ހދ. ކުޅުދުއްފުށީ ރީޖަނަލް ހޮސްޕިޓަލްގައި ޕްރައިވެޓް ރޫމް ފެސިލިޓީއެއް އެޅުމަށް އަލްޓެކް މޯލްޑިވްސް ޕްރައިވެޓް ލިމިޓެޑާ ހަވާލުކޮށްފިއެވެ. 435 ދުވަހުގެ ތެރޭގައި ނިންމާގޮތަށް މިމަސައްކަތް ހަވާލުކޮށްފައިވަނީ 53.5 މިލިޔަން ރުފިޔާއަށެވެ. މިއީ ގައިންގަޔަށް އަރާބަލިތަކުގެ މީހުން އެކަހެރިކޮށް ބޭތިއްބޭގޮތަށް ތަރައްޤީކުރާ ފެސިލިޓީއެކެވެ.

މިކަމަށްޓަކައި ސިއްޙީ ވުޒާރާގައި ބޭއްވި ރަސްމިއްޔާތުގައި މި އެއްބަސްވުމުގައި ސޮއި ކުރެއްވީ މިނިސްޓަރ އޮފް ސްޓޭޓް ފޮރ ހެލްތު ޚަދީޖާ ޢަބްދުއްޞަމަދު ޢަބްދުﷲއެވެ. އަދި އަލްޓެކް މޯލްޑިވްސްގެ ފަރާތުން ސޮއި ކުރެއްވީ ޖެނެރަލް މެނޭޖަރ، ހުސައިން ތަސްމީންއެވެ. މި ރަސްމިއްޔާތުގައި ސިއްޙީ ވަޒީރު ޢަބްދުﷲ ނާޒިމް އިބްރާހީމްވެސް ބައިވެރިވެވަޑައިގެންނެވިއެވެ.

މި މަޝްރޫޢުއަށް ފަންޑުކޮށްފައިވަނީ އޭޝިއަން އިންފްރާސްޓްޗަރ އިންވެސްޓްމަންޓް ބޭންކް (އޭ.އައި.އައި.ބީ) އިންނެވެ. މިއީ މިބޭންކުން ރާއްޖޭގައި ކުރިޔަށްގެންދާ ފުރަތަމަ ސްޓޭންޑް އެލޯން ޕްރޮޖެކްޓެވެ.

ކުޅުދުއްފުށީ ރީޖަނަލް ހޮސްޕިޓަލަކީ ގްރޭޓަރ މާލެ ސަރަހައްދު ފިޔަވައި، ރާއްޖޭގައި އެންމެ ގިނައިން ބަލިމީހުންނަށް ޚިދުމަތްދޭ ހޮސްޕިޓަލެވެ. އެ ހޮސްޕިޓަލުން ހއ، ހދ، އަދި ށ އަތޮޅުގެ ރައްޔިތުންނަށް ޚިދުމަތް ދެމުންދެއެވެ. އަދި މި އަތޮޅުތަކުގެ ބޭރުންވެސް، އެހެނިހެން އަތޮޅުތަކުގެ ރައްޔިތުންވެސް ޚިދުމަތް ހޯދުމަށް ކުޅުދުއްފުށި ހޮސްޕިޓަަލަށް ބަރޯސާވެއެވެ. ކުޅުދުއްފުށީ ރީޖަނަލް ހޮސްޕިޓަލްގައި އެކިދާއިރާއިން ސްޕެޝަލިސްޓް ޚިދުމަތާއި، ސުޕަރ ސްޕެޝަލިސްޓްގެ ޚިދުމަތްވެސް ދެމުންދެއެވެ. އަދި އެކި ވައްތަރުގެ ސާރޖަރީ ހެދުމުގެ ޚިދުމަތްވެސް ފޯރުކޮށްދެއެވެ.

މިވަގުތު އެހޮސްޕިޓަލުގައި ބަލިމީހުން އެޑްމިޓް ކުރަންޖެހިއްޖެ ހާލަތެއްގައި އެޑްމިޓްކުރަންޖެހެނީ ވޯރޑްގައެވެ. އެކި ރަށްރަށުން ދަތުރުކޮށްފައި ޚިދުމަތްހޯދުމަށް ދާ ބަލިމީހުން ވޯރޑްގައި އެޑްމިޓްކޮށްގެން ދިގު މުއްދަތަކަށް ހިދުމަތްދޭންޖެހޭ ހާލަތްތަކުގައި އެހީތެރިޔާއަށްވެސް އަދި ބަލިމީހާއަށްވެސް އެކި ދަތިތަކާ ކުރިމަތިވާކަމުގެ ކަންބޮޑުވުން އަބަދުވެސް އޮވެއެވެ. ސިއްޙި ވުޒާރާއިން ބުނީ، ބަލިމީހާގެ އެހީތެރިޔާއަށްވެސް އޮށޯވެލެވޭނެގޮތް ނުވެވުމާއި، ބައެއް ހާލަތްތަކުގައި ރަށުން ތަންތަން ކުއްޔަށް ހިފަންޖެހުން ފަދަ ކަންކަމުގެ ކަންބޮޑުވުން ރައްޔިތުންގެ އޮންނަކަމަށެވެ. ހާއްސަ ބޮޑެތި ސާރޖަރީތައް ހަދައިގެން މަޑުކުރަންޖެހޭ ހާލަތްތައްވެސް ދިމާވުމަކީ ރައްޔިތުންނަށް އޮތް ދަތިކަމެއްގެގޮތުގައި ސިއްޙީ ވުޒާރާއިން ފާހަގަކުރެއެވެ.

މީގެ އިތުރުން ކޮވިޑް-19 ނުވަތަ އެނޫންވެސް ގައިންގަޔަށް އަރާ ބަލިތަކުގެ ހާލަތްތަކުގައި، ބަލިމީހާ އެކަހެރިކުރުން ނުވަތަ އައިސޮލޭޓް ކުރެވޭނެ ހިދުމަތްވެސް އެހޮސްޕިޓަލުގައި މިވަގުތު ނެތެވެ. ކުޅުދުއްފުށީ ރީޖަނަލް ހޮސްޕިޓަލަކީ މެޑިސިން ކިޔަވާ ކުދިންގެ ކޮމިއުނިޓީ މޮޑިއުލްސް އަދި މިނޫންވެސް ސިއްޙީދާއިރާގެ އެތައް ތަމްރީންތަކެއް ގެންދާ މަރުކަޒެކެވެ. ނަމަވެސް، މިފަދަ ތަމްރީންތައް ގެންދިޔުމަށް ހޮސްޕިޓަލްގެ ކޮންފަރެންސް ރޫމް ނުވަތަ ސަރުކާރުގެ އެހެން މަރުކަޒެއްގެ ހޯލެއް ނުވަތަ ހޮސްޕިޓަލްގެ ބޭރުން ތަނެއް ކުއްޔަށްހިފައިގެން ކުރިޔަށް ގެންދާކަމަށް އެ ހޮސްޕިޓަލުން މަޢުލޫމާތުދެއެވެ. ކުޅުދުއްފުށި ހޮސްޕިޓަލްގެ ދަށުން އަތޮޅުތެރޭގެ މަރުކަޒުތަކުގެ މުވައްޒަފުންނާއެކު 700އަށްވުރެ ގިނަ މުވައްޒަފުން ބަލަހައްޓާއިރު، މުވައްޒަފުން ތަމްރީންކުރާނެ ރަނގަޅު ވަސީލަތްތަކެއްވެސް ނެތްކަން އެ ހޮސްޕިޓަލުން ފާހަގަކުރެއެވެ. އަދި ކޮމިއުނިޓީއާއިގުޅޭ މާސް ވޮރކްޝަޕްތައް ހިންގާނެ ޖާގަވެސް ނެތުމުގެ ސަބަބުން އެކަމަށްޓަކައި، ބޭނުންކުރަނީ ރަށުގެ ސްކޫލް ހޯލްފަދަ ތަންތަންކަމަށްވެސް އެ ހޮސްޕިޓަލުން ބުންޏެވެ.

ވުމާއެކު ސޮއިކުރި މި އެއްބަސްވުމުގެ ދަށުން ގާއިމްކުރާ ފެސިލިޓީގައި ފާޚާނާއާއެކު 14 ޕްރައިވެޓް ރޫމް ހުންނާނެއެވެ. މި 14 ކޮޓަރި ހުންނާނީ ބަލިމިހާގެ އިތުރަށް ބަލިމީހާގެ އެހީތެރިއާއާއެކު ހުރެވޭގޮތަށެވެ. މިކޮޓަރިތަކުގެ ތެރޭގައި މޮޑަރޭޓް ޕޭޝަންޓް، ކްރިޓިކަލް ޕޭޝަންޓް އަދި ޕޭޝަންޓް ވިތް ސްޕެޝިއަލް ނީޑްއަށް ހާއްސަކުރެވިގައިވާ ކޮޓަރި ހުންނާނެކަމަށް ސިއްޙީ ވުޒާރާއިން ބުންޏެވެ. އަދި ޑައިލިސިސް ރޫމް، އެމަރޖެންސީ ރޫމް، މެޑިކަލް ސްޓޯރ، ޖެނެރަލް ސްޓޯރ، ނާރސް ސްޓޭޝަންސް، އޮޓޯކްލޭވް ރޫމްސް، އެޑްމިން ރޫމް، ބްރީފިންގ ރޫމް، ޔުޓިލިޓީ ރޫމްސް، ޓީރޫމް، ޑޮނިންގް، ޑޮފިންގ އަދި ވަކިން ނަމާދު ކުރެވޭ ގޮތަށް ނަމާދު ކޮޓަރިއެއްވެސް މި މަޝްރޫޢުގައި ވަނީ ހިމަނާފައެވެ. މީގެ އިތުރަށް މިއިމާރާތުގެ ފުރަތަމަ ފަންގިފިލާގައި، މަލްޓިޕާރޕޯސްހޯލެއްވެސް ހުންނާނެކަމަށް ސިއްޙީ ވުޒާރާއިން ބުންޏެވެ.

އަލަށް ތަރައްޤީކުރާ ޕްރައިވެޓް ރޫމް ފެސިލިޓީއާއެކު، ރަށްރަށުންނާއި، އަތޮޅުތަކުގެ ރައްރަށުން ސިއްޙީ ޚިދުމަތް ހޯދުމަށް ދަތުރުކުރާ ފަރާތްތަކުން ހިދުމަތް ހޯދުމަށް މަޑުކުރަން ޖެހިއްޖެ ހާލަތެއްގައި އެހިދުމަތް ފަސޭހަކަމާއެކު ލިބޭނެކަމަށް ސިއްޙީ ވުޒާރާއިން ބުންޏެވެ. އަދި ގައިންގަޔަށް އަރާ ބަަލިތަތަކުގެ މީހުން، އާންމު ޚިދުމަތްތަކަށް ބުރޫ ނާރާނެހެން އައިސޮލޭޓް ނުވަތަ އެކަހެރިކޮށްގެން ޚިދުމަތް ދެވޭނެކަމަށްވެސް ސިއްހީީ ވުޒާރާއިން ބުންޏެވެ.

ސަރުކާރުން އަމާޒުހިފާފައިވަނީ ރައްޔިރުންނަށް ވީހާވެސްފަސޭހައިން ސިއްހީ ޚިދުމަތް ލިބޭނެ ނިޒާމެއް ޤާއިމްކޮށް، މާލެއަށް ބަރޯސާވުން ކުޑަކޮށް އަތޮޅުތަކުގައި ގާއިމްކުރެވިފައިވާ ސިއްޙީ ޚިދުމަތްދޭ ތަންތަނުގެ ހިދުމަތް އިތުރަށް ފުޅާކޮށް ފެންވަރު ރަނގަޅުކުރުމަށެވެ.