ސްޕެޝަލް އިކޮނޮމިކް ޒޯންތަކުގައި ހިންގޭނެ އިގުތިސާދީ ހަރަކާތްތަކާއި، އެއިން ސަރަހައްދެއްގައި އިންވެސްޓުކުރެވޭނެ އެންމެ ކުޑަ މިންވަރު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ކަނޑައަޅުއްވަައިފިއެވެ. 

މިއަދު ސަރުކާރުގެ ގެޒެޓުގައި މި އުސޫލުތައް ކަނޑައަޅުއްވައި ރައީސް ނެރުއްވި ރިޔާސީ ގަރާރުވަނީ ޝާއިއުކުރައްވާފައެވެ. ސްޕެޝަލް އިކޮނޮމިކް ޒޯނުގެ ގާނޫނުގެ ދަށުން އަހަރަކު އެއްފަހަރު އެސްއީޒެޑްގައި ހިންގޭނެ އިގުތިސާދީ ހަރަކާތްތަކާއި، އެފަދަ ޒޯނެއްގައި ހިމެނޭ ޖުމްލަ އިންވެސްޓުމެންޓުގެ އެންމެ ކުޑަމިންވަރު، އިންވެސްޓު ބޯޑުގެ މަޝްވަރާގެ މަތިން ކަނޑައެޅުއްވުމަކީ ރައީސް ކުރައްވަންޖެހޭ ކަމެކެވެ. 

އަދި މިގޮތަށް ކަނޑައަޅާ ކޮންމެ ކަނޑައެޅުމެއް މުރާޖައާކޮށް ކޮންމެ އަހަރެއްގެ ފްބްރުއަރީ މަހުގެ ކުރިން ރައީސުލްޖުމްހޫރިއްޔާގެ ގަރާރަކުން އިއުލާނުކުރުން އެ ގާނޫނުން ލާޒިމުކުރެއެވެ. 

ނިމުނު އަހަރުގެ ރިޔާސީ ގަރާރު މުރާޖައާކުރައްވައި ސަރުކާރުގެ ގެެޒެޓުގައި މިއަދު ޝާއިއުކުރެއްވި ރިޔާސީ ގަރާރުގައި ބުނެފައިވަނީ އެސްއީޒެޑްގައި ހިންގޭނީ ޖުމްލަ 100 މިލިއަން ޑޮލަރަށްވުރެ ކުޑަނޫން އަދަދުގެ އިންވެސްޓުމެންޓުތައް ކަމަަށެވެ. އަދި އެސްއީޒެޑްއެއްގައި ހިންގުމަށް ހުށަހަޅާ މަޝްރޫއަކީ ސަސްޓެއިނަބަލް ޓައުންޝިޕް ޑިވެލޮޕްމެންޓު މަޝްރޫއެއްނަމަ 500 މިލިއަން އެމެރިކާ ޑޮލަރަަށްވުރެ ކުޑަ ނޫން އަދަދެއް އިންވެސްޓުކުރަންޖެހޭނެ ކަމަށެވެ. 

100 މިލިއަން ޑޮލަރަށްވުރެ ކުޑަނޫން އިންވެސްޓުމެންޓެއްގެ ދަށުން އެސްއީޒެޑްއެއްގައި ހިންގިދާނެ އިގުތިސާދީ ހަރަކާތްތަކުގެ ގޮތުގައި އެ ގަރާރުގައި ބަޔާންކޮށްފައިވަނީ؛  

(ހ) އެކްސްޕޯޓަށް އިސްކަންދީގެން ހިންގާ މެނުފެކްޗަރިންގގެ އެކި ބާވަތުގެ މަސައްކަތްތައް.

(ށ) ޓްރާންސްޝިޕްމަންޓް ޕޯޓް، އިންޓަރނޭޝަނަލް ލޮޖިސްޓިކްސް، ޕޯޓް، އެއަރޕޯޓް،ބަލްކް ބްރޭކިންގ، ބަންކަރިންގ، ޑޮކިންގ ސަރވިސަސް.

(ނ) ޔުނިވަރސިޓީ، ޓާޝަރީ ހޮސްޕިޓަލް، ސްޕެޝަލިޓީ ހޮސްޕިޓަލް، ދުނިޔޭގެ ފެންވަރުގެ ރިސަރޗް އެންޑް ޑިވެލޮޕްމަންޓް ފެސިލިޓީތައް.

(ރ) ދުނިޔޭގެ ފެންވަރުގެ އިންފޮމޭޝަން ކޮމިއުނިކޭޝަން ޓެކްނޮލޮޖީ (އައި.ސީ.ޓީ) ޕާކް، އައި.ސީ.ޓީއާ ގުޅޭ ފެސިލިޓީތައް.

(ބ) އިންޓަރނޭޝަނަލް ފައިނޭންޝަލް ސަރވިސަސް، އިންޓަނޭޝަނަލް ޓްރޭޑް ސެންޓަރުތައް.(ޅ) އިޢާދަކުރަނިވި ހަކަތައިގެ ދާއިރާ.

(ކ) ރާއްޖޭގައި ނެތް ޓެކްނޮލޮޖީއެއް ރާއްޖެއަށް އާންމުކުރުމަށް ހިންގޭ މަސައްކަތްތައް.

(އ) ފުޑް ސެކިއުރިޓީގެ ދާއިރާ.(

ވ) ތެލާއި، ގޭހާއި، މިނަރަލް އެކްސްޕްލޮރޭޝަންގެ މަސައްކަތްތައް.  

އިތުރަށް ގަރާރުގައި ބުނެފައިވަނީ 500 މިލިއަން ޑޮލަރަށްވުރެ ކުޑަނޫން އަދަދެއްގެ އިންވެސްޓުމެންޓު ހިމެނޭ ގޮތަށް ތަރައްގީކުރުމަށް ހުށަހަޅާ ސަސްޓެއިނަބަލް ޓައުންޝިޕް ޑިވެލޮޕްމެންު މަޝްރޫއުތަކުގައި އެންމެ ކުޑަ އިންވެސްޓުމެންޓުގެ ގޮތުގައި ކަނޑައަޅާފައިވާ 500 މިލިއަން ޑޮލަރު ހާއްސަކުރަންޖެހޭނީ ސަސްޓެއިނަބަލް ޓައުންޝިޕް ޑިވެލޮޕްމަންޓުގެ ކޮމްޕޯނަންޓް ތަކަށް  ކަމުގައެވެ. 

އެސްއީޒެޑްގެ ގާނޫނުގެ ދަށުން އިއާދަކުރަނަވި ހަކަަތައިން ކަރަންޓު އުފެއްދުމުގެ ބޮޑު މަޝްރޫއެއް ހިންގުމަށް ކެނަޑާ ކުންފުންޏަކާ ހަވާލުކޮށްފައިވާއިރު، އެ ގާނޫނުގެ ދަށުން ރާއްޖޭގައި ތަރައްގީކުރާ ފުރަތަމަ ސަސްޓެއިނަބަލް ޓައުންޝިޕްގެ މަސައްކަތް ނ.އަތޮޅުގައި ކުރިއަށްގެންދިއުމުގެ މަސައްކަތް މިހާރުވަނީ ހަވާލުކޮށްފައެވެ.