ENGLISH
30 އޯގަސްޓު 2025
އުރީދޫ ނޭޝަން އިންޓަރ އޮފީސް އީސްޕޯޓްސް ޗެމްޕިއަންޝިޕްގައި ކަސްޓަމްސް އަށް ބޮޑު ކާމިޔާބީއެއް
17 އޯގަސްޓު 2025
|
އީއޭއެފްސީ ގޭމްގެ އެއްވަނަ މަގާމު ހޯދި ކަސްޓަމްސްގެ ޖަނާން (ވ) އަށް އުރީދޫގެ ޗީފް ކޮމާޝަލް އޮފިސަރު ނިޔާޒް އިނާމު ދެއްވަނީ. ފޮޓޯ: އުރީދޫ
އުރީދޫ ނޭޝަން އިން ބޭއްވީ އިންޓަރ އޮފީސް އީސްޕޯޓްސް ޗެމްޕިއަންޝިޕް 2025 ގައި މޯލްޑިވްސް ކަސްޓަމްސް ސާވިސް އިން ބޮޑު ކާމިޔާބީއެއް ހާސިލްކޮށްފިއެވެ.
އުރީދޫން ދެވަނަ ފަހަރަށް ބޭއްވީ އިންޓަރ އޮފީސް އީސްޕޯޓްސް މުބާރާތުން ކަސްޓަމްސް ވަނީ ތިން ގޭމް ޓައިޓަލްގައި ވެސް ފަޚުރުވެރި މަގާމުތައް ހޯދައިފައެވެ.
މި މަހުގެ 7 އިން 15 ގެ ނިޔަލަށް އުރީދޫން ރާއްޖޭގެ އެކި ކަންކޮޅުތަކުގައި ހިމެނޭ އޮފީސްތަކުގެ މެދުގައި ކުރިއަށްގެންދިޔަ މުބާރާތުގައި ދުނިޔޭގެ އެންމެ މަގުބޫލު ގޭމް ޓައިޓަލް ކަމަށްވާ، ޕަބްޖީ މޮބައިލް، މޮބައިލް ލެޖެންޑްސް: ބޭންގް ބޭންގް (އެމްއެލްބީބީ) އަދި އީއޭއެފްސީ ޓޯނަމަންޓްގައި ހުނަރުވެރި ކުޅުމެއް ފެނިގެންގޮސްފައިވެއެވެ.
އެގޮތުން، މި ފަހަރުގެ މުބާރާތުގައި ވާދަވެރި ކުޅުމެއް ފެނިގެންދިޔަ އީއޭއެފްސީގައި މުޅިއެކު 20 ކުންފުންޏަކުން 47 ކުޅުންތެރިން ބައިވެރިވިއިރު، އެމްއެލްބީބީގައި ފަސް ކުންފުންޏަކުން ނުވަ ޓީމު ހިމެނޭ ގޮތަށް (63 ކުޅުންތެރިން ވާދަކޮށްފައިވެއެވެ. އަދި، ރާއްޖޭގައި އެންމެ ވާދަވެރި އެއް ގޭމު ކަމަށްވާ، ޕަބްޖީ މޮބައިލްގައި ނުވަ ކުންފުންޏަކުން 11 ޓީމުގައި (52 ކުޅުންތެރިން) ފެނިގެންގޮސްފައިވެއެވެ.
މި މުބާރާތުގެ ޛަރިއްޔާއިން، ކޯޕަރޭޓް ދުނިޔޭގައި އީސްޕޯޓްސް އަށް އޮތް މަގުބޫލުކަން ފެނިގެންދިޔައިރު، ހުރިހާ ކުންފުންޏެއްގެ މެދުގައި އެކުވެރިކަމާއި ޓީމް ސްޕިރިޓް އޮތް މިންވަރުގެ އިތުރުން ހިތްވަރާއެކު މަސައްކަތްކުރިތަން ފެނިގެންދިޔައެވެ.
ޕަބްޖީ މޮބައިލްގެ ވަނަތަކަށް ހޮވުނު ޓީމުތައް:
އެއްވަނަ މަގާމު: ޔުނައިޓެޑް ބީއެމްއެލް އެސްޑީއެމްޒެޑް – 5،000 ރުފިޔާ
ދެވަނަ މަގާމު: އެމްޓީސީސީ – 3،000 ރުފިޔާ
ތިންވަނަ މަގާމު: މޯލްޑިވްސް ކަސްޓަމްސް ސާވިސް – 2،000 ރުފިޔާ
މޮބައިލް ލެޖެންޑްސް: ބޭންގް ބޭންގް (އެމްއެލްބީބީ)
އެއްވަނަ މަގާމު: މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) - 5،000 ރުފިޔާ
ދެވަނަ މަގާމު: މޯލްޑިވްސް ކަސްޓަމްސް ސާވިސް - 3،000 ރުފިޔާ
ތިންވަނަ މަގާމު: ބޭންކް އޮފް މޯލްޑިވްސް (ޔުނައިޓެޑް ބީއެމްއެލް) - 2،000 ރުފިޔާ
އީއޭއެފްސީ
އެއްވަނަ މަގާމު: ޖަނާން މުހައްމަދު (މޯލްޑިވްސް ކަސްޓަމްސް ސާވިސް) - 5،000 ރުފިޔާ
ދެވަނަ މަގާމު: މާހިލް މުހައްމަދު (ޕްރިހާބް ޕްރައިވެޓް ލިމިޓެޑް) - 3،000 ރުފިޔާ
ތިންވަނަ މަގާމު: ހުސެއިން ޔައީޝް (ހިވިން އިންވެސްޓްމަންޓްސް) - 2،000 ރުފިޔާ
އުރީދޫ ނޭޝަނުން އިންތިޒާމްކޮށްގެން ބޭއްވި އިންޓަރ އޮފީސް އީސްޕޯޓްސް ޗެމްޕިއަންޝިޕްގެ ސަބަބުން ރާއްޖޭގައި ހަލުވިކަމާއެކު ފުޅާވަމުންދާ އީސްޕޯޓްސްގެ މައިދާނުގައި އޮފީސްތަކުގެ ޓީމްތަކާއި ކުޅުންތެރިން ބައިވެރިކުރުމުގެ ޚާއްޞަ ފުރުޞަތެއް ލިބިގެންދާނެ ކަމަށް އުރީދޫން އުއްމީދުކުރެއެވެ.