ރައީސުލްޖުމްހޫރިއްޔާ އިންތިހާބުކުރުމަށް ނަގާ ވޯޓާއި، ރައްޔިތުންގެ މަޖިލީހުގެ މެންބަރުން އިންތިހާބުކުރުމަށް ނަގާ ވޯޓު އެކުއެކީ ބޭއްވުމަށް ގާނޫނުއަސާސީއަށް ގެންނަން ސަރުކާރުގެ ފަރާތުން ހުށަހަޅާފައިވާ އިސްލާހާ މެދު ސިޔަސީ ޕާޓީތަކާއި، ބަންޑާރަނައިބުގެ އިތުރުން އިލެކްޝަން ކޮމިޝަނުގެ ހިޔާލު ހޯދުމަށް އަންނަ މަހުގެ ދެ ވަނަ ދުވަހު ބައްދަލުވުމެއް ބޭއްވުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމައިފިއެވެ.

މިއަދު ބޭއްވި ކޮމިޓީ ބައްދަލުވުމުގައި ޕީއެންސީގެ ޕާލަމެންޓްރީ ގްރޫޕުގެ ޑެޕިއުޓީ ލީޑަރު އަދި ބާރަށު ދާއިރާގެ މެމްބަރު އިބްރާހީމް ޝުޖާއު ވިދާޅުވީ ދިވެހި ރާއްޖޭގެ ޑިމޮކްރަސީގެ ނިޒާމު ހިނގަމުންދަނީ މަލްޓި ޕާޓީ ނިޒާމެއްގެ ތެރެއިން ކަމަށް ވާތީ އިސްލާހުގެ މަސައްކަތް ކޮމިޓީ ތެރެއިން ކުރިއަށް ގެންދާއިރު ސިޔާސީ ޕާޓީތަކާއެކު މަޝްވަރާކުރުމަށް ނިންމާފައިވާކަމަށެވެ. 

އަދި އިންތިހާބުތަކާ ގުޅިގެން ގާނޫނީ ގޮތުން އަދާކުރަންޖެހޭ ހުރިހާ ޒިންމާއެއް އަދާކުރަނީ އިލެކްޝަން ކޮމިޝަނުން ކަމަށްވާތީ ކޮމިޝަނާއެކު މަޝްވަރާތައް ކުރަންޖެހޭކަން ޝުޖައު ފާހަގަކުރެއްވިއެވެ. މީގެ އިތުރުން އިސްލާހުގެ މަސައްކަތް ކުރިއަށްދާއިރު ބަންޑާރަނައިބުގެ ލަފަޔާއި މަޝްވަރާ ވެސް މިކަމުގައި ހޯދަންޖެހޭނެކަމަށް ވިދާޅުވިއެވެ.

އެހެންކަމުން ސިޔާސީ ޕާޓީތަކާއި، ބަންޑާރަ ނައިބުގެ އިތުރުން އިލެކްޝަން ކޮމިޝަނުގެ ހިޔާލު ހޯދުމަށް އަންނަ މަހުގެ ދެ ވަނަ ދުވަހު ވަކި ވަކި ބައްދަލުވުންތަކެއް ބޭއްވުމަށް ޝުޖާއު ވަނީ ހުށަހަޅުއްވާފައެވެ. ޝުޖާއުގެ މި ހުށަހެޅުއްވުމަށް ހެންވޭރު ހުޅަނގު ދާއިރާގެ މެމްބަރު އަލީ އިބްރާހީމް ވަނީ ތާއީދުކުރައްވާފައެވެ. 

ކޮމިޓީއަށް ހާޒިރުވެވަޑައިގެން ތިއްބޭވި ހުރިހާ މެމްބަރުންގެ އިއްތިފާގުން މި ހުށަހެޅުން ވަނީ ފާސްކޮށްފައެވެ.

ރައީސުލްޖުމްހޫރިއްޔާ އިންތިހާބުކުރުމަށް ނަގާ ވޯޓާއި، ރައްޔިތުންގެ މަޖިލީހުގެ މެންބަރުން އިންތިހާބުކުރުމަށް ނަގާ ވޯޓު އެކުއެކީ ބޭއްވުމަށް ގާނޫނުއަސާސީއަށް އިސްލާހު ގެނައުމަށް ހުށަހެޅުއްވީ ޕީއެންސީގެ ޕާލިމަންޓަރީ ގުރޫޕުގެ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހީމް ފަލާހެވެ. 

ގާނޫނުއަސާސީގެ 110 ވަނަ މާއްދާގެ ދަށުން ރައްޔިތުންގެ މަޖިލީހުގެ މެންބަރުކަމަށް މީހުން ހޮވުމަށް ބާއްވަންޖެހޭ އިންތިޚާބު ބާއްވަންވާނީ، ރައީސުލްޖުމްހޫރިއްޔާއަކު ހޮވުމަށް ބާއްވާ އިންތިޚާބާ އެކުގައިކަމަށް މި ބިލުގައި ހިމަނާފައިވެއެވެ. އަދި ރައްޔިތުންގެ މަޖިލީހުގެ އުމުރަކީ ޑިސެމްބަރު މަހުގެ 1 ވަނަ ދުވަހުން ފެށިގެން ފަސް އަހަރުގެ ގޮތުގައި ކަނޑައަޅައި، މި މުއްދަތު ހަމަވުމާއެކު މަޖިލިސް އުވިގެންދާގޮތަށް އިސްލާހުކުރުމަށް މި ބިލުގައި ބަޔާންކޮށްފައިވެއެވެ.

މީގެއިތުރުން ހިނގަމުންދާ ރައްޔިތުންގެ މަޖިލީހުގެ އުމުރު ހަމަވެގެން މަޖިލިސް އުވުމާއެކު، އަލަށް އިންތިޚާބުކުރާ ރައްޔިތުންގެ މަޖިލީހުގެ ފުރަތަމަ ޖަލްސާ ބާއްވަންވާނީ ޑިސެމްބަރު 1 ވަނަ ދުވަހު ކަމުގައި އިނގުރައިދޫ ދާއިރާގެ މެންބަރު ފަލާހު ހުށަހެޅުއްވި ބިލުގައި ހިމަނާފައިވެއެވެ.

އެ ޤާނޫނުގައި މީގެކުރިން އޮންނަ ގޮތުގައި ރައްޔިތުންގެ މަޖިލީހުގެ އުމުރަކީ މަޖިލިސް އިންތިޚާބު ކުރުމަށްފަހު، ފުރަތަމަ ޖަލްސާ ކުރާ ތާރީޚުން ފެށިގެން ފަސް އަހަރު ދުވަހެވެ. އަދި މި މުއްދަތު ހަމަވުމުން މަޖިލިސް އުވުމާއެކު، އަލަށް އިންތިޚާބުކުރާ ރައްޔިތުންގެ މަޖިލީހުގެ ފުރަތަމަ ޖަލްސާ ބާއްވަންވާނެ ކަމުގައި ބުނެފައިވެއެވެ.

ފަލާހް ހުށަހެޅުއްވި ބިލުގެ ބޭނުމަކީ މަޖިލީހުގެ މެންބަރު ކަމަށް މީހުން ހޮވުމަށާއި ރައީސް ހޮވުމަށް ބާއްވާ އިންތިޚާބު އެކީގައި ބާއްވަން ކަނޑައެޅުން ކަމަށް ބުނެފައިވެއެވެ. އަދި ހަމައެހެންމެ، މަޖިލީހުގެ ދައުރު ނުވަތަ އުމުރު ގުނުމުގެ އުސޫލު އިސްލާހުކޮށް، ޤާނޫނު އަސާސީއަށް ގެންނަން ޖެހޭ އިސްލާހުތައް ގެނައުމަކީ ވެސް އެ ބިލުގެ ބޭނުމެއްކަން ފާހަގަކޮށްފައިވެއެވެ.