ފީފާ ވޯލްޑް ކަޕް 2026 ގެ ދެވަނަ ބުރުގެ މެޗުގައި ޑިމޮކްރެޓިކް ރިޕަބްލިކް އޮފް ދަ ކޮންގޯ އަތުން ފަހަތުން އަރައި 2-1 ގެ ނަތީޖާއަކުން މޮޅުވެ، މުބާރާތުގެ ގަދަ 16 އަށް އިންގްލެންޑް ދަތުރުކޮށްފިއެވެ.

އެމެރިކާގެ އެޓްލާންޓާ ސްޓޭޑިއަމުގައި ކުޅުނު މި މެޗުގައި އިންގްލެންޑަށް ބޮޑެތި ގޮންޖެހުންތަކަކާ ކުރިމަތިވި ނަމަވެސް، މެޗުގެ ފަހުކޮޅު ހެރީ ކޭން ކާމިޔާބުކުރި ދެ ލަނޑާއެކު އެ ޓީމުން ވަނީ ބިރުވެރިކަމާއި ނުތަނަވަސްކަމުން އަރައިގަނެ މުހިންމު މޮޅެއް ހޯދާފައެވެ.

މެޗު ފެށުނީ އިންގްލެންޑަށް ސިހުން ލިބުނު ވަގުތުކޮޅަކުންނެވެ. މެޗު ފަށައިގެން ހަތްވަނަ މިނެޓުގައި އިންގްލެންޑުގެ ފަހަތުން ލިބުނު ޖާގައިގެ ފައިދާ ނަގައި، ބްރަޔަން ކިބަމްބޭ ސިޕެންގާ ވަނީ ލަނޑެއް ޖަހައި ކޮންގޯއަށް ކުރިހޯދައިދީފައެވެ. މި ލަނޑާއެކު އިންގްލެންޑުގެ ކުޅުންތެރިން ފެނުނީ ވަރަށް ބޮޑަށް ހާސްވެފައި ތިބި ތަނެވެ. އާންމުކޮށް ނުފެންނަ ފަދަ ގިނަ ގޯސްތަކެއް ހެދި، ރޭވުންތެރިކަމާއެކު ކުޅެމުންދިޔަ ކޮންގޯގެ މައްޗަށް ކުރިހޯދަން އިންގްލެންޑަށް ވަރަށް ބޮޑަށް އުނދަގޫވިއެވެ.

ކޮންގޯގެ ގޯލްކީޕަރު ލިއޮނަލް އެމްޕާސީ ވަނީ އިނގިރޭސި ކުޅުންތެރިން ފޮނުވާލި ނުރައްކާތެރި ގިނަ ހަމަލާތަކެއް ހުށިޔާރުކަމާއެކު ދިފާއުކޮށްފައެވެ. ޚާއްސަކޮށް ޖޫޑް ބެލިންހަމް ފޮނުވާލި ދެ ހަމަލާއެއް އޭނާ ހުއްޓުވީ ވަރަށް ހުށިޔާރުކަމާއެކުގައެވެ. އޭގެ ތެރޭގައި ބެލިންހަމް ބޮލުން ފޮނުވާލި ހަމަލާއަކާއި، އޭރިއާ ބޭރުން ފޮނުވާލި ބާރު ހަމަލާއެއް ހިމެނެއެވެ.

އަނެއްކޮޅުން ކޮންގޯއިން ދިޔައީ ކައުންޓަރ އެޓޭކުގައި އިންގްލެންޑަށް ނުރައްކާ ކުރަމުންނެވެ. ޔޮއާން ވިސާ ފޮނުވާލި ބޯޅައެއް ގޯލުގެ އަރިމަތީ ދަނޑީގައި ޖެހުނުއިރު، ނަތަނިއެލް އެމްބޫކޫވެސް ވަނީ ހިލޭޖެހުންތަކުން ނުރައްކާކޮށްފައެވެ. ދެވަނަ ހާފުގައި އިންގްލެންޑުގެ ކުޅުން ރަނގަޅުވި ނަމަވެސް، ކީޕަރު އެމްޕާސީ ދައްކަމުންދިޔަ މޮޅު ކުޅުމުގެ ސަބަބުން ލަނޑެއް ޖެހޭގޮތް ވަނީ ނުވެފައެވެ.

ނަމަވެސް، މެޗުގެ ފަހު ކުއާޓަރުގައި މުޅި މެޗުގެ އޮއިވަރު ބަދަލުވެގެންދިޔައެވެ. އިންގްލެންޑުން ކުރަމުންދިޔަ މެދުކެނޑުމެއްނެތް މަސައްކަތުގެ ނަތީޖާއަކަށްވީ، ކޭން ބޮލުން ފޮނުވާލި ހަމަލާއަކުން މެޗުގެ ނަތީޖާ ހަމަހަމަކުރުމެވެ. މެޗު އެއްވަރުވާން ދަނިކޮށް، ބުކާޔޯ ސާކާ އާއި އެންތަނީ ގޯޑަން ކުޅެން އެރުމާއެކު އިންގްލެންޑުގެ ކުޅުން އިތުރަށް އަވަސްވެ، ހަލުވިވިއެވެ.

މެޗުގެ 86 ވަނަ މިނެޓުގައި ކޭން ވަނީ އޭނާގެ ހުނަރުވެރިކަން ދައްކާލައި، ފުރިހަމަ އުކުޅަކުން ބޯޅަ ކޮންޓްރޯލް ކުރުމަށްފަހު، ފޮނުވާލި ބާރު ހަމަލާއަކުން މެޗުގެ ދެވަނަ ލަނޑު ކާމިޔާބުކޮށް، އިންގްލެންޑަށް މޮޅު ކަށަވަރުކޮށްދީފައެވެ.

ތޯމަސް ޓުޗެލްގެ އިރުޝާދުގެ ދަށުން ކުޅޭ އިންގްލެންޑް ގަދަ 16 ގައި ބައްދަލުކުރާނީ މުބާރާތް ބާއްވާ އެއް ޤައުމު ކަމަށްވާ މެކްސިކޯއާއެވެ.