ކަނޑުން ބައެއް ގެއްލުނީ ނިމިދިޔަ އެމްޑީޕީ ސަރުކާރުން ގަސްތުގައި ކުރި ކަންތައްތަކެއްގެ ސަބަބުން ކަމަށާ އެއީ ޤައުމަށް އެންމެ މަތީ ދަރަޖާގައި ޣައްދާރުވުން ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ވިދާޅުވެއްޖެ އެވެ.

ދަ ގްރޭޓަރ އައްޑޫ ވިޝަންގެ ތަފްސީލު ލޯންޗުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ ކަނޑުން ގެއްލުނު ބައި ހޯދުމަށް ކުރަމުންދާ މަސައްކަތާއި އެ މަސައްކަތް އޮތް ގޮންޖެހުންތަކާއި ގުޅޭ މައުލޫމާތު ހިއްސާ ކުރައްވާފަ އެވެ.

ރައީސް ވިދާޅުވީ މިދިޔަ ސަރުކާރު ހިންގީ ޤައުމީ އެއްވެސް ވިސްނުމެއް ނެތް ބައެއް ކަަމަށާ އެކަން ކަނޑުގެ މައްސަލާގަައި އަމަލުކުރި ގޮތުން އެކަނިވެސް ސާފުވާ ކަމަށެވެ. ފޯޅަވަހީގެ މައްސަލަ މޮރިޝަސް ސަރުކާރުން އާބިޓްރޭޝަނަށް ހުށައެޅި ކަމަށާ އެ މައްސަލަ ކޮންމެ ގޮތަކަށް ނިމުނުނަމަވެސް އެ ނިންމުމަކަށް ޗެލެންޖު ކުރަން ސަރުކާރަށް ފަސޭހަވާނެ ކަމަށެވެ.

ނަމަވެސް އެކަން އެގޮތަށް ވުމަށް ފުރުސަތު ނުދީ މިދިޔަ ސަރުކާރުން އިސްވެ ކަނޑުގެ މައްސަލަ އިޓްލޮސްއަށް މައްސަލަ ހުށައެޅި ކަމަށެވެ. އެ މައްސަލަ ނިމިގެން އައީ ރާއްޖޭގެ ކަނޑުގެ ސަރަޙައްދުން ބޮޑުބައެއް ގެއްލޭ ގޮތަށެވެ.

ރައީސް ވިދާޅުވީ ޤައުމަށް އެންމެ ފައިދާ ގޮތް އޮއްވާ 37 މިލިއަން ރުފިޔާ ޚަރަދުކޮށް އަދި ކަނޑުން ބޮޑު ބައެއް ދޫކޮށްލަން ޖެހޭ ގޮތަށް ނިންމުން އައީ ސަރުކާރުން އަމަލުކުރި ގޮތުން ކަމަށެވެ. ރައީސް ވިދާޅުވީ ކަނޑުން ގެއްލުނު ބައި ހޯދުމުގެ މަސައްކަތަށް ސަރުކާރަށް ލަފާ ދޭ ބައިނަލްއަޤްވާމީ މާޙިރުން ވެސް މިދިޔަ ސަރުކާރުން ޤައުމަށް ގެއްލުންވާނެ މިފަދަ ރޫޓެއް ޚިޔާރުކުރި ކުރުމާއިމެދު ސުވާލު އުފެއްދި ކަމަށެވެ.

އަދި އެކަން ކުރީ ވެސް މަޖިލީހުން ހުއްދަ ނުހޯދާ ސިއްރުސިއްރުން ސިޓީއެއް ފޮނުވައިގެން ކަމަށަށް ރައީސް ވިދާޅުވި އެވެ.

"ކަނޑައެޅިގެން ޤާނޫނު އަސާސީއާ ޚިލާފު, އެންމެ މަތީ ޚިޔާނާތުގެ ކުށަކަށްވާނެ ކަމެއް ކަމަށް އަޅުގަނޑަށް ޤަބޫލުކުރެވޭ ކަމެއް. އަދި މިކަން މިކުރީވެސް ރައްޔިތުންގެ ފައިސާއިން 37 މިލިއަން ޚަރަދުކޮށްފައި. އެންމެ މަތީ ޚިޔާނާތުގެ ކުށެއް ނުވަތަ ޤައުމަށް ޣައްދާރުވުމުގެ ކުށެއް މިކުރީ ޚަރަދުވެސް ކޮށްގެން. މިވަރުކަމެއް ކޮށްފައި ތިބި ބަޔަކު ނިކުމެ ރައްޔިތުންގެ ގާތުގައި މި އެދެނީ ވޯޓަށް," ރައީސް ވިދާޅުވި އެވެ.

ރައީސް ވިދާޅުވީ މޮރިޝަސްއަށް ސޯލިހް, ފޮނުއްވެވި ސިޓީ އަނބުރާ ގެންނަވަން ނިންމެވީ އެއީ މިވަރުގެ ޚިޔާނާތަކަށްވާތީ ކަމަަށެވެ. އެހެން ކަމުން ރިޔާސީ ބަޔާން އިއްވެވި ދުވަހުގެ މެންދުރު ފަހު އެ ސިޓީ އަނބުރާ ގެންނަވާކަން މޮރިޝަސް ސަރުކާރަށް ރަސްމީކޮށް އަންގާފައިވާ ކަމަށެވެ.

އެމަނިކުފާނު ވިދާޅުވީ ސަރުކާރުން މިހާރު މަސައްކަތް ކުރައްވަނީ ކަމާބެހޭ ބައިނަލްއަޤްވާމީ އިދާރާތަކަށް ހުށައަޅައިގެން ކަނޑުން ގެއްލުނު ބައި ހޯދުމަށެވެ.

"މިހާރު ޗެލެންޖިން, ނަަމަވެސް އިރާދަކުރެއްވިއްޔާ އެކަން ކާމިޔާބު ކުރާނަން. އެކަން އަޅުގަނޑުމެންނަށް ސާފު," ރައީސް ވިދާޅުވި އެވެ.