ENGLISH

30 އޯގަސްޓު 2025

Advertisement

ރައީސުލްޖުމްހޫރިއްޔާ، ތޮއްޑޫ މާސްޓާސް ޓޭބަލް ޓެނިސް މުބާރާތް ރަސްމީކޮށް ފައްޓަވައިދެއްވައިފި

20 އޯގަސްޓު 2025

|

މުޙައްމަދު އަދުހަމް

މާސްޓާސް ޓޭބަލް ޓެނިސް މުބާރާތުގެ ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާ ބައިވެރިވެވަޑައިގެން ކުޅުއްވި މެޗުގެ ތެރެއިން. ފޮޓޯ: ރައީސް އޮފީސް

އއ. ތޮއްޑޫގައި ކުރިއަށްގެންދިއުމަށް ހަމަޖެހިފައިވާ މާސްޓާސް ޓޭބަލް ޓެނިސް މުބާރާތް ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ބައިވެރިވެވަޑައިގެން އެ މުބާރާތް ރަސްމީކޮށް ފައްޓަވައިދެއްވައިފިއެވެ.

އއ. އަތޮޅުގެ މީހުން ދިރިއުޅޭ ހުރިހާ ރަށަކަށް ރައީސުލްޖުމްހޫރިއްޔާ ކުރައްވަމުންދާ ދަތުރުފުޅުގެ ތެރެއިން މިއަދު އެމަނިކުފާނު ތޮއްޑޫ އަށް ވަޑައިގެން، އެ ރަށުގައި ބާއްވާ ބައިނަލްއަގުވާމީ ފުރަތަމަ ޓޭބަލް ޓެނިސް މުބާރާތް ރަސްމީކޮށް ފައްޓަވައިދެއްވީ އެކަމަށް ޚާއްޞަކޮށް ކުޅެވުނު މެޗަކުންނެވެ.

މި އޮގަސްޓް މަހުގެ 19 އިން 25 ގެ ނިޔަލަށް ތޮއްޑޫގައި ބާއްވާ މުބާރާތަކީ ތޮއްޑޫ ލޯކަލް އޮތޯރިޓީ ކޮމްޕެނީ (ޓީއެލްއޭސީ) އާއި އިހާ ޓޭބަލް ޓެނިސް އެކަޑެމީ އޮފް މޯލްޑިވްސް (އައިޓީޓީއޭ) ގުޅިގެން ކުޅިވަރާއި ހަށިހެޔޮކަމާބެހޭ ވުޒާރާގެ އެހީތެރިކަމާއެކު ބާއްވާ މުބާރާތެކެވެ. މިއީ އެ ރަށުގައި ބާއްވާ ފުރަތަމަ ބައިނަލްއަގުވާމީ ޓީޓީ މުބާރާތެވެ.

މި މުބާރާތަކީ އުމުރުން 35 އަހަރުން މަތީގެ ކުޅުންތެރިންނަށް ޚާއްޞަކޮށްގެން ކުރިއަށްގެންދާ މުބާރާތެކެވެ. ޖުމްލަ 17 ޤައުމަކުން 75 އެތުލީޓުން ވާދަކުރާއިރު، އޭގެތެރޭގައި އިންޑިއާ، ރަޝިޔާ، ޖަރުމަން، ސްޕެއިން، އެމެރިކާ އާއި ޗައިނާ އަދި ނިއު ޒީލެންޑަށް ނިސްބަތްވާ ކުޅުންތެރިން ހިމެނެއެވެ.

މުބާރާތުގައި އަންހެން އަދި ފިރިހެން ސިންގަލްސް، ޑަބަލްސްގެ އިތުރުން މިކްސް ޑަބަލްސް އިވެންޓްގެ ކުޅުން ކުރިއަށްގެންދިއުމަށް ހަމަޖެހިފައިވެއެވެ.

މި މުބާރާތުގެ މަޤްޞަދަކީ ތޮއްޑޫގެ ލޯކަލް ކޮމިއުނިޓީ އަށް އިޤްތިޞާދީ އަދި އިޖުތިމާޢީ ފައިދާތައް ފޯރުކޮށްދިނުމުގެ އިތުރުން ރާއްޖޭގައި ޓޭބަލް ޓެނިސް އިތުރަށް ކުރިއެރުވުމެވެ.

މިއީ ރާއްޖޭގައި ސްޕޯޓްސް ޓޫރިޒަމް ކުރިއަރުވައި، ފަތުރުވެރިކަމުގެ ވަރުގަދަ މަންޒިލެއްގެ ގޮތުގައި ޕްރޮމޯޓުކުރުމަށް އެޅިގެންދިޔަ މުހިއްމު ފިޔަވަޅެކެވެ.

ކިޔުންތެރިންގެ ހިޔާލު