ފާއިތުވި އަހަރުގެ ނޮވެންބަރު މަހު ޒަކާތު ފަންޑުން ފަގީރުންނާއި މިސްކީނުންގެ ބޭސްފަރުވާއަށް 1.5 މިލިއަން ރުފިޔާ ދޫކޮށްފައިވާކަން އެ ފަންޑު މެނޭޖުކޮށް ބަލަހައްޓާ ދިވެހިރާއްޖޭގެ ޒަކާތު ހައުސްއިން ބުނެފިއެވެ. 

އެ އިދާރާއިން އާއްމުކޮށްފައިވާ ތަފާސްހިސާބުތަކަށް ބަލާއިރު ޒަކާތު ހައުސްއިންވަނީ ނޮވެންބަރު މަހު ޒަރޫރީ ކަންކަމުގައި އެހީޓެރިކަން ބޭނުންވި މީހުންނަަށް 84،200 ރުފިޔާ ދޫކޮށްފައެވެ. އަދި އިތުރު 53،750 ރުފިޔާގެ އެހީ ދޫކުރުމަށް ނޮވެންބަރު މަހުގައި ހަމަޖެހުނެވެ. 

ނޮވެންބަރު މަހު 165 މީހަކަށް ޒަކާތު ހައުސްއިން ބޭސްފަރުވާއަށް އެހީ ދޫކުރިއެވެ. އެ މީހުންނަށް ޖުމްލަ 1،513،656.86 (އެއް މިލިއަން ފަސްލައްކަ ތޭރަހާސް ހަސަަތޭކަ ފަންސާސް ހަ) ރުފިޔާ ދޫކޮށްފައިވެއެވެ. އެންމެ ގިނައިން އެއް ބައްޔެއްގެ ފަރުވާއަށް އެހީވެފައިވަނީ ކެންސަރުގެ ފަރުވާއަށެވެ. 

އެގޮތުން ކެންސަރު ބަލީގެ ފަރުވާއަށް އެހީވުމަށް 449،493 ރުފިޔާ އަދި ހިތުގެ ބަލިތަކުގެ ފަރުވާއށް 63،607.50 ރުފިޔާ އަދި ޓްރާންސްޕްލާންޓު ހެދުމަށް 50،886 ރުފިޔާ އަދި ސިކުނޑީގެ ބަލިތަކުގެ ފަރުވާއަށް 50،886 ރުފިޔާ ދޫކޮށްފައިވެއެވެ. 

ފުއްޕާމޭގެ ބަލިތަކުގެ ފަރުވާއަށް އެހީވުމަށްް 25،443 ރުފިޔާ އަދި ކިޑްނީ ބަލިތަކުގެ ފަރުވާއަށް އެހީތެރިވުމަށް 33،924 ރުފިޔާ އަދި އެހެނިހެން ބަލިތަކުގެ ފަރުވާއަށް އެހީގެ ގޮތުގައި 796،320.25 ރުފިޔާ ދޫކޮށްފައިވާކަމަށް ޒަކާތު ހައުސްއިން ބުނެއެވެ. 

ރާއްޖެއާއި ރާއްޖެއިން ބޭރުގައި ދިރިއުޅެނިކޮށް ހާލުގައި ޖެހި އެ ހާލަތުން ސަލާމަތްވުމަށް އިބްނުސަބީލުގެ ބައިން 69،165.08 ރުފިޔާ ނޮވެންބަރު މަހު ހޭދަވިއިރު ފީސަބީލިއްލާހި ބައިން ކީރިތި ގުރުއާނުގެ އިލްމު ފެތުރުމަށް 1،034،671 (އެއް މިލިއަން ތިރީސް ހަތަރުހާސް ހަސަތޭކަ ހަތްދިހަ އެއް) ރުފިޔާވަނީ ހޭދަކޮށްފައެވެ. 

އަދި މަތީ ތައުލީމު ހާސިލުކުރުމަށް އެހީތެރިވުމަށް ނޮވެންބަރު މަހު ޒަކާތު ފަންޑުން 100،398.93 ރުފިޔާ ދޫކުރިއެވެ. އަދި ދީނީ އެކި ޕްރޮގުރާމުތައް ހިންގުމަށް 353،218.23 ރުފިޔާ ބޭނުންކޮށްފައިވެއެވެ. 

ޒަކާތު ހައުސް ގާއިމުކުރި ފަހުން ޒަކާތުގެ ގޮތުގައި ދައުލަތަށް ލިބޭ ފައިސާ ރެކޯޑު މިންވަރަކަށް އިތުރުވެފައިވާއިރު، ޒަކާތުގެ ނިޒާމު ހަރުދަނާކުރުމަށް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި ޒަކާތުގެ ގާނޫނު އެ މަޖިލީހުން ފާސްކޮށް ތަސްދީގުކުރެވި އަމަލުކުރަން ފެށިފައިވާއިރު، މި ގާނޫނާއެކު ރާއްޖޭގެ ޒަކާތުގެ ނިޒާމަކީ މިހާރު އިސްލާމީ ގައުމުތަކުގައި އަމަލުކުރެވެމުންދާ ނިޒާމުތަކުގެ ތެރެއިން އެންމެ ޒަމާނީ އަދި އެންމެ ހަރުދަނާ އެއް ނިޒާމަށްވާނެ ކަމުގައި އިސްލާމިކް މިނިސްޓަރ ޑރ.މުޙައްމަދު ޝަހީމް ޢަލީ ސަޢީދު ވިދާޅުވެފައިވެއެވެ.