އއ. ތޮއްޑޫގައި ކުރިއަށްދާ މާސްޓާސް ޓޭބަލް ޓެނިސް މުބާރާތް (ޓީއެމްޓީޓީ) ގެ ޑެސްޓިނޭޝަން ޕާޓްނަރުގެ ގޮތުގައި ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން ބައިވެރިވެއްޖެއެެވެ.

މި އޮގަސްޓް މަހުގެ 19 އިން 25 ގެ ނިޔަލަށް ތޮއްޑޫގައި ބާއްވާ މުބާރާތަކީ ތޮއްޑޫ ލޯކަލް އޮތޯރިޓީ ކޮމްޕެނީ (ޓީއެލްއޭސީ) އާއި އިހާ ޓޭބަލް ޓެނިސް އެކަޑެމީ އޮފް މޯލްޑިވްސް (އައިޓީޓީއޭ) ގުޅިގެން ކުޅިވަރާއި ހަށިހެޔޮކަމާބެހޭ ވުޒާރާގެ އެހީތެރިކަމާއެކު ބާއްވާ މުބާރާތެކެވެ. މިއީ ވިޒިޓް މޯލްޑިވްސް ކޯޕަރޭޝަނުގެ ފުރިހަމަ އެއްބާރުލުމާއެކު ކުރިއަށް ގެންދާ މުބާރާތެއް ވެސް މެ އެވެ.

ތޮއްޑޫގައި ބާއްވާ ފުރަތަމަ ބައިނަލްއަގުވާމީ ޓީޓީ މުބާރާތަކީ އުމުރުން 35 އަހަރުން މަތީގެ ކުޅުންތެރިންނަށް ޚާއްޞަކޮށްގެން ކުރިއަށްގެންދާ މުބާރާތެކެވެ. ޖުމްލަ 17 ޤައުމަކުން 75 އެތުލީޓުން ވާދަކުރާއިރު، އޭގެތެރޭގައި އިންޑިއާ، ރަޝިޔާ، ޖަރުމަން، ސްޕެއިން، އެމެރިކާ އާއި ޗައިނާ އަދި ނިއު ޒީލެންޑަށް ނިސްބަތްވާ ކުޅުންތެރިން ހިމެނެއެވެ.

ވިޒިޓް މޯލްޑިވްސް އިން ބުނީ، މިއީ ރާއްޖެއަކީ ކުޅިވަރު ފަތުރުވެރިކަމުގެ ރޮނގުން ކުރިއަރާފައިވާ މަންޒިލަކަށް ހެދުމުގެ ތަޞައްވުރު ހަރުދަނާކޮށް، ރާއްޖޭގެ މަޝްހޫރު ޤުދުރަތީ ރީތިކަމާއި މެހެމާންދާރީއާއެކު ދުނިޔޭގެ ފެންވަރުގެ ކުޅިވަރު އިވެންޓްތައް ބޭއްވުމުގެ ޤާބިލުކަން ދައްކުވައިދޭ މުބާރާތެކެވެ. އަދި ރާއްޖޭގެ ފަތުރުވެރިކަމުގެ ޚިދުމަތްތައް އިތުރަށް ފުޅާކުރުމުގައި ކުޅިވަރު ފަތުރުވެރިކަމުގެ އަހައްމިއްޔަތުކަން އިތުރުވަމުންދާކަން ދައްކުވައިދޭ މި މުބާރާތުގެ ސަބަބުން ރަށުގެ އިޤްތިޞާދަށް ފައިދާވާނެ ގިނަ ފުރުޞަތުތަކެއް ވެސް މި މުބާރާތުން ފަހިވާނެ ކަމަށް ބުނެފައިިވެއެވެ.

ވިޒިޓް މޯލްޑިވްސް ކޯޕަރޭޝަންގެ ސީއީއޯ އަދި އެމްޑީ އިބްރާހީމް ޝިއުރީ ވިދާޅުވި ގޮތުގައި ކުޅިވަރު ފަތުރުވެރިކަމަކީ އަވަސް ދުވެލީގައި ކުރިއަރަމުންދާ ދާއިރާއެކެވެ. އަދި ޓީއެމްޓީޓީ ފަދަ ބައިނަލްއަޤްވާމީ މުބާރާތްތަކަށް އެހީތެރިވުމުން، ރާއްޖެއަކީ ހަމައެކަނި ހިތްހަމަޖައްސާލުމަށް ޒިޔާރަތްކުރާ މަންޒިލެއްގެ ބަދަލުގައި ކުޅިވަރާއި، މުނިފޫހިފިލުވުމާއި ދިރިއުޅުމުގެ ތަޖުރިބާތަކުގެ ދުޅަހެޔޮ މަންޒިލެއްގެ ގޮތުގައި ފައިހަމަކުރުމަށް ހިތްވަރު ލިބިގެންދާ ކަމަށް އޭނާ ވިދާޅުވި އެވެ.

މިއީ ރާއްޖޭގައި ސްޕޯޓްސް ޓޫރިޒަމް ކުރިއަރުވައި، ފަތުރުވެރިކަމުގެ ވަރުގަދަ މަންޒިލެއްގެ ގޮތުގައި ޕްރޮމޯޓުކުރުމަށް އެޅިގެންދިޔަ މުހިއްމު ފިޔަވަޅެކެވެ.