ފީފާ ވޯލްޑް ކަޕް 2026 ގެ ކުއާޓާ ފައިނަލުގައި ސްޕެއިން އަތުން ބަލިވި މެޗުގައި، ބެލްޖިއަމްގެ އެއްވަނަ ގޯލްކީޕަރު ތިބައޫ ކޯޓުއާ ބަދަލުކުރުމާ ގުޅިގެން، ކޯޗު ރޫޑީ ގާސިއާއަށް ބޮޑެތި ފާޑުކިޔުންތަކެއް އަމާޒުވެ، އޭނާގެ މުސްތަގުބަލާ މެދު ސުވާލު އުފެދިއްޖެއެވެ.

ފައިގެ ފަލަމަސްގަނޑަށް ތަދެއް އިހުސާސްކުރެވުނު ނަމަވެސް، ކުޅުން ކުރިއަށް ގެންދެވިދާނެ ކަމަށް ކޯޓުއާ ބުނަމުން ދަނިކޮށް، ގާސިއާ ނިންމީ އޭނާ ފިޓްނަސް 100 އިންސައްތަ ނެތް ކަމަށް ބަލައި ބަދަލުކުރުމަށެވެ. މެޗުގެ 71 ވަނަ މިނެޓުގައި ކޯޓުއާގެ ބަދަލުގައި ސެން ލަމެންސް ކުޅެން އެރި ނަމަވެސް، ޕައު ކުބާސީ ފޮނުވާލި ބޯޅައެއް އޭނާ އަތުން ދޫވުމުގެ ފައިދާ ނަގައި، ސްޕެއިންގެ މިކޭލް މެރީނޯ ވަނީ 86 ވަނަ މިނެޓުގައި ލަނޑެއް ޖަހައި 2-1 ގެ ނަތީޖާއަކުން ސްޕެއިން މޮޅުކޮށްދީފައެވެ.

ކޯޓުއާ ބަދަލުކުރުމަށް ގާސިއާ ނިންމި ނިންމުމަށް ބެލްޖިއަމްގެ ފުޓްބޯޅަ ދިރާސާކުރާ ފަރާތްތަކުގެ ހިތްހަމަނުޖެހުން ވަނީ އަމާޒުވެފައެވެ. މިގޮތުން މަޝްހޫރު ކޮމެންޓޭޓަރު ޕީޓާ ވަންޑެންބެމްޕް ބުނި ގޮތުގައި، ދުނިޔޭގެ އެންމެ މޮޅު ކީޕަރަށް ދުރު ބޯޅަތައް ނުޖެހޭތީ ވޯލްޑް ކަޕް ކުއާޓާ ފައިނަލެއްގައި އޭނާ ބަދަލުކުރުމަކީ ގަބޫލުކުރަން ދަތި، ހައިރާންކުރުވަނިވި ކަމެކެވެ. އޭނާ އިތުރަށް ބުނީ ގާސިއާ އަކީ އަމިއްލަ އުސޫލުތަކުގައި މާ ބޮޑަށް ހިފަހައްޓާ މީހެއް ކަމަށާއި، ކޯޓުއާ ފަދަ ތަޖުރިބާކާރު ކުޅުންތެރިއަކަށް އޭނާގެ އަމިއްލަ ހާލަތު މާ ރަނގަޅަށް އެނގޭނެ ކަމަށެވެ.

ނަމަވެސް ގާސިއާ ވަނީ އޭނާގެ ނިންމުން ދިފާއުކޮށްފައެވެ. އޭނާ ބުނީ މުބާރާތް ފެށުނީއްސުރެ އުސޫލަކީ ފިިޒިކަލީ 100 އިންސައްތަ ފިޓު ކުޅުންތެރިންނަށް ނޫނީ ފުރުސަތު ނުދިނުން ކަމަށެވެ. އަދި ކޯޓުއާގެ ފަރާތުން ދުރަށް ބޯޅަތައް ޖެހުމަށް ބޭނުންވި ނަމަވެސް، އެ ނިންމުން ނިންމީ އޭނާގެ އަނިޔާ އިތުރަށް ގޯސްވާން ބޭނުން ނުވާތީ ކަމަށްވެސް ބުންޏެވެ.

މި މަސް ނިމުމުގެ ކުރިން ގާސިއާގެ އެއްބަސްވުމުގެ މުއްދަތު ހަމަވާއިރު، މި މައްސަލައަކީ އޭނާގެ އެއްބަސްވުން އައުކުރުމާ މެދު ގޮތެއް ނިންމާއިރު މުހިންމު ދައުރެއް އަދާކުރާނެ ކަމެކެވެ. 2011 ވަނަ އަހަރު ލިލްއަށް ފްރެންޗް ލީގު ކާމިޔާބުކޮށްދިން އުމުރުން 62 އަހަރުގެ ގާސިއާ، ބެލްޖިއަމްގެ ކޯޗުކަމާ ހަވާލުވީ މިދިޔަ އަހަރުގެ ކުރީކޮޅުގައެވެ. އޭނާއާ ހަވާލުކުރެވުނު މައިގަނޑު މަސައްކަތަކީ، ކުރީގެ ކޯޗު ޑޮމެނިކޯ ޓެޑެސްކޯގެ ދަށުން ޓީމަށް ކުރިމަތިވި ނޭދެވޭ މާހައުލު ބަދަލުކޮށް، ޓީމަށް އައު ދިރުމެއް ގެނައުމެވެ. 

ވޯލްޑް ކަޕުގެ ކުއާޓާ ފައިނަލާ ހަމައަށް ބެލްޖިއަމް ގެންގޮސްދިނުމަކީ ގާސިއާއަށް ހާސިލުކުރެވުނު ލަނޑުދަނޑިއެކެވެ. ގާސިއާގެ އިރުޝާދުގެ ދަށުން ބެލްޖިއަމުން ކުޅުނު 20 މެޗުގެ ތެރެއިން 12 މެޗުން މޮޅުވެފައިވާއިރު، 6 މެޗު އެއްވަރުވެ، ބަލިވީ އެންމެ 2 މެޗުންނެވެ.

އެކަމަކު 2028 ވަނަ އަހަރުގެ ޔޫރޯއަށް ޓީމު ބިނާކުރުމުގައި ގާސިއާއަކީ އެންމެ އެކަށީގެންވާ މީހާާތޯ ބެލްޖިއަމް ފުޓްބޯޅަ ފެޑަރޭޝަނުން މިހާރު ދަނީ ސުވާލު އުފައްދަމުންނެވެ. އޭނާގެ ޓެކްޓިކްސްތަކާއި، ކުޅުންތެރިން ބަދަލުކުރާ ގޮތާއި، ޓީމު މެނޭޖުކުރާ ގޮތާ މެދު ގިނަ ބަޔަކު ދަނީ ޝައްކު އުފައްދަމުންނެވެ.

މި ފަހަރުގެ ވޯލްޑް ކަޕުގައި ބެލްޖިއަމްގެ ކުޅުން ފެނުނީ އެއް ފެންވަރެއްގައެއް ނޫނެވެ. ގްރޫޕް ސްޓޭޖުގައި މިސްރާއި އީރާނާ އެއްވަރުވިއިރު، ކުއާޓާ ފައިނަލަށް ދަތުރުކުރީ ނިއުޒީލެންޑް ބަލިކޮށްގެންނެވެ. އަދި ސެނެގޯލްއާ ދެކޮޅަށް ކުޅުނު މެޗުގައި 2-0 ގެ ނަތީޖާއަކުން ބަލިވާން ދަނިކޮށް، މުހިންމު ކުޅުންތެރިން ބޭލި ނަމަވެސް، މެޗު ކާމިޔާބުކުރެވުނީ އޭނާގެ ނިންމުންތަކުގެ ސަބަބުންތޯ ނުވަތަ އިދިކޮޅު ޓީމުގެ ގޯސްތަކުގެ ސަބަބުންތޯ ވަނީ ބަހުސް އުފެދިފައެވެ.

އެކަމަކު އެމެރިކާ އަތުން 4-1 ގެ ނަތީޖާއަކުން މޮޅުވި މެޗާއި، ނޭތަން އެންގޯއީ އަދި ނިކޮލަސް ރަސްކިން ފަދަ އާ ކުޅުންތެރިން ޓީމަށް ތައާރަފުކޮށް، އެ ކުޅުންތެރިން މުބާރާތުގައި ދެއްކި މޮޅު ކުޅުމަކީ ގާސިއާގެ ކާމިޔާބީތަކުގެ ގޮތުގައި ފާހަގަކުރެވޭ ކަންކަމެވެ.