ENGLISH
30 އޯގަސްޓު 2025
ޤައުމީ ފުޓްބޯޅަ ޓީމުގެ ކޯޗަކަށް މޯހަން ހަމަޖައްސައިފި
21 އޯގަސްޓު 2025
|
މީގެކުރީން ބޭއްވި ނޫސްވެރިންގެ ބައްދަލުވުމެއްގައި ކޯޗު، މޯހަން ވާހަކަ ދައްކަނީ. ފޮޓޯ: މިހާރު
ރާއްޖޭގެ ސީނިއާ ޤައުމީ ފުޓްބޯޅަ ޓީމުގެ ކޯޗުގެ މަޤާމަށް މުޙައްމަދު ޝިޔާޒް (މޯހަން) ހަމަޖައްސައިފިއެވެ.
މޯހަން ވަނީ ކުރީން، ޤައުމީ ޓީމުގެ އެސިސްޓެންޓް ކޯޗުގެ މަޤާމު އަދާކޮށްފައެވެ. އެގޮތުން، އޭނާ ވަނީ 2008 ވަނަ އަހަރުގެ ސާފް ޗެމްޕިއަންޝިޕް ކާމިޔާބުކުރި ޤައުމީ ޓީމާއެކު މަސައްކަތްކޮށްފައެވެ.
އެފްއޭއެމުން މިރޭ ނެރުނު ބަޔާނެއްގައިވަނީ، ސީނިއާ ޤައުމީ ފުޓްބޯޅަ ޓީމުން ކުރިއަށް އޮތް ސެޕްޓެންބަރު މަހުގެ ތެރޭގައި ސްރީ ލަންކާގައި އެ ޓީމާ ދެކޮޅަށް ކުޅުމަށް ހަމަޖެހިފައިވާ މެޗުތަކާއި، އޭޝިއަން ކަޕް ކޮލިފައިންގައި އަންނަ އޮކްޓޫބަރު އަދި ނޮވެންބަރު މަހުގައި ހުރި މެޗުތަކުގެ ހެޑް ކޯޗުގެ މަޤާމަށް މޯހަން ހަމަޖައްސާފައިވާކަން ހާމަކޮށްފައެވެ.
އެފްއޭއެމުން މި ނިންމުން ނިންމާފައިވަނީ، މިއަދު މެންދުރުފަހު ކުރިއަށްދިޔަ އެ އެސޯސިއޭޝަނުގެ އެކްސްކޯގެ ހަތަރުވަނަ ބައްދަލުވުމުގައެވެ.
މީގެކުރީން، އެފްއޭއެމްގެ ގިނަ މަޤާމުތަކެއްވެސް އަދާކޮށްފައިވާ މޯހަންގެ ކޯޗިންގ ކެރިއަރުގައި ވަނީ، ނިއު ރޭޑިއަންޓް ސްޕޯޓްސް ކްލަބުގެ އިތުރުން ކްލަބް ވެލެންސިއާ އަދި މާޒިޔާ ސްޕޯޓްސް އެންޑް ރެކްރިއޭޝަން އަށް ވެސް އިރުޝާދު ދީފައެވެ.
އޭނާ އެންމެ ފަހުން ކްލަބް އީގަލްސްގެ ކޯޗުގެ މަޤާމުގައި ހުރިއިރު، ސުޕަ ޔުނައިޓެޑް ސްޕޯޓްސް (ސަސް) އާއި މަހިބަދޫ އަދި އުނގޫފާރު ފުޓްބޯޅަ ޓީމަށް ވެސް ކޯޗުކޮށްދީފައިވެއެވެ.
މޯހަންގެ ކޯޗު ކަމުގައި ޤައުމީ ފުޓްބޯޅަ ޓީމަށް އެންމެ އަވަހަށް އޮތީ އަންނަ މަހުގެ 6 އާއި 9 ވަނަ ދުވަހު ސްރީ ލަންކާގައި އެ ޓީމާ ދެކޮޅަށް ކުޅެން ޖެހޭ މެޗުތަކެވެ. އެއަށްފަހު، އޭޝިއަން ކަޕް ކޮލިފިކޭޝަން ބުރުގައި އޮކްޓޫބަރު ނުވައެއްގައި ރަށުން ބޭރުގައި ތަޖިކިސްތާނާ ދެކޮޅަށް ކުޅުމަށްފަހު އެ މަހުގެ 14 ވަނަ ދުވަހު އެ ޤައުމާ ދެކޮޅަށް ރާއްޖޭގައި ކުޅޭ މެޗަށްފަހު ނޮވެންބަރު 18 ގައި އަމިއްލަ ދަނޑުގައި ނިކުންނާނީ ފިލިޕީންސާ ދެކޮޅަށެވެ.