މަރުކަޒީ ބޭންކުން ތައާރަފުކޮށްފައިވާ އިންކްލޫސިވް ނޭޝަނަލް އެފޯޑަބަލް ހައުސިން ސްކީމުގެ ދަށުން ބޭންކް އޮފް މޯލްޑިވްސްއިން ތަރައްގީކުރާ 3،200 ހައުސިން ޔުނިޓު ގާއިމުކުރުމުގެ މަސައްކަތުގެ ދަށުން ފަސް މަޝްރޫއެއް ފަށައިފިއެވެ. 

މިއަދު ހުޅުމަލޭގައި މި މަޝްރޫއުތަކުގެ އަމަލީ މަސައްކަތް ފެށުމަށް ބޭއްވި ހާއްސަ ރަސްމިއްޔާތުގައި  މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓަރަކްޗަރ ޑރ. ޢަބްދުﷲ މުއްޠަލިބާއި، ބީއެމްއެލްގެ ޗެއާޕަރސަން އަޙްމަދު ޢަލީ ޙަބީބާއި، ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ބައިވެރިވެވަޑައިގެންނެވިއެވެ. 

މި މަޝްރޫއުތަކަކީ އެމްއެމްއޭއިން ތައާރަފުކޮށްފައިވާ އިންކްލޫސިވް ނޭޝަނަލް އެފޯޑަބަލް ހައުސިން ސިޔާސަތުގެ ދަށުން ބީއެމްއެލްއިން ކުރިއަށްގެންދާ މަޝްރޫއުތަކެކެވެ. މި މަޝްރޫއުތައް ކުރިއަށްގެންދަނީ ، އެމްއެމްއޭގެ އިންކްލޫސިވް ނެޝަނަލް އެފޯޑަބަލް ހައުސިންގ ސްކީމްގެ ދަށުން ގާއިމުކޮށްފައިވާ ގަވަރނަންސް އަދި ރިސްކް ސްޓޭންޑަރޑްތަކާ އެއްގޮތަށް ގެންދިޔަ އިވެލުއޭޝަން މަރުހަލާ ފުރިހަމަކުރުމަށް ފަހު ހޮވުނު ރާއްޖެއާއި ރާއްޖެއިން ބޭރުގެ ކުންފުނިތަކާ ހަވާލުކޮށްގެންނެވެ. 

ބީއެމްއެލް އެފޯޑަބަލް ހައުސިން މަޝްރޫއުތައް ފެށުމުގެ ރަސްމިއްޔާތުގެ ތެރެއިން، ފޮޓޯ: ބީއެމްއެލް

އެގޮތުން ރާއްޖޭގެ ތިން ކުންފުންޏަކާ މި މަޝްރޫއުގެ ދަށުން ބައެއް ހައުސިން ޔުނިޓުތައް އެޅުން ހަވާލުކޮށްފައިވެއެވެ. އެއީ އަމީން ކޮންސްޓްރަކްޝަން ޕްރައިވެޓް ލިމިޓެޑާއި، އެފްޑަބްލިއު ކޮންސްޓްރަކްޝަން ޕްރައިވެޓް ލިމިޓެޑް އަދި ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑްއެވެ. އަދި ޗައިނާގެ ދެ ކުންފުނިކަމަށްވާ ބެއިޖން އާބަން ކޮންސްޓްރަކްޝަން އަދި ޗައިނާ މެޝިނަރީ އިންޖިނިއަރިން ކޯޕަރޭޝަންއާވެސް މި މަޝްރޫއުގެ ދަށުން ބައެއް ހައުސިން ޔުނިޓުތައް ގާއިމުކުރުމުގެ މަސައްކަތް ހަވާލުކޮށްފައިވެއެވެ. 

ބީއެމްއެލްއިން ބުނި ގޮތުގައި މި މަޝްރޫއުތައް ނިމޭއިރު ހުޅުމާލޭ ފުރަތަމަ ފިޔަވައްސާއި ތިންވަނަ ފިޔަވަހީގެ އިތުރަށް ވިލިމާލޭގައި 3،200 އަށްވުރެ ގިނަ ހައުސިން ޔުނިޓު ގާއިމުކޮށް ނިމޭނެއެވެ. މިތަންތަން ދޫކުރަނީ ކުލީގެ ގޮތުގައި ތަންތަނުގެ އަގު ދައްކަައި ހަލާސްކުރުމުން މިލްކުކުރެވޭ ގޮތަށް، ނިސްބަތުން ކުޑަ ކުއްޔެއްގައެވެ. މި މަޝްރޫއުތަކުގެ ސަބަބުން ރާއްޖޭގައި ގެދޮރު ހޯދުމަށް އޮތް ޑިމާންޑަށް ލުއިތަކެއް ލިބޭނެ ކަމުގައި ބީއެމްއެލްއިން ބުނެފައިވެއެވެ. 

މި ފަސް މަޝްރޫއު ފެށުމަކީ، ބޭންކް އޮފް މޯލްޑިވްސް އާއި ބީއެމްއެލް އެފޯޑަބަލް ހޯމް ލީސިންގ ކޮމްޕެނީން ބޯހިޔާވަހިކަމުގެ ގައުމީ ސްޓްރެޓެޖިކް އަމާޒުތަކަށް އެއްބާރުލުންދީ، ރާއްޖޭގެ ސިނާއަތްތަކުގެ ބައިވެރިވުން އިތުރުކުރުމަށާއި، އަދި އެމްއެމްއޭގެ ކަނޑައަޅާފައިވާ އުސޫލުތަކާ އެއްގޮތްވާ ގޮތުގެ މަތިން، ދެމެހެއްޓެނިވި މާލީ ނިޒާމެއްގެ ތެރެއިން ހެޔޮ އަގެއްގައި އަމިއްލަ ބޯހިޔާވަހިކަން ހޯދައި، ގެދޮރުވެރިންނަށްވުމުގެ ފުރުސަތު ފަހިކޮށްދިނުމަށް ދޭ  އަހައްމިއްޔަތު ދައްކުވައިދޭ ކަމެއް ކަމުގައި އެ ބޭންކުން ބުނެފައިވެއެވެ.