އައްސޭރި ޖަލުގައި ހުންނަ ކުޑަކުދިންގެ ކަރެކްޝަނަލް މަރުކަޒުތަކުގައި ޙުކުމް ތަންފީޛުކުރަމުންދާ ކުދިންނާއި ބަންދު ކޮށްފައިވާ ކުދިންނަށް އަމާޒު ކޮށްގެން 'އުނގެނެމާ' ނަމުގަ ޕްރޮގްރާމެއް ފަށައިފިއެވެ.

މޯލްޑިވްސް ކަރެކްޝަނަލް ސަރވިސް އިން ބުނީ މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ 25 އޮގަސްޓް 2025 އިން 20 ސެޕްޓެމްބަރ 2025އާ ހަމައަށް ކަމަށެވެ.  

ކަރެކްޝަނުން ބުނީ 'އުނގެނެމާ' ޕްރޮގްރާމްގައި ބައިވެރިވެފައިވަނީ ހަތަރު ކުޑަކުދިން ކަމަށެވެ. މި ޕްރޮގްރާމްގެ ދަށުން ބައިވެރިންނަށް ގާނޫނާއި ގަވާއިދާއި ނަފުސާނީ ދުޅަހެޔޮކަމާއި ޕަރސަނަލް ޑިވޮލޮޕްމަންޓް ކްލާސްތަކާއި ނަމާދާ ބެހޭ ވޯކްޝޮޕް އަދި ހަތަރު ދީނީ ދަރުސް ކުރިއަށް ގެންދިއުމަށް ހަމަޖެހިފައިވެއެވެ. 

މި ޕްރޮގުރާމުގެ މައިގަނޑު މަގްސަދުތަކަކީ ކަރެކްޝަންސްގެ ބެލުމުގެ ދަށުގައި ތިބި ކުދިންގެ ހިތްތަކުގައި އިސްލާމް ދީނަށް ލޯބި އުފެއްދުމާއި، އިސްލާމްދީނުގެ އަސާސީ މަޢުލޫމާތު ފޯރުކޮށްދީ، މި ދީނުގެ އުސޫލުތަކާ އެއްގޮތަށް އަމަލުކުރާ ބަޔަކަށް ހެދުން ކަމަށް ކަރެކްޝަނުން ބުނެއެވެ. 

އޭގެ އިތުރުން ނަފުސާނީ ގޮތުން ހޭލުންތެރިކަން އިތުރުކޮށް، އަމިއްލަ ނަފްސު ދެނެގަނެ ބަލައިގަންނާނެ ގޮތް ބުނެދިނުމާއިއެކު، ތަފާތު ތިޔަރީތަކުގެ އަލީގައި އަމިއްލަ ނަފުސަށް ކުރާ އިތުބާރު އިތުރުކޮށް، ހުކުމް ތަންފީޒު ކުރަމުންދާ ނުވަތަ ބަންދު ކޮށްފައިވާ ކުދިންނަކީ މުޖުތަމައުން އެކަހެރިކޮށްފައިވާ ބައެއް ނޫންކަން އެކުދިންނަށް އިހުސާސް ކޮށްދިނުމަކީ ވެސް ޕްރޮގްރާމްގެ ބޭނުމެއް ކަމަށް އެ އިދާރާއިން ފާހަގަކުރެއެވެ. 

ކަރެކްޝަނުން ބުނީ ދިރިއުޅުމުގައި ދިމާވާ ގޮންޖެހުންތަކަށް ކެތްތެރިކަމާއެކު ކުރިމަތިލުމުގެ ގާބިލުކަން އުފެއްދުމާއި އެނގެންޖެހޭ ގާނޫނާއި ގަވާއިދުތައް ބުނެދީ، ކުދީންގެ އަޚުލާގާއި ސުލޫކަށް އެދެވޭ ބަދަލުތަކެއް ގެނެސް، ގާނުނާއި ގަވާއިދުތަކަށް ބޯލަނބާ ބަޔަކަށް ހެދުމަށް ބާރުއެޅުމަކީ ވެސް މި ޕްރޮގްރާމުގެ ބޭނުމެއް ކަމަށެވެ. 

އޭގެ އިތުރުން މި ކުދިންނަކީ މުޖުތަމައަށް އަނބުރާ ނުކުންނައިރު، ދީނީ ގޮތުން އެކަށީގެންވާ މަޢުލޫމާތު ލިބި، އަމިއްލަ ނަފުސަށް އިތުބާރު ކުރާ މުޖުތަމައު ގަބޫލުކުރާ، ނަފުސާނީ ގޮތުން ހޭލުންތެރި، ގާނޫނާއި ގަވާއިދުތަކަށް ބޯލަނބައި އަދި ކުށުގެ ވެށިން ދުރުހެލިވެފައިވާ ބަޔަކަށް ހެދުމަކީވެސް މި ޕްރޮގްރާމުގެ މަގްސަދެކެވެ.