޅަސް އަށެއް) ފަތުރުވެރިން ރާއްޖެ ޒިޔާރަތްކޮށްފައިވެއެވެ.

ފާއިތުވި 2024 ވަނަ އަހަރުގެ މި މުއްދަތުގައި ރާއްޖެ ޒިޔާރަތްކުރީ 1,355,395 ( އެއް މިލިއަން ތިން ލައްކަ ފަންސާސް ފަސް ހާސް ތިން ސަތޭކަ ނުވަދިހަ ފަހެއް) މީހުންނެވެެ. 

މިއާއެކު މިދިޔަ އަހަރާ އަޅާބަލާއިރު މިއަހަރު ރާއްޖެ ޒިޔާރަތްކުރި ފަތުރުވެރިންގެ އަދަދު ވަނީ 9.4 އިންސައްތައިން އިތުރުވެފައެވެ. މިއަހަރުގެ މިހާތަނަށް އެވްރެޖްކޮށް ރާއްޖެ ޒިޔާރަތްކޮށްފައިވަނީ 6,127 ފަތުރުވެެރިންނެވެ. 

މި އަހަރު އެންމެ ގިނަ ފަތުރުވެރިން އައިސްފައިވަނީ ޗައިނާ އިންނެވެ. ޗައިނާއިން 234,440 ފަތުރުވެރިން އައިސްފައިވާއިރު އެއީ ރާއްޖެ ޒިޔާރަތްކުރި ޖުމްލަ ފަތުރުވެރިންގެ 15.8 އިންސައްތައެވެ. ދެވަނަ އަށް އެންމެ ގިނައިން ރާއްޖެ ޒިޔާރަތްކުރި ރަޝިޔާއިން 176,972 މީހުން އައިސްފައިވާއިރު އެގައުމުން އައި ފަތުރުވެރިންގެ މާކެޓް ޝެއާ އަކީ 11.9 އިންްސައްތައެވެ. 

އިނގިރޭސިވިލާތުން 133,733 ފަތުރުވެރިން އައި އިރު އިޓަލީން 105,990 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. 

މިއަހަރު އެންމެ ގިނައިން ފަތުރުވެރިން ރާއްޖެ އައިސްފައިވަނީ ޖެނުއަރީ މަހުގައެވެ. ޖެނުއަރީ މަހު ރާއްޖެ ޒިޔާރަތްކުރީ 214,863 ފަތުރުވެރިންނެވެ. 

ވެލާނާ އިންޓަނޭޝަނަލް އެއާޕޯޓުގެ އައު ފަސިންޖާ ޓާމިނަލް ހުޅުވައި އެ ޓާމިނަލުން ހިދުމަތް ފަށާފައިވާއިރު، އެކަމުގެ ހެޔޮ އަސަރު އަންނަ އަހަރު ރާއްޖޭގެ ޓޫރިޒަމަށް ކުރާނެ ކަމުގައި އެމްއެމްއޭއިން އަންދާޒާކުރެއެވެ. އެގޮތުން އަންނަ އަހަރު ޖުމްލަ 2.4 މިލިއަން ފަތުރުވެރިން ރާއްޖެއަށް ޒިޔާރަތްކުރާނެ ކަމުގައި އެމްއެމްއޭއިން އަންދާޒާކުރެއެވެ. 

މި އަހަރުގެ ފަހު ކުއާޓާގައި ފަތުރުވެރިން އަންނަ މިންވަރު އިތުރުވާނެ ކަމުގައި މަރުކަޒީ ބޭންކުން ލަފާކުރެއެވެ. އަދި ފަތުރުވެރިކަމާއި އެހެނިހެން ސިނާއަތްތަކަށް ލިބޭ ކުރިއެރުމާއެކު މި އަހަރު ރާއްޖޭގެ ގައުމީ އުފެއްދުންތެރިކަން 4.5 އިންސައްތައާއި 5.6 އިންސައްތައާ ދެމެދުގެ މިންވަރަކަށް ކުރިއަރާނެ ކަމުގައި އެމްއެމްއޭއިން އަންދާޒާކުރެއެވެ. 

ވީއައިއޭގެ އައު ޓާމިނަލު އިފުތިތާހުކޮށް ހިދުމަތް ދޭން ފެށުމާއެކު، ކުރިއަށް އޮތް ތަނުގައި ރާއްޖެއަށް އަންނަ ފަތުރުވެރިން އިތުރުވާނެ ކަމުގައި އެމްއެމްއޭއިން ލަފާކޮށްފައިވާއިރު، ޓާމިނަލުން ހިދުމަތް ދޭން ފެށުމާއެކު މިހާރު ރާއްޖެއަށް ދަތުރުކުރާ އެއާލައިނުތަކުގެ ދަތުރުތައް އިތުރުކޮށް، އައު އެއާލައިންތަކުން ރާއްޖެއަށް ދަތުރުތައް ފަށާނެ ކަމުގައި ބެލެވެއެވެ.