މިއަދު އަމަލީ މަސައްކަތް ފެށުނު އައިލާ ޓައުންޝިޕް މަޝްރޫއަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސިޔާސަތުތަކުގެ ސަބަބުން ދިވެހިރާއްޖެއަށް އިންވެސްޓަރުންގެ އިތުބާރު އިއާދަކުރެވިފައިވާ ކަމުގެ ހެއްކެއްކަަމަށް އިގުތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެެއްޖެއެވެ. 

އައިލާ ސަސްޓެއިނަބަލް ޓައުންޝިޕުގެ އަމަލީ މަސައްކަތް ފެށުމަށް މިއަދު ބޭއްވި ރަސްމިއްޔާތުގައި ދެއްކެވި ވާހަކަފުޅުގަިއ ސައީދުވަނީ ރާއްޖޭގެ ވެރިކަމާ ރައީސް ޑރ.މުޢިއްޒު ހަވާލުވެވަޑައިގަތްއިރު، ރާއްޖޭގެ އިގުތިސާދީ ހާލަތު އޮތް ގޮތުގެ މައްޗަށް ތަފުސީލުކޮށް އަލިއަޅުވައިލައްވައި، އެ ހާލަތުން ރާއްޖެ ސަލާމަތްކުރެއްވުމަށް ރައީސް ތަންފީޒުކުރެއްވި ސިޔާސަތުތައް ވިދާޅުވެދެއްވާފައެވެ. 

ރައީސް ވެރިކަމަށް ވަޑައިގެންނެވިއިރު އެމަނިކުފާނަށް ވާރުތަވީ އަހަރުތަކަކަށް ދެމިގެންދިޔަ ދެމެހެއްޓެނެވިކަމެއް ނެތް ސިޔާސަތުތަކުން އުފަންކޮށްފައި އޮތް ނުރައްކާ ހާލަތެއްކަން ފާހަގަކުރައްވަމުން ވަޒީރު ވިދާޅުވީ، ދައުލަތުގެ ދަރަނި އެއިރު އަށް ބިލިއަން އެމެރިކާ ޑޮލަރަށް އަރާފައިވާ ކަމަށެވެ. ދައުލަތުގެ މާލިއްޔާ އޮތީ ވަރަށް ބޮޑަށް ބަލިކަށިވެފައިކަމަށާއި، އެގޮތުން އަމިއްލަ ކުންފުނިތަކާއި ފަރުދުން ފޯރުކޮށްދީފައިވާ ހިދުމަތްތަކަށް ދައްކަންޖެހޭ 639 މިލިއަން ޑޮލަރަށްވުރެ ގިނަ ފައިސާ ނުދައްކައި ހުރި ކަމަށް ވަޒީރު ވިދާޅުވިއެވެ. 

ސައީދު އިތުރަށް ފާހަގަކުރެއްވީ ކުރީގެ ސަރުކާރުތަކުން ފައިސާ ޗާޕުކުރުމަށް ބަރޯސާވެ 2018 ވަނަ އަހަރާއި 2023 ވަނަ އަހަރާ ދެމެދުގައި އޭގެ ކުރީގެ 40 އަހަރު ޗާޕުނުކުރާ މިންވަރަށް ފައިސާ ޗާޕުކޮށް ދިވެހި ރުފިޔާގެ އަގު ނިޒާމީ ގޮތެއްގަައި ވައްޓާލާފައިވާ ކަމެވެ. 

މިގޮންޖެހުންތަކުން ރާއްޖެ ސަލާމަތްކުރެއްވުމަށް ރައީސް ކުރެއްވި މަސައްކަތްޕުޅުގައި އެންމެ ފުރަތަމަ އިސްކަންދެއްވީ ރާއްޖޭގެ ޓެކުހުގެ އޮނިގަނޑު ޒަމާނީކުރައްވައި ހަރުދަނާކުރެއްވުމަށް ކަމުގައި ސައީދު ވިދާޅުވިއެވެ. އެ ސިޔާސަތުގެ އަމާޒަކީ ސަރުކާރުން އަޅާ ފިޔަވަޅުތަކާއެކުވެސް ދައުލަތަށް ލިބޭ އާމްދަނީ ދެމެހެއްޓެނެވި މިންގަނޑެއްގައި ހިފަހެއްޓޭނެކަން ކަށަވަރުކުރުންކަން ފާހަގަކުރައްވަމުން ސައީދު ވިދާޅުވީ 2025 ވަނަ އަހަރު ދައުލަތަށް ޓެކުހުގެ ގޮތުގައި ލިބުނު އާމްދަނީ 13 އިންސައްތަ އިތުރުވުމަކީ މި ސިޔާސަތުގެ ކާމިޔާބުކަމުގެ ހެއްކެއް ކަަމަށެވެ. 

ކޮންމެ އަހަރަކު ފޮރިން އެކްސްޗޭންޖުގެ ތެރެއިން، އުފެެއްދުންތެރިކަމަށް ހިއްސާނުކުރާ ތަކެތި އެތެރެކުރުމުގައި ރާއްޖެއަށް 1.8 ބިލިއަން ރުފިޔާ ގެއްލެމުންދިޔަކަން ފާހަގަކުރައްވައި ސައީދު ވިދާޅުވީ އެ ފައިސާ އަނބުރާ އިގުތިސާދުގެ ތެރެއަށް ގެނެވޭ ގޮތަށް ސިޔާސަތު ބައްޓަންކުރެވުމުން ރާއްޖޭގެ ފޮރިން އެކްސްޗޭންޖު ހާލަތު ރަނގަޅުކުރެވި ބޭރު ފައިސާގެ ރިޒާވް ތިޔާގިކުރެވުނު ކަމަަށެވެ. 

އިންސާނީ ވަސީލަތްތައް ތަރައްގީކުރުމާއި ހިމާޔަތްކުރުމަށް ސަރުކާރުން އެޅި ފިޔަވަޅުތަކުގެ ތެރެއިން މަސައްކަތްތެރިންގެ ދުޅަހެޔޮކަން ކަށަވަރުކުރުމުގެ ސިޔާސަތުތަކަކީ އެކަމުގެ ސަބަބުން އިގުތިސާދުން ގެއްލޭ ފުރުސަތުތައް މަދުކޮށް، އުފެއްދުންތެރިކަމަށް ކުރިމަތިވާ އުނިކަންކަން މަދުކޮށް، މަސައްކަތްތެރިން މަސައްކަތުގައި ހޭދަކުރާ ވަގުތު އިތުރުކޮށްދޭ ކަންކަން ކަމުގައި ސައީދު ފާހަގަކުރެއްވިއެވެ. 

ސައީދު ފާހަގަކުރެއްވި ގޮތުގައި އައިލާ މަޝްރޫއުގެ ތަރައްގީގެ މޮޑެލްގެ ތެރޭގައި ޒަމާނީ ސިއްހީ ވަސީލަތްތަކާއި، ތައުލީމީ މުއައްސަސާތައް ގާއިމުކުރުމާއި، ދެމެހެއްޓެނެވި ދަނޑުވެރިކަމުގެ ވަސީލަތްތައް ހިމަނާފައިވަނީ ބޮޑެތި އިންވެސްޓުމެންޓުތަކުން މުޖުތަމައަށް މަންފާކުރާނެކަން ކަށަވަރުކުރުމުގެ މަގުސަދުގައެވެ. އަދި ސަރުކާރުގެ ވިސްނުމަކީ މިފަދަ ބޮޑު ކޮންމެ އިންވެސްޓުމެންޓަކުން ދިވެހި މުޖުތަމައަށް ފައިދާވާނެކަން ޔަގީންކުރުން ކަމަށް ވަޒީރު ވިދާޅުވިއެވެ. 

ކުރީގައި އޮތް އިންވެސްޓުމެންޓު މާހައުލަކީ ސިޔާސަތުގެ ކަށަވަރުކަމެއް ނެތުމުން އިންވެސްޓަރުން އިންވެސްޓުކުރަން ޖެހިލުންވި މާހައުލެއް ނަމަވެސް، ރައީސް ޑރ.މުޢިއްޒުގެ ވިސްނުންފުޅާ އެއްގޮތަށް ޒަމާނީ އިންވެސްޓުމެންޓު އޮނިގަނޑެއް އެކުލަވައިލާ، އެސްއީޒެޑް މަފުހޫމު ޒަމާނާ އެކަށޭނެ ގޮތަށް ފުރިހަމަކޮށް އެ އޮނިގަނޑަށް އަމަލުކުރަން ފެށިކަން ވަޒީރު ފާހަގަކުރެއްވިއެވެ. 

"މިސިޔާސަތުތަކަކީ ހަމައެކަނި ދައުލަތުގެ އާމްދަނީ އިތުރުކުރުމަށް އަމާޒުކުރެވިފައިވާ ސިޔާސަތުތަކެއް ނޫން. އެސްއީޒެޑް ގާނޫނުގެ ދަށުން ދޭ އިންސެންޓިވްތަކަކީ ވަކި އަމާޒުތަކެއް ކަނޑައަޅައި، ވަކި ޝަރުތުތަކެއް މަތިކޮށް، ވަގުތުގެ އިމުގެ ތެރޭގައި ކަންކަން ކުރުން ލާޒިމުކޮށް ދޭ އިންސެންޓިވްތަކެއް،" ސައީދު ވިދާޅުވިއެވެ. 

ސައީދު ވިދާޅުވި ގޮތުގައި އެސްއީޒެޑް އޮނިގަނޑުގެ ތެރެއިން ފޯރުކޮށްދޭ ލުއިތަކަކީ ލުއި ލިބޭ މަޝްރޫއުތަކުގެ ތެރެއިން މުޖުތަމައަށް އިގުތިސާދީ އަދި އިޖުތިމާއީ ފައިދާ ލިބޭނެކަން ކަށަވަރުވާ ގޮތަށް ދެވޭ ލުއިތަކެކެވެ. 

އޭނާ އިތުރަށް ވިދާޅުވީ މިއަދު ބޭރުގެ އަމިއްލަ ވިޔަފާރިއަކުން 800 މިލިއަން ޑޮލަރާ ގާތްކުރާ މިންވަރުގެ ބޮޑު އިންވެސްޓުމެންޓެއްގެ މަސައްކަތް ފަށާކަމީ ރައީސް ތަންފީޒުކުރެއްވި އިގުތިސާދީ މާލީ ސިޔާސަަތުތަކުގެ ތެރެއިން ރާއްޖެއަށް އިންވެސްޓަރުންގެ އިތުބާރު ލިބިފައިވާ ކަމުގެ ހެއްކެއް ކަމަށެވެ. 

މި މަޝްރޫއުގެ ސީއީއޯ  ޕެޓާ ކަރސްޓިކް ފާހަގަކުރެއްވި ގޮތުގައި މިހާރު ރާއްޖޭގައި އޮތީ ވިޔަަފާރިއަށް ފަހި ވަރަށް އިތުބާރު ހިފޭ، ޒަމާނީ އިންވެސްޓުމެންޓު މާހައުލެކެވެ. އަދި ރާއްޖެއަކީ ޒިންމާދާރުކަމާއެކު ބޮޑެތި އިންވެސްޓުމެންޓު ކުރުމަށް އެކަށީގެންވާ ގައުމެއް ކަމުގައި އޭނާ ފާހަގަކުރެއްވިއެވެ.