ENGLISH
30 އޯގަސްޓު 2025
ލައިބާ، ބަޓޫމީ ކަޕްގައި ވާދަކުރަނީ
22 އޯގަސްޓު 2025
|
މީގެކުރީން ބޭއްވި މުބާރާތެއްގައި ލައިބާ ކުޅެނީ. --ފޮޓޯ: ބެޑްމިންޓަން އެކަޑެމީ އޮފް ނައިފަރު
ޖޯޖިއާގައި ކުރިއަށްދާ "ބަޓޫމީ ކަޕް ޔޫތު އިންޓަރނޭޝަނަލް 2025" ގައި، ދާދިފަހުން އެކުލަވާލި ޤައުމީ ބެޑްމިންޓަން ސްކޮޑުން ޖާގަ ހޯދި އުމުރުން 12 އަހަރުގެ ލައިބާ އަހުމަދު މަހުލޫފް (އެލީ)، ވާދަކުރަން ހަމަޖެހިއްޖެއެވެ.
މި މަހުގެ 22 އިން 24 ގެ ނިޔަލަށް ޖޯޖިއާގެ ބަޓޫމީ ސިޓީގައި ކުރިއަށްދާ މުބާރާތުގައި، ޖޯޖިއާގެ އިތުރުން ތުރުކީ، ކަޒަކިސްތާން، އަރުމީނިއާ، ލެޓްވިއާ، އަޒަރުބައިޖާން އަދި ދިވެހިރާއްޖެ ހިމެނޭ ގޮތަށް 78 ކުޅުންތެރިން ވާދަކުރާނެ އެވެ.
ޖޯޖިއާގެ ޤައުމީ ބެޑްމިންޓަން ފެޑެރޭޝަނުން އިންތިޒާމްކޮށްގެން ބާއްވާ މި މުބާރާތުގައި އުމުރުން 11، 13 އަދި 15 އަހަރުން ދަށުގެ އުމުރުފުރައިގައި އަންހެން އަދި ފިރިހެން ސިންގަލްސް އާއި ޑަބަލްސްގެ އިތުރުން މިކްސްޑް ޑަބަލްސްގެ ކުޅުން ކުރިއަށްދާނެ އެވެ.
މިމުބާރާތުގައި ލައިބާ ވާދަކުރަނީ 13 އަހަރުން ދަށުގެ ސިންގަލްސް އިވެންޓުގެ އިތުރުން، ޑަބަލްސް އިވެންޓުގައި ޖޯޖިއާގެ ޝަޚްބަޒިއަން މަގްދާ އަދި މިކްސްޑް ޑަބަލްސް އިވެންޓުގައި އަރުމީނިއާގެ މަނުކްޔަން ނާރެކް އާއެކު އެވެ.
މި ވަގުތު ރާއްޖޭގެ ބެޑްމިންޓަންގައި އެންމެ ބޮޑު ކުރިއެރުމެއް ހޯދަމުން އަންނަ އެއް ކުޅުންތެރިޔާ ކަމަށްވާ، ލައިބާ ވަނީ މިދިޔަ އަހަރު ބޭއްވި ބަޓޫމީ ކަޕްގައި ވާދަކޮށް، ސިންގަލްސް އިވެންޓުގައި ލޯ މެޑެއްޔަކާއި، ޑަބަލްސް އިވެންޓުން ރިހި މެޑެލް ހާސިލްކޮށްފައެވެ.
މީގެއިތުރުން، މި އަހަރު ކުރިއަށްދިޔަ އަރްމީނިއާ މުބާރާތުގައި ތިން އިވެންޓަކުން ރަން މެޑެލް ހޯދައި، ލައިބާ ވަނީ ތާރީޚީ ކާމިޔާބީއެއް ހާސިލްކޮށްފައެވެ.
ލައިބާ އަކީ ސަރުކާރުގެ "އަރުތަ" ޕްރޮގްރާމްގައި ހިމެނޭ އެތުލީޓެކެވެ. "އަރުތަ" ޕްރޮގްރާމަކީ، ދިވެހި ކުޅިވަރުގެ އާ ޖީލެއް ބިނާކުރުމާއި ބައިނަލްއަގުވާމީ ފެންވަރުގައި ދިވެހި ކުޅުންތެރިން ފައިތިލަ ސާބިތުކުރުމަށް މަގުފަހިކޮށްދިނުމުގެ ގޮތުން ކުރިއަށްގެންދާ ޕްރޮގްރާމެކެވެ.