ސަރުކާރު ހިންގާ ޕީއެންސީގެ ކޮންގްރެސް އަންނަ އޮކްޓޫބަރު މަހުގެ ތެރޭގައި އޮންނާނެ ކަމަށާ އުންމީދަކީ ޕާޓީގެ މެންބަރުންގެ އަދަދު 100,000 އިތުރުކުރުން ކަމުގައި ކޮންގްރެސް ޕާޓީގެ ރައީސް އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ވިދާޅުވެއްޖެ އެވެ.

މިރޭ އޮތް ދަ ގްރޭޓަރ އައްޑޫ ވިޝަންގެ ތަފްސީލު ލޯންޗުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ 2023 ވަނަ އަހަރު 3,000 މެންބަރުން ހިމެނޭ ޕާޓީ މިއަދު 75,000 އަށް އިތުރުވެފައިވާ ކަމަށެވެ.

އެއީ މެންބަރުންގެ ބުރަ މަސައްކަތް ކަމުގައި ފާހަގަ ކުރައްވާ ރައީސް ވަނީ އެކަމަށް ޝުކުރު އަދާކުރައްވާފަ އެވެ. ރައީސުލްޖުމްހޫރިއްޔާ މިރޭ ވިދާޅުވީ ޕީއެންސީގެ ކޮންގްރެސް އަންނަ އޮކްޓޫބަރު މަހުގެ އޮންނާނެ ކަމަށެވެ. އެ ނިންމުން އެެ ޕާޓީގެ ކައުންސިލުން ނިންމާފައިވާ ކަމަށެވެ.

ރައީސް ވަނީ މިއީ ސިޔާސީ މަސައްކަތުގައި ކުރިއަށްދާން ބޭނުންވާ މެންބަރުންނަށް ލިބޭނެ ވަރަށް ފަހި ފުރުސަތެއް ކަމުގައި ރައީސް ވިދާޅުވި އެވެ. އެހެން ކަމުން ވީހާވެސް ގިނަ ބަޔަކު ކޮންގްރެސްގެ ކުރީން ޕާޓީއާ ގުޅުމަށް ދަޢުވާތު ދެއްވި އެވެ.

އަދި އެކި ސަބަބުތަކާއި ހުރެ ދުރުގައި ތިއްބެވި ޕާޓީގެ މެންބަރުން ވެސް އައު ހިތްވަރަކާއެކު މަސައްކަތް ފެށުމަށް އެދިވަޑައިގަތެވެ. ރައީސް ވިދާޅުވީ ކޮންގްރެސްގައި މަޤާމުތަކަށް މެންބަރުން އިންތިހާބު ކުރުމަށް ބޭއްވޭނީ ވަރަށް ދެފުށްފެންނަ އިންތިޚާބުތަކެއް ކަމަށެވެ.

އެމަނިކުފާނު ވަނީ ކޮންގްެރެސްގެ މެންބަރުންގެ އަދަދު އެއްލައްކައަށް ގެންދިއުމަށް އަމާޒު ހިފަން އެދިވަޑައިގެންފަ އެވެ.