ރާއްޖޭގެ ޓޫރިޒަމް ސިނާއަތުގެ އެއް ބާނީ އަދި އެންމެ ކާމިޔާބު ދިވެހި ވިޔަފާރީގެ ތެރޭގައި ޔުނިވާސަލްގެ ވެރިޔާ، މުހައްމަދު އުމަރު މަނިކު (އެމްޔޫ މަނިކު) އަވަހާރަވެއްޖެ އެވެ.

އެމަނިކުފާނު އަވަހާރަވީ އާލާސްކަންފުޅު ބޮޑުވެ ސިންގަޕޫރުގެ މައުންޓް އެލިޒަބެތް ހޮސްޕިޓަލުގައި ފަރުވާ ދެމުން ދަނިކޮށެވެ. އަވަހާރަވީއިރު އުމުރުފުޅަކީ 78 އަހަރެވެ.

ދިވެހީންގެ ވައިގެ ބަނދަރު ތަރައްޤީ ކުރުމުގައި މުހިންމު ދައުރެއް އަދާކުރެއްވި އަދި އެއަރޕޯޓް ހިންގާ އެމްއޭސީއެލްގެ ވަރަށް އިސް މަޤާމުތަކެެއް ފުރުއްވި އެމްޔޫ މަނިކަކީ ރާއްޖޭގައި ޓޫރިޒަމް ސިނާއަތް 1972 ވަނަ އަހަރު ފެށިގެން އައިއިރު، އެ މަސައްކަތްޕުޅުގައި އެންމެ އިސްކޮށް ހަރަކާތްތެރިވެ ވަޑައިގެންނެވި ބޭފުޅުންގެ ތެރޭގައި ހިމެނިވަޑައިގަންނަވާ ޓޫރިޒަމްގެ ވަރަށް ބޮޑު ޚިދުމަތްތެރި އެކެވެ.

ޓޫރިޒަމްގެ ދާއިރާއިން ޝަރަފުވެރިކަމުގެ ޤައުމީ އިނާމު ވެސް ލިބިވަޑައިގެންފައިވާ މަނިކުގެ ޔުނިވާސަލްއަކީ ޓޫރިޒަމްގެ އެންމެ ކާމިޔާބު އެއް ކުންފުންޏެވެ.

މަނިކުގެ އިސްނެންގެވުމަށް އެ ކުންފުނީގެ ދަށުން ޔުނިވާސަލް ފައުންޑޭޝަން އުފައްދަވާ އެތައް ބަޔަކަށް ވަނީ ބޭރު ޤައުމުތަކުން މަތީ ތަޢުލީމް ހާސިލުކުރުމުގެ ފުރުސަތު ވެސް ތަނަވަސް ކޮށް ދެއްވާފަ އެވެ.