ރާއްޖޭގެ ޖޫނިއާ ސްވިމިންގ ޓީމުން ފެތުމުގެ ޤައުމީ އިތުރު ތިން ރެކޯޑެއް އާކޮށްފިއެވެ.

ރުމޭނިއާގައި މިހާރު ކުރިއަށްދާ 10 ވަނަ ވޯލްޑް އެކުއަޓިކްސް ޖޫނިއާ ސްވިމިންގ ޗެމްޕިއަންޝިޕްގައި ރާއްޖޭގެ ޖޫނިއާ ޓީމުން ވަނީ، ފިރިހެނުންގެ ލޯންގކޯސް 200 މީޓަރު ބްރެސްޓްސްޓްރޯކް އިވެންޓާއި އަންހެނުންގެ ލޯންގކޯސް 50 މީޓަރު ބްރެސްޓްސްޓްރޯކް އިވެންޓުގެ އިތުރުން އަންހެނުންގެ 200 މީޓަރު އިންޑިވިޖުއަލް މެޑްލޭ އިވެންޓުން ޤައުމީ ރެކޯޑް އާކޮށްފައެވެ.

އެގޮތުން، ރާއްޖޭގެ ޖޫނިއާ ސްވިމިންގ ޓީމުގެ އިޒްޔާން ނާޒިމް ވަނީ ފިރިހެނުންގެ ލޯންގކޯސް 200 މީޓަރު ބްރެސްޓްސްޓްރޯކް އިވެންޓުގައި 02:45.21  އިން ރޭސް ފުރިހަމަކޮށްގެން ޤައުމީ ރެކޯޑް އާކޮށްފައެވެ. ކުރީން މި ރެކޯޑް އޮތީ އިފްޟާލް އިބްރާހިމް މަޙްފޫޡުގެ އަތުގަ އެވެ. އެއީ، ފިލިޕީންސްގެ ނިއު ކްލާކް ސިޓީގައި މިދިޔަ އަހަރު ކުރިއަށްދިޔަ 11 ވަނަ އޭޝިއަން އޭޖް ގްރޫޕް އެކުއަޓިކްސް ޗެމްޕިއަންޝިޕްގައި02:45.81  އިން ރޭސް ނިންމައިގެންނެވެ.

ދުނިޔޭގެ ޖޫނިއާ ފެތުމުގެ މުބާރާތުގައި ރާއްޖޭގެ އަމްނާ ތަޒްކިޔާ މިރުޞާދު ވަނީ އަންހެނުންގެ ލޯންގކޯސް 50 މީޓަރު ބެކްސްޓްރޯކް އިވެންޓުގައި 00:32.77 އިން ރޭސް ނިންމައިގެން ޤައުމީ ރެކޯޑް އާކޮށްފައެވެ. މީގެކުރީން، މި ރެކޯޑް އޮންނަނީ ޢާއިޝަތު ޢުލްޔާ ޝާއިޤް އަތުގައެވެ. އެއީ، މިދިޔަ އަހަރު އޮސްޓްރޭލިއާގައި ކުރިއަށްދިޔަ ސްވިމިންގ ވެސްޓަރން އޮސްޓްރޭލިއާ (އެސްޑަބްލިއުއޭ) ހެންކޮކް ޕްރޮސްޕެކްޓިންގ ސްޓޭޓް ޗެމްޕިއަންޝިޕްގައި 00:34.18 އިން ރޭސް ފުރިހަމަކޮށްގެންނެވެ.

މީގެއިތުރުން، ރާއްޖޭގެ ޖޫނިއާ ސްވިމިންގ ޓީމުގައި ހިމެނޭ މިރާލް ޢައިން ލަތީފް ވަނީ އަންހެނުންގެ ލޯންގކޯސް 200 މީޓަރު އިންޑިވިޖުއަލް މެޑްލޭ އިވެންޓުގައި 02:42.46  އިން ރޭސް ނިންމައިގެން ޤައުމީ ރެކޯޑް އާކޮށްފައެވެ. މި އިވެންޓުގެ ރެކޯޑް އެންމެ ފަހުން އާކޮށްފައިވަނީ ވެސް މިރާލް އެވެ. އެއީ، ސިންގަޕޫރުގައި ކުރިއަށްދިޔަ 22 ވަނަ ވޯލްޑް އެކުއަޓިކްސް ޗެމްޕިއަންޝިޕްގައި 02:44.34 އިން ރޭސް ނިންމައިގެންނެވެ.