ރައީސުލްޖުމްހޫރިއްޔާ ޑރ. މުހައްމަދު މުއިއްޒު މޭޔަރުކަމުގައި ހުންނެވި އިރު އެކުލަވާލި ލޭންޑު ޔޫސް ޕްލޭން އޮތީ އެމްޑީޕީގެ ވެރިކަމުގެ ހައުސިން މިނިސްޓްރީން ހިފަހައްޓާފައިކަމަށް ކޮންގްރެސް ޕާޓީގެ ނާއިބު ރައީސް އަދި ބާރަށު ދާއިރާގެ މެމްބަރު އިބްރާހީމް ޝުޖާއު ވިދާޅުވެއްޖެ އެވެ. 

މެމްބަރު މިފަދައިން ވިދާޅުވީ ކޮންގްރެސް ޕާޓީގެ ހުޅުމާލެ ދެކުނު ދާއިރާގެ ޖަގަހަ ހުޅުވުމަށް ރޭ ބޭއްވި ޖަލްސާގައި ދެއްކެވި ވާހަކަފުޅުގެ ތެރެއިންނެވެ. 

މެމްބަރު ވިދާޅުވީ 11 އަހަރުގެ މާޒީއަކަށްފަހު މާލޭ ސިޓީގެ މޭޔަރަކަށް ރައީސް މުއިއްޒު ވަޑައިގެންނެވީ މެނިފެސްޓޯއަކާ އެކުގައި ކަމަށެވެ. އެމަނިކުފާނުގެ ޒައާމަތުގައި އެކުލަވާލެވުނު ލޭންޑް ޔޫސް ޕްލޭނަކީ ރައްޔިތުންގެ ފުރިހަމަ ބައިވެރިވުމާއެކު އެކުލަވާލެވުނު ޕްލޭނެއް ކަމަށް ޝުޖާއު ވިދާޅުވި އެވެ. 

އެމްޑީޕީގެ ސަރުކާރުން އޭރު އަމަލުކުރީ ޣައިރު ޒިންމާދާރުގޮތެއްގައި ކަމަށް ވިދާޅުވެ އެކަމުގެ ސަބަބުން ރައްޔިތުންނަށް ގިނަ ދުއްތުރާތަކާ ކުރިމަތިލާންޖެހުނުކަމަށް ޝުޖާއު ވިދާޅުވި އެވެ.

އެގޮތުން މާލޭ ސިޓީ ކައުންސިލުން ހިންގަން ނިންމި ތަރައްގީގެ ގިނަ ޕްރޮޖެކްޓުތަކަށް އޭުގެ ސަރުކާރުން ހުރަސްއަޅާފައިވާކަމަށް ވިދާޅުވެ ޝުޖާއު ވިދާޅުވީ ރައްޔިތުންނާ ގާތުން ހިދުމަތް ދިނުމަށް މާލޭގެ ސިޓީ ކައުންސިލުގެ މެޖޯރިޓީ ކޮންރެސް ޕާޓީއަށް ބޭނުންވާ ކަމަށެވެ.