މާލެއަށް ދިމާވެފައިވާ ބޮޑެތި މައްސަލަތަކަށް ނިމުން އައިސް ކަންކަން ހައްލުވާން އޮތީ މޭޔަރާ އެކު ޕީއެންސީގެ ކައުންސިލަރުން ހޮވައިގެން ކަމަށް ކޮންގްރެސް ޕާޓީގެ ނާއިބުރައީސް އަދި ބާރަށު ދާއިރާގެ މެމްބަރު އިބްރާހީމް ޝުޖާއު ވިދާޅުވެއްޖެ އެވެ. 

ކޮންގްރެސް ޕާޓީގެ ހުޅުމާލެ ދެކުނު ދާއިރާގެ ޖަގަހަ ހުޅުވުމަށް ބޭއްވި ޖަލްސާގައި ވާހަކަފުޅު ދައްކަވަމުން ޝުޖާއު ވިދާޅުވީ މާލޭގެ މޭޔަރުކަމުގައި އަދުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުންނެވިއިރު އެމްޑީޕީގެ ސަރުކާރުން އެމަނިކުފާނަށް ހުރަސްއަޅަމުން ގެންދިޔަ ކަމަށެވެ. އެހެންކަމުން މިއަދު މާލޭ ސިޓީ ކައުންސިލަށް މޭޔަރަކު ވަޑައިގެން މަސައްކަތް ފައްޓަވަން ޖެހޭނީ ރައީސް މުއިއްޒު ނިންމެވި ހިސާބުންކަމަށް ޝުޖާއު ވިދާޅުވި އެވެ. ޝުޖާއު ވިދާޅުވީ މިފަހަރުވެސް މާލެ ސަރަހައްދަށް މެނިފެސްޓޯއެއް އެބަ އޮތްކަމަށާއި އެ މެނިފެސްޓޯ ތަންފީޒުކުރަން މޫސާ އަލީ ޖަލީލު ހޮވަންޖެހޭކަމަށް ޝުޖާއު ވިދާޅުވި އެވެ. 

ޝުޖާއު ވިދާޅުވީ މިފަދައިން ކަންކަން ނުކޮށްފިނަމަ ލިބޭނީ މިހާރު މާލޭ ސިޓީ ކައުންސިލުގައި ތިއްބެވި ޕީއެންސީގެ ކައުންސިލަރުންނަށް ލިބޭކަހަލަ ލަނޑުކަމަށެވެ. ޝުޖާއު ވިދާޅުވީ ކައުންސިލުގައި ތިއްބެވި ޕީއެންސީގެ ކައުންސިލަރުން މަސައްކަތް ކުރައްވާކަމަށާއި އެކަމަކު އެކަންކަން ތަންފީޒު ނުކުރެވެނީ މޭޔަރު އެކަންކަމަށް ހުރަސްއަޅުއްވާތީ ކަމަށެވެ. 

މާލެ ސިޓީ ކައުންސިލުގެ މެޖޯރިޓީ ކޮންގްރެސް ޕާޓިއަށް ދޭންޖެހެނީ މާލޭގެ މޭޔަރެއްގެ ނާގާބިލުކަން ރައްޔިތުންނަށް ފެންނަމުންދާތީކަމަށް ޝުޖާއު ވިދާޅުވި އެވެ. 

ކޮންގްރެސް ޕާޓީގެ ކެންޑިޑޭޓުން ހޮވައިފިނަމަ މާލެ ސަރަހައްދަށް ބޭނުންވާ ތަރައްގީ ގެނެސްދޭނީ ސަރުކާރާ ގުޅިގެން ރައްޔިތުންގެ ހިޔާލާއި މަޝްވަރާއާ އެކުގައި ކަމަށް ޝުޖާއު ވިދާޅުވި އެވެ.