ENGLISH
30 އޯގަސްޓު 2025
ލައިބާ، ޖޯޖިއާ މުބާރާތުގެ ޑަބަލްސް އިވެންޓުން ރިހި މެޑެލް ހޯދައިފި
24 އޯގަސްޓު 2025
|
ބަޓޫމީ ކަޕްގެ މެޑެލް ދިނުމުގެ ރަސްމިއްޔާތުގެ ތެރެއިން. --ފޮޓޯ: އިޔާން
ޖޯޖިއާގައި ކުރިއަށްދިޔަ، "ބަޓޫމީ ކަޕް ޔޫތު އިންޓަރނޭޝަނަލް 2025" ގައި ރާއްޖޭގެ ލައިބާ އަހުމަދު މަހުލޫފް (އެލީ) ޑަބަލްސް އިވެންޓުން ރިހި މެޑެލް ހޯދައިފިއެވެ.
މި މަހުގެ 22 އިން 24 ގެ ނިޔަލަށް ޖޯޖިއާގެ ބަޓޫމީ ސިޓީގައި ކުރިއަށްދިޔަ މުބާރާތުގައި، ލައިބާ ވަނީ 13 އަހަރުން ދަށުގެ އުމުރުފުރައިގެ ޑަބަލްސް އިވެންޓުން ހޯދީ ރިހި މެޑެލްގެ އިތުރުން ސިންގަލްސް އަދި މިކްސްޑް ޑަބަލްސް އިވެންޓުން ލޯ މެޑެލް ހޯދައިފައެވެ.
ޖޯޖިއާގެ ޤައުމީ ބެޑްމިންޓަން ފެޑެރޭޝަނުން އިންތިޒާމްކޮށްގެން ކުރިއަށްދިޔަ މި މުބާރާތުގައި ޖޯޖިއާގެ އިތުރުން ތުރުކީ، ކަޒަކިސްތާން، އަރުމީނިއާ، ލެޓްވިއާ، އަޒަރުބައިޖާން އަދި ދިވެހިރާއްޖެ ހިމެނޭ ގޮތަށް ގިނަ ޤައުމުތަކެއް ވާދަކުރިއެވެ. އެގޮތުން، މި މުބާރާތުގައި އުމުރުން 11، 13 އަދި 15 އަހަރުން ދަށުގެ އުމުރުފުރައިގައި އަންހެން އަދި ފިރިހެން ކުޅުންތެރިން ހިމެނޭގޮތަށް 78 ކުޅުންތެރިން ވަނީ ބައިވެރިވެފައެވެ.
މުބާރާތުގެ މެޑެލް ދިނުމުގެ ރަސްމިއްޔާތުގެ ތެރެއިން. --ފޮޓޯ: އިޔާން
މުބާރާތުގެ އަންހެން ޑަބަލްސް އިވެންޓުގެ ފައިނަލުގައި ލައިބާ އާއި ޖޯޖިއާގެ ޝަޚްބަޒިއަން މަގްދާގެ ޕެއާ ބަލިވީ ކަޒަކިސްތާންގެ ޕެއާ އަތުންނެވެ. ވާދަވެރި ކުޅުމަކަށްފަހު އެ މެޗުން ކަޒަކިސްތާންގެ ޕެއާ މޮޅުވީ 15-13 އާއި 15-10 އިންނެވެ.
ސިންގަލްސް އިވެންޓްގެ ސެމީ ފައިނަލުގައި ލައިބާ ބަލިވީ ކަޒަކިސްތާންގެ 13 އަހަރުން ދަށުގެ އެއްވަނަ ބެޑްމިންޓަން ކުޅުންތެރިޔާ، ލެއޮނޯވާ ސޯފިއާ އަތުންނެވެ. ވާދަވެރި ކުޅުމެއް ފެނުނު މި މެޗުން ސޯފިއާ މޮޅުވީ 15-10 އާއި 15-12 އިންނެވެ.
މުބާރާތުގެ މެޑެލް ދިނުމުގެ ރަސްމިއްޔާތުގެ ތެރެއިން. --ފޮޓޯ: އިޔާން
މި މުބާރާތުގެ މިކްސްޑް ޑަބަލްސް ސެމީގައި ލައިބާ އާއި އަރުމީނިއާގެ މަނުކްޔަން ނާރެކްއާ ލައިބާގެ ޕެއާ އަށް ނާކާމިޔާބުވީ ތުރުކީގެ ޕެއާ އަތުންނެވެ. މި މެޗުން ތުރުކީގެ ޕެއާ މޮޅުވީ 15-7 އާއި 15-8 އިންނެވެ.
އެންމެފަހުން އެކުލަވާލި ޤައުމީ ބެޑްމިންޓަން ސްކޮޑުން ޖާގަ ހޯދާފައިވާ، ލައިބާ އަކީ ސަރުކާރުގެ "އަރުތަ" ޕްރޮގްރާމްގައި ހިމެނޭ އެތުލީޓެކެވެ. "އަރުތަ" ޕްރޮގްރާމަކީ، ދިވެހި ކުޅިވަރުގެ އާ ޖީލެއް ބިނާކުރުމާއި ބައިނަލްއަގުވާމީ ފެންވަރުގައި ދިވެހި ކުޅުންތެރިން ފައިތިލަ ސާބިތުކުރުމަށް މަގުފަހިކޮށްދިނުމުގެ ގޮތުން ކުރިއަށްގެންދާ ޕްރޮގްރާމެކެވެ.