ރާއްޖޭގެ އެންމެ ފުންނާބުއުސް ދީނީ އިލްމުވެރިއެއް ކަމަށްވާ ޝައިހް އިސްމާއީލް މުހައްމަދުގެ އެންމެ މުހިންމު އިލްމީ މަސައްކަތްޕުޅު "التفسير الميسر" (އައްތަފްސީރުލް މުޔައްސަރު) ނުވަތަ ކީރިތި ގުރުއާނުގެ ދިވެހި ތަރުޖަމާގެ ފުރަތަމަ ޗާޕް ނެރުމުގެ މަސައްކަތުގެ ބޮޑު ބައި ނިމިފައިވާކަމަށް އިސްލާމީކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ދީނީ ހިދުމަތުގައި އުމުރުގެ ބޮޑުބައެއް ހޭދަކުރެއްވި ޝައިޚް އިސްމާއީލް ދިވެހިންނަށް ދީނުގެ އިލްމު އުނގަންނަވައިދެއްވަން ގެންގުޅުއްވި އިސްރާޖީ ވިސްނުމަކީ މީހަކު ހައިރާންވާހާ މޮޅު ވިސްނުމެއްކަމަށް ވަޒީރު ވިދާޅުވިއެވެ. 

ޝައިޚް އިސްމާޢީލް މުޙައްމަދު، މަދީނާ ޔުނިވާސިޓީން ދަސްވެނިވެވަޑައިގަތުމަށްފަހު މާލެއަށް ވަޑައިގެން، ދިވެހި ކުދިންނަށް ޢަރަބިބަހުން އިސްލާމްދީން އުނގަންނަވައިދެއްވުމަށްޓަކައި "މަދަރުސާ ޠައިބާ"ގެ ނަމުގައި މަދަރުސާއެއް އުފެއްދެވިއެވެ. 

މިކަމަށް އަލިއަޅުވާލައްވައި ވާހަކަފުޅު ދައްކަވަމުން ވަޒީރު ވިދާޅުވީ ޠައިބާ މަދަރުސާ ބަންދުކޮށް ޝައިޚްގެ މަސައްކަތްޕުޅަށް އެކިފަހަރު އެކި ފިއްތުންތައް ކުރިމަތިވިކަމުގައިވިޔަސް ދުވަހަކުވެސް އެކަމާ ގުޅިގެން މީހަކާ ދިމާލަށް ބަހެއް ވިދާޅުވެފައިނުވާކަމަށެވެ. 

" އެއީ އެންމެ ރީތި އަހުލާގް، ސަރުކާރުން އެތަން އޭރު ބަންދުކުރީމަ ސަރުކާރާ ދިމާލަށްވެސް އެކައްޗެކޭ ވެސް ވިދާޅެއްނުވޭ، މި ޒަމާނުގައިނަމަ ވަރަށް ގިނަ ކަންކަން ހިނގާނެ، ދެން ކުރެއްވި މަސައްކަތްޕުޅަކީ ރާއްޖޭގެ ދަރިވަރުން ރާއްޖެއިން ބޭރަށް ފޮނުވައިގެން ކިޔަވާދެއްވަންފެއްޓެވީ، އޭގެ ސަބަބުން 100 އެތައް ބޭފުޅުންނެއް އިލްމު ހާސިލްކޮށްގެން ރާއްޖޭގެ އެކި ދާއިރާތަކުން އޭބޭފުޅުން އެކި މަގާމުތަކުން އެބަ ފެނޭ،". ވަޒީރު ވިދާޅުވިއެވެ. 

ދީނީ ދައުވަތުގެ ދާއިރާއިންގޮސް ސިޔާސީ ދާއިރާއަށް ބެލި ނަމަވެސް ޝައިޚްގެ ދީލަތިކަމުން ތައުލީމު އުނގެނުނު އެތައް ދަރިވަރުންނެއް ފެނިގެންދާނެކަމަށް ވިދާޅުވިއެވެ. 

ޝައިޚަކީ ދުވަހަކުވެސް މީހަކަށް ބަރު ބަހެއް ވިދާޅުވި ބޭފުޅެއް ނޫންކަމަށް ވިދާޅުވެ އެމަނިކުފާނަކީ އަބަދުވެސް މީހުންނާމެދު ހެޔޮ ބަސް ވިދާޅުވާ ހުލްގު ހެޔޮ ބޭފުޅެއްގެ ގޮތުގައި ވަޒީރު ޝެއިޚް ސިފަކުރެއްވިއެވެ. ޝެއިޚުގެ އަހުލާގީ މާތް ސިފަތަކުގެ ސަބަބުން އެމަނިކުފާނުވީ އެބޭފުޅެއްގެ ބަސް ދިވެހިންގެ ތެރޭގައި ވިކޭ މަދު ބޭފުޅުންގެ ތެރެއިންކަމަށް ވަޒީރު ވިދާޅުވިއެވެ. 

ޝައިޚަކީ މީހުން ނަމޫނާއަކަށް ބަލަންޖޭހޭ ފަދަ ޝަހުސިއްޔަތެއްކަމަށް ވިދާޅުވެ ވަޒީރު ވިދާޅުވީ ޝައިޚްގެ ވަކިވުމަކީ ދިވެހިން އުއްމަތަށް ގެއްލުނު އަގު ބޮޑު ޖަވާހިރެއްކަމަށެވެ.