މިހާރު ކުރިއަށްދާ އައިޓީއެފް މޯލްޑިވްސް ޖޫނިއާ އޯޕަން ޖޭ30 ގެ އަންހެން ޑަބަލްސް އިވެންޓުގެ ފައިނަލުން ރާއްޖޭގެ އާރާ އާސަލް އާޒިމް ޖާގަ ހޯދިއިރު، ސިންގަލްސް ބައިގެ ސެމީ ފައިނަލަށް ނަބާ ނިޝާން ދަތުރުކޮށްފިއެވެ.

މުބާރާތުގެ ޑަބަލްސްގެ ސެމީގައި އާރާ ވަނީ، ތައިލެންޑްގެ ޓަރީޓާ ހޮންގޔޮކް އާއެކު ފްރާންސްގެ އެވާ ވްލާޑާ އާއި އެލިޒަވެޓާގެ ޕެއާގެ މައްޗަށް ސީދާ ދެ ސެޓުން ކުރިހޯދާފައެވެ. އާރާ އާއި ޓަރީޓާގެ ޕެއާ މި މެޗު ކާމިޔާބުކުރީ 6-1، އާއި 6-3 އިންނެވެ.

ޑަބަލްސްގައި ކާމިޔާބު ލިބުނުނަމަވެސް، ސިންގަލްސް އިވެންޓްގެ ކުއާޓާގައި އާރާ އަށް ކުރިމަތިވީ ނާކާމިޔާބީ އެވެ. މިއަދު ކުޅުނު މެޗުގައި ކަޒަކިސްތާންގެ ޓަމާރާ އެރްމަކޯވާ އަތުން އާރާ ބަލިވީ 2-1 ސެޓުންނެވެ. މި މެޗުގެ ސެޓުތައް ޓަމާރާ ގެންދިޔައީ، 7-5، 6-7، އަދި 6-2 އިންނެވެ.

މުބާރާތުގެ ސިންގަލްސް ކުއާޓާ ފައިނަލުގައި ރާއްޖޭގެ ނަބާ ވަނީ 2-1 ސެޓުން އިނގިރޭސިވިލާތުގެ ޝާލޮޓް ޕާކްސް ބަލިކޮށްފައެވެ. ގާތްގަނޑަކަށް 2 ގަޑިއިރާއި 41 މިނެޓަށް ދިގުދެމިގެންދިޔަ މި މެޗުގެ ސެޓުތައް ނަބާ ގެންދިޔައީ، 4-6، 6-3، އަދި 6-4 އިންނެވެ.

މި މުބާރާތުގައި ހުކުރު ދުވަހު ކުޅޭ މެޗުތަކަށް ބަލާއިރު، ސިންގަލްސް އިވެންޓްގެ ސެމީގައި ހެނދުނު ރާއްޖޭގެ ނަބާ ނިކުންނާނީ ތައިލެންޑްގެ ޓަރީޓާއާ ދެކޮޅަށެވެ. މެންދުރު ފަހު ކުޅޭ މެޗުގައި ޑަބަލްސް ފައިނަލުގައި އާރާ އާއި ޓަރީޓާގެ ޕެއާ ބައްދަލުކުރާނީ ދެކުނު ކޮރެއާގެ ސެއުންގޔުން ޗޯ އާއި ޗައިނާގެ ޔިޝާން ޒޫ އާ އެވެ.

މި މަހުގެ 16 އިން 30 ގެ ނިޔަލަށް މާލޭ ޓެނިސް ކޯޓުގައި ކުރިއަށްދާ މުބާރާތުގެ ފުރަތަމަ ހަފްތާގެ ޑަބަލްސް ޗެމްޕިއަންކަން ހޯދީ ވެސް އާރާ އާއި ޓަރީޓާގެ ޕެއާ އެވެ. އެ މެޗުގައި ވެސް އެ ދެ ކުޅުންތެރިން މޮޅުވީ ޗައިނާގެ ޕެއާ އަތުންނެވެ. މި ފަހަރުގެ މުބާރާތުގައި ރާއްޖޭ ހިމެނޭ ގޮތަށް މުޅިއެކު 24 ޤައުމަކުން ވާދަކުރެއެވެ.

ރާއްޖޭގައި އެންމެފަހުން މިދިޔަ އަހަރު ބޭއްވީ ޖޫނިއާ ދެ މުބާރާތް ކަމަށްވާ، އޭޓީއެފް މޯލްޑިވްސް އޯޕަން އާއި އޭޓީއެފް މޯލްޑިވްސް ޖޫނިއާ އޯޕަންގައި ދިވެހި ކުޅުންތެރިން ވަނީ ރަނގަޅު ކާމިޔާބީއެއް ހާސިލްކޮށްފައެވެ.