ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޖެނެރަލް ސެކްރެޓަރީގެ މަޤާމަށް އަހުމަދު ޒަރީރު ހަމަޖައްސަން ނިންމައިފިއެވެ.

އެފްއޭއެމްގެ އެކްސްކޯ އިން މިއަދު ބޭއްވި ބައްދަލުވުމުގައި އެކްޓިންގ ޖެނެރަލް ސެކްރެޓަރީގެ މަޤާމަށް ޒަރީރު ހަމަޖައްސަން ނިންމިއިރު، އޭނާ ވަނީ މީގެކުރީން ވެސް އެފްއޭއެމްގެ އެކްސްކޯގެ މެންބަރުކަން ކޮށްފައެވެ.

މިއަދު މެންދުރުފަހު ކުރިއަށްދިޔަ އެފްއޭއެމް އެކްސްކޯގެ މި އަހަރުގެ ހަތަރުވަނަ ބައްދަލުވުމުގައި ވަނީ، އެ އެސޯސިއޭޝަނުގެ އިންޓަރނޭޝަނަލް ރިލޭޝަންސް މެނޭޖަރުގެ މަޤާމަށް ވެސް ޒަރީރު ހަމަޖައްސަން ނިންމާފައެވެ.

ކުޅިވަރާއި މުނިފޫހިފިލުވުމުގެ ދާއިރާއިން ވެސް ފާހަގަކޮށްލެވޭ ޒަރީރު ވަނީ، ރާއްޖޭގެ ފުޓްބޯޅައިގެ ގަދަބާރު، ނިއު ރޭޑިއަންޓް ސްޕޯޓްސް ކްލަބުގެ ބޯޑު މެންބަރުކަން 2012 އިން 2015 ގެ ނިޔަލަށް އަދާކޮށްފައެވެ. އެ މުއްދަތުގައި އެ ކްލަބާއެކު ވަނީ ގިނަ ކާމިޔާބީތަކެއް ހާސިލްކޮށްފައެވެ.

އެފްއޭއެމްގެ ޖެނެރަލް ސެކްރެޓަރީގެ މަޤާމާ ހަވާލުވި ޒަރީރު މިހާތަނަށް ހުންނެވީ، ސަރުކާރުގެ ކުންފުންޏެއް ކަމަށްވާ، މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިންގ އެންޑް ޕްރޮމޯޝަން ލިމިޓެޑްގެ މެނޭޖިން ޑިރެކްޓަރުގެ މަޤާމުގައެވެ.

އޭގެކުރީން، އޭނާ ވަނީ ދިގު މުއްދަތެއް ވަންދެން ބޭންކް އޮފް މޯލްޑިވްސް (ބީއެމްއެލް) ގެ ހެޑް އޮފް މާކެޓިންގ އެންޑް ކޮމިއުނިކޭޝަންގެ މަޤާމާއި، ވަތަނިއްޔާގެ ނަމުގައި އުރީދޫ މޯލްޑިވްސް ހިންގިއިރު އެ ކުންފުނީގެ ސީނިއާ އެގްޒެކްޓިވް ޑިޖިޓަލް މީޑިއާގެ މަޤާމު އަދާކޮށްފައެވެ.

މީގެއިތުރުން، ޒަރީރު އަކީ، މީގެ 21 އަހަރުކުރިން ރާއްޖޭގައި ފުޓްބޯޅައަށް ޚާއްޞަކޮށް އެންމެ ފުރަތަމަ އުފެއްދި އިނގިރޭސި އޮންލައިން ނޫސް ކަމަށްވާ، 'މޯލްޑިވްސޮކާޑޮޓްކޮމް' ގެ މަސްއޫލުވެރިޔާ އެވެ.

އޮންލައިން ނޫސްވެރިކަން އެހާ ޢާއްމު ނޫން ދުވަސްވަރެއްގައި މޯލްޑިވްސްސޮކާ ވުޖޫދުވެގެންދިއުމާއެކު ޒަރީރުއާއި އޭނާގެ ޓީމުން ވަނީ ރާއްޖޭގެ ފުޓްބޯޅަ ޚަބަރުތަކުގެ އަދާހަމަ ވަރަށް ފުރިހަމައަށް ގެނެސްދީފައެވެ.