ENGLISH
30 އޯގަސްޓު 2025
ދުނިޔޭގެ ފެތުމުގެ ޖޫނިއާ މުބާރާތުގައި ޤައުމީ ހަތަރު ރެކޯޑެއް އާކޮށްފި
20 އޯގަސްޓު 2025
|
ވޯލްޑް އެކުއަޓިކްސް ޖޫނިއާ ސްވިމިންގ ޗެމްޕިއަންޝިޕްގައި ވާދަކުރާ ރާއްޖޭގެ ޒުވާން ޓީމު. --ފޮޓޯ: ސްވިމިންގ އެސޯސިއޭޝަން އޮފް މޯލްޑިވްސް
ފެތުމުގެ ޤައުމީ ހަތަރު ރެކޯޑެއް ރާއްޖޭގެ ޖޫނިއާ ސްވިމިން ޓީމުން އާކޮށްފިއެވެ.
ރުމޭނިއާގައި މިހާރު ކުރިއަށްދާ 10 ވަނަ ވޯލްޑް އެކުއަޓިކްސް ޖޫނިއާ ސްވިމިންގ ޗެމްޕިއަންޝިޕްގައި އަންހެނުންގެ ލޯންގކޯސް 400 މީޓަރުގެ އިންޑިވިޖުއަލް މެޑްލޭ އާއި ހަތަރެއް ގުނަ 200 މީޓަރު ފްރީސްޓައިލް ރިލޭގެ އިތުރުން ފިރިހެނުންގެ ލޯންގކޯސް 50 އާއި 100 މީޓަރު ބްރެސްޓްސްޓްރޯކް އިވެންޓުން ވަނީ ޤައުމީ ރެކޯޑް އާކޮށްފައެވެ.
އެގޮތުން، މީގެތެރެއިން ދެ ރެކޯޑެއް އާކުރީ ރާއްޖޭގެ ޖޫނިއާ ސްވިމިން ޓީމުގައި ހިމެނޭ ލޫޠު މުޙައްމަދު ހުސައިން އެވެ. އޭނާ ވަނީ ވޯލްޑް އެކުއަޓިކްސް ޖޫނިއާ ސްވިމިން ޗެމްޕިއަންޝިޕްސްގައި ފިރިހެނުންގެ ލޯންގކޯސް 50 އާއި 100 މީޓަރު ބްރެސްޓްސްޓްރޯކް އިވެންޓުގައި ޤައުމީ ރެކޯޑް އާކޮށްފައެވެ.
ދުނިޔޭގެ ޖޫނިއާ ފެތުމުގެ މުބާރާތުގައި ލޫޠު ވަނީ 100 މީޓަރު ބްރެސްޓްސްޓްރޯކް އިވެންޓްގައި 01:10.95 ރޭސް ނިންމައިގެންނެވެ. މި އިވެންޓްގެ ޤައުމީ ރެކޯޑް އެންމެފަހުން އާކޮށްފައިވަނީ މިދިޔަ އަހަރު ބޭއްވި 21 ވަނަ ވޯލްޑް އެކުއަޓިކްސް ޗެމްޕިއަންޝިޕްގައި މުބާލް އައްޒާމް އިބްރާހިމް އެވެ. އެއީ، އެ ފަހަރުގެ އިވެންޓް 01:14.58 އިން ފުރިހަމަކޮށްގެންނެވެ.
މި މުބާރާތުގައި ލޫޠު ވަނީ އިވެންޓްގެ ފުރަތަމަ 50 މީޓަރުގައި 00:32.67 އިން ފުރިހަމަކޮށްގެން ޤައުމީ ރެކޯޑް އާކޮށްފައެވެ. ކުރީން މި ރެކޯޑް އޮންނަނީ 21 ވަނަ ވޯލްޑް އެކުއަޓިކްސް ޗެމްޕިއަންޝިޕްސްގައި މުބާލް އައްޒާމް އިބްރާހިމް އަތުގައެވެ. އެއީ، އެ ފަހަރުގެ އިވެންޓުގައި 00:33.24 އިން ރޭސް ނިންމައިގެންނެވެ.
ރުމޭނިއާގައި މިހާރު ކުރިއަށްދާ ދުނިޔޭގެ ފެތުމުގެ ޖޫނިއާ މުބާރާތުގައި މިރާލް ޢައިން ލަތީފް ވަނީ އަންހެނުންގެ ލޯންގކޯސް 400 މީޓަރު އިންޑިވިޖުއަލް މެޑްލޭ އިވެންޓުގައި 05:57.86 އިން ރޭސް ފުރިހަމަކޮށް، ޤައުމީ ރެކޯޑް އާކޮށްފައެވެ.
މި އިވެންޓްގެ ޤައުމީ ރެކޯޑް އެންމެ ފަހުން އާކޮށްފައިވަނީ ވެސް މިރާލް އެވެ. އެއީ، މިދިޔަ އަހަރު ޔޫކޭގައި ބޭއްވި ޑެވޮން ކައުންޓީ އޭޖް ގްރޫޕް ޗެމްޕިއަންޝިޕްސްގައި 06:09.10 އިން ރޭސް ނިންމައިގެންނެވެ.
މީގެއިތުރުން، ރުމޭނިއާގައި މިހާރު ކުރިއަށްދާ ޖޫނިއާ މުބާރާތުގައި އަންހެނުންގެ ލޯންގކޯސް 4 ގުނަ 200 މީޓަރު ފްރީސްޓައިލް ރިލޭ އިވެންޓުގައި ރާއްޖޭގެ އަންހެން ޓީމު ވަނީ 10:09.97 އިން ރޭސް ފުރިހަމަކޮށްގެން އިތުރު ޤައުމީ ރެކޯޑެއް އާކޮށްފައެވެ. މި ރެކޯޑް އާކުރި ޓީމުގައި ހިމެނެނީ؛ މިރާލް ޢައިން ލަޠީފް، އަމްނާ ތަޒްކިޔާ މިރުޞާދު، ލައިބާ ޙަސަންމަނިކު އަދި ޢަޔާނާ ޢަރީފް އެވެ.
މި އިވެންޓުގެ ޤައުމީ ރެކޯޑް އެންމެފަހުން އާކޮށްފައިވަނީ 2023 ވަނަ އަހަރު ބޭއްވި 19 ވަނަ އޭޝިއަން ގޭމްސްގައި 10.50.31 އިން ރޭސް ނިންމައިގެންނެވެ. މި ޤައުމީ ރެކޯޑް އާކުރި ޓީމުގައި ހިމެނުނީ ޙަނާން ޙުސައިން ޙަލީމް، މިރާލް ޢައިން ލަތީފް، ޙަމްނާ އަޙްމަދު އަދި އީން އައްބާސް ޝަރީފް އެވެ.