ޤަައުމުގައި ސިޔާސީ ހަމަނުޖެހުން ޤާއިމުކޮށް ދެވިފައިވާ ކަމަށާ އެހެން ކަމުން ހަލަބޮލިކަން އުފައްދަން އެއްވެސް މިންވަރެއްގެ ފުރުސަތު ނުދިނުމަށް ދިވެހިރައްޔިތުންގެ ކިބައިން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެދިވަޑައިގެންފި އެވެ.

މިރޭ އޮތް ދަ ގްރޭޓަރ އައްޑޫ ވިޝަންގެ ތަފްސީލު ލޯންޗުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ އެމަނިކުފާނުގެ ސަރުކާރަށް ދެ އަހަރު ފުރި ތިންވަނަ އަހަރެއް ގުނަމުންދާއިރު ނިމިދިޔަ ސަރުކާރުތަކުގައި ފެނުނު ފަދަ އެއްވެސް ކަމެއް ނުފެންނާނެ ކަމަށެވެ.

ޚާއްސަކޮށް ވެރިކަން ކުރައްވާ ބޭފުޅުން ޖަލަށްލުމުގެ ސިޔާސީ ސަޤާފަތް ނައްތާލައްވާފައިވާ ކަމަށް ވިދާޅުވި އެވެ. ރައީސް ވިދާޅުވީ އެމަނިކުފާނު ވެރިކަމަށް ވަޑައިގަތުމާއި ހަމައަށް ކަން އޮތީ ވެރިކަން ކުރައްވާ ކޮންމެ ބޭފުޅަކުވެސް ޖަލަށްލުމަކީ ކޮންމެހެން ވެސް ކުރަން ޖެހޭ ކަމެއް ކަމުގައި ވެރިކަމަށް ހުންނަ ބޭފުޅަކަށް ހީވާ ގޮތަށް ކަމަށެވެ.

ނަމަވެސް ކުށެއް ނުކުރާހާ ހިނދަކު އެއްވެސް މީހަކު ޖަލަށްލައިގެންނުވާނެ ކަމަށާ އެއީ އެމަނިކުފާނުގެ ސިޔާސަތު ކަމުގައި ވިދާޅުވި އެވެ. ރައީސް ވިދާޅުވީ ޑިމޮކްރެސީއަށް ރުޖާޢަވެ ރާއްޖޭގައި ސިޔާސީ ހަމަނުޖެހުން ޤާއިމުކޮށް ދެވިއްޖެ ކަމަށެވެ.

އެހެން ކަމުން ހަލަބޮލިކަން އުފައްދަން ފުރުސަތު ދޭން ޖެހޭ ސަބަބެއް ނެތް ކަމަށް ވިދާޅުވި އެވެ. އިދިކޮޅު ޕާޓީތަކުގެ އަމަލުތައް ހުރީ ކިރިޔާވެސް ބާރެއް ލިބިއްޖެނަމަ ޤައުމު ހަލަބޮލި ކުރުމަށް ކަމަށާ އެހެން ކަމުން އަންނަ މަހުގެ ތިންވަނަ ދުވަހު އޮންނަ އިންތިޚާބުތަކުގައި ރަނގަޅު ގޮތް ނިންމެވުމަށް ރައީސް އެދިވަޑައިގަތެވެ.

އެމަނިކުފާނު މިރޭވެސް ވިދާޅުވީ ރައްޔިތުންނަށް ގެއްލުންވާނެ ކަމެއްގައި ރައްޔިތުންގެ ކައިރީ ވޯޓަށް ނާއްސަވާނެ ކަމަށެވެ. އަދި އެމަނިކުފާނު ވެރިކަން ކުރައްވާނީ މާތްﷲއަށް ބިރުވެތިވާ ޙާލު އެކަލާންގެއަށް ތެދުވެރިވެ ރައްޔިތުންނަށް އިޚްލާސްތެރިކަމާ އެކު ކަމަށް ވިދާޅުވި އެވެ.

ކޮންގްރެސް ޕާޓީއަކީ ސިޔާސީ ޕާޓީގެ ނިޒާމު ކުރިއަރުވާ ޑިމޮކްރެސީއަށް ލޯބިކުރާ މެންބަރުންތަކެއް ހިމެނޭ ޕާޓީއެއް ކަމަށާ އެ ޕާޓީން ޤައުމާއި ރައްޔިތުންނަށް ދެރަވާނެ އެއްވެސް ކަމެއް ނުކުރާނެ ކަމުގައި ވިދާޅުވި އެވެ.