އައްޑޫ ސިޓީ އުފެދުނު ފަހުން އެ ސިޓީގެ ކައުންސިލުގެ އަޣުލަބިއްޔަތު އަދި މޭޔަރުކަން ހުރިހާ ދައުރެއްގައި އެމްޑީޕީއަށް ދީފައިވާއިރު، އެކަށީގެންވާ ގޮތެއްގައި އެ ޕާޓީއަށްް ކައުންސިލު ހިންގިފައިވާ ތަންް ފެނިވަޑައިނުގަންނަވާކަމަށް ފޭދޫ ދެކުނު ދާއިރާގެ މެންބަރު އިބްރާހީމް ދީދީ ވިދާޅުވެއްޖެއެވެ. 

ޕީޕަލް ނޭޝަނަލް ކޮންގްރެސް ޕާޓީގެ މާލޭ ސަރަހައްދުގެ އައްޑޫ ސިޓީ ކެމްޕެއިން ޖަގަހަ ހުޅުވުމަށް ރޭ ބޭއްވި ރަސްމިއްޔާތުގައި ވާހަކަދައްކަވަމުން ދީދީ ވިދާޅުވީ ލާމަރުކަޒީ ނިޒާމުގެ ތެރެއިން މާލެ ފިޔަވަައި ފުރަތަމަ އުފެދުނު ސިޓީއަކީ އައްޑޫ ސިޓީ ކަމަށެވެ. އަދި އެ ސިޓީ އުފެއްދި ފަހުން ތިން ދައުރަށްް އެ ސިޓީގެ މޭޔަރުކަމާއި ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބޮޑު އަޣުލަބިއްޔަތު އެމްޑީޕީއަށް ދެމުންދާތާ 15 އަހަރު ފާއިތުވެގެން ގޮސްފި ކަމަށެވެ. ނަމަވެސް އެކަށީގެންވާ ގޮތުގައި ކައުންސިލު ހިންގޭ މަންޒަރު ނުފެންނަ ކަމަށެވެ. 

"އަޅުގަނޑު ދަންނަވާލާނަން އޭގެ ފަހުން ފުވައްމުލަކާއި ތިނަދޫ އަދި ކުޅުދުއްފުށި ސިޓީތަކަށް ބަދަލުވެގެންދިޔައީ. އެތަންތަނަށް ދިޔައީމަ އަޅުގަނޑުމެންނަށް އެތައް ސަތޭކަ ގުނައެއް އައްޑޫ ސިޓީއަށްވުރެ ކުރިއަރައިގެން ދިޔަކަން ފެންނން އެބައޮތް. ތަރައްގީގެ ގޮތުންވެސްް، އަދި އިޖުތިމާއީ އިގުތިސާދީ ގޮތުންވެސް ފުދުންތެރި ރައްޔިތެއް ދިރިއުޅޭކަން އެބަ ފާހަގަވޭ. ނާގާބިލު ކައުންސިލަރުން އަދި ނާގާބިލު މޭޔަރުން އައްޔަންކުރެވުނީތީ،" މެންބަރު ވިދާޅުވިއެވެ. 

ހިތަދޫ މޫލެކެޑެ ދާއިރާ ކައުންސިލަރު އަހްމަދު ސައީދު ކުރިން އެމްޑީޕީގައި ހުންނެވުމަށްފަހު ކޮންގްރެސް ޕާޓީއާ ގުޅިވަޑަައިގަތީ އެމްޑީޕީގެ ކައުންސިލެއް އޮވެގެން އަދި ހާއްސަކޮށް އައްޑޫ ސިޓީގެ މިހާރުގެ މޭޔަރު ނިޒާރު އެ މަގާމުގައި ހުންނަވައިގެން އައްޑޫއަށް ތަރައްގީއާއި ކުރެއެރުން ނުގެނެވޭނެކަން ގަބޫލުކުރައްވާތީކަން ފާހަގަކުރައްވަމުން ދީދީވަނީ ކައުންސިލުގައި އެ ސިޓީގެ ރައްޔިތުންގެ ހައްގުގައި ވަކާލާތުކޮށްދެއްވާތީ އަހްމަދު ސައީދަށް ޝުކުރު އަދާކުރައްވާފައެވެ. 

އަދި މި ސަރުކާރުން އައްޑޫއަށް ތަރައްގީ ނުގެނެވޭކަމަށް ވިދާޅުވެ ނިޒާރު އަމާޒުކުރައްވާ ފާޑުކިޔުންތަކަށް ރައްދު ދެއްވަމުން މެންބަރުވަނީ ނިޒާރު ނިސްބަތްވެވަޑައިގަންނަވާ ޕާޓީގެ ވެރިކަމުގެ ފަސް އަހަރު ނިޒާރު މޭޔަެރުކަމުގައި ހުންނަވައިގެން އައްޑޫ ސިޓީއަށް ތަރައްގީ ގެނެސްނުދެވުނު ސަބަބަކީ ކޮބައިތޯ ސުވާލު އުފައްދަވާފައވެެ. 

"އެ ބޭފުޅުންނަށް ތަރައްގީއަށް ކުރަންވާ މަސައްކަތް ކުރެވުނުނަމަ މިއަދު އައްޑޫ ސިޓީ އޮންނާނީ އަޅުގަނޑުމެންނާ ހަމައަށް އައިއިރު ތަރައްގީވެފައި އަދި އިތުރަށް ތަރަައްގީކުރަން ފުރުސަތުވެސް ލިބުނީސް. އަޅުގަނޑުމެންނާ ހަމައަށް އައިއިރު އައްޑޫގައި ކަރަންޓެއް ނެތް، ފެނެއް ނެތް އެކަށީގެންވާ ގޮތަކަށް،" މެންބަރު ވިދާޅުވިއެވެ. 

އަދި އެމްޑީޕީގެ ވެރިކަމުގައި އައްޑޫ ސިޓީގައި ހެދި މަގުުތަައް ހުރީވެސް ޕޭމެންޓު އުސްކޮށް މަގުތައް ވަރަށް ހަނިކޮށް ކަމަށް ވިދާޅުވެ، ދީދީ ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ޒައާމަތުގައި އައްޑޫއަށް ތަރައްގީ ނުގެނެވޭކަމަށް ވިދާޅުވެ ފާޑުވިދާޅުވާން ނިޒާރު ލަދުފުޅު ގަންނަންވާނެ ކަމަށެވެ. 

ނިޒާރުގެ މޭޔަރުކަމުގައި އައްޑޫގެ މޭޔަރާއި ކައުންސިލަރުން ޔޫރަޕާއި އޭޝިޔާގެ ގައުމުތަކަށް ތަޖުރިބާގެ ދަތުރުތައް ކުރެވި ނަމަވެސް އެ ތަޖުރިބާއިން އައްޑޫ ރައްޔިތުންނަށް ހާސިލުވި އެއްވެސް ކަމެއް ނެތްކަމަށްވެސް މެންބަރު ދީދީ ވިދާޅުވިއެވެ. 

އަދި އައްޑޫގެ މޭޔަރުކަމަށް ވާދަކުރައްވާ ކޮންގްރެސް ޕާޓީގެ ކެނޑިޑޭޓުގެ ތަސައްވުރެއް އެބައޮތްކަން ފާހަގަކުރައްވަމުން ދީދީ ވިދާޅުވީ ޕީއެންސީއަށް އަައްޑޫގެ މޭޔަރުކަމާއި ސިޓީ ކައުންސިލުގެ އަޣުލަބިއްޔަތު ލިބިއްޖެނަމަ ހަލުއިކަމާއެކު އައްޑޫއަށް ތަރައްގީވެސް ގެނެވިގެންދާނެ ކަމަށެވެ.