ތިރީސް ހަތަރުވަނަ ޤައުމީ އެތުލެޓިކްސް ޗެމްޕިއަންޝިޕްގެ އެންމެ މޮޅު އެތުލީޓުންގެ މަޤާމު ދިވެހި ސިފައިންގެ ކްލަބުގެ ހަސަން ޝައްމޫން އާއި ކަސްޓަމްސް ރެކްރިއޭޝަން ކްލަބުގެ އައިޝަތު ޝައިމް އަޒީޒް ހޯދައިފިއެވެ.

އެންމެ ފަހުން ބޭއްވި އެތުލެޓިކްސް އެސޯސިއޭޝަން ޗެމްޕިއަންޝިޕްގެ އެންމެ މޮޅު ފިރިހެން އެތުލީޓުގެ މަޤާމު ހޯދީ ވެސް ޝައްމޫން އެވެ.

މި މަހުގެ 14 އިން 16 ގެ ނިޔަލަށް މާލޭ ކުޅިވަރު އެކުވެނި ސިންތެޓިކް ޓްރެކުގައި ކުރިއަށްދިޔަ ޤައުމީ އެތުލެޓިކްސް މުބާރާތުގެ ފިރިހެން ޑިވިޝަނުގެ އެއްވަނަ އެތުލީޓަކަށް ހޮވުނު ޝައްމޫން ވަނީ ޑިސްކަސް އުކުމުންނާއި ޝޮޓް ޕުޓް އުކުމުން ވެސް ރަން މެޑެލް ހޯދައިފައެވެ. މި ދެ އިވެންޓްގެ ޤައުމީ ރެކޯޑް އޮންނަނީ ވެސް އޭނާ އަތުގައެވެ.

އެންމެ މޮޅު އަންހެން އެތުލީޓުގެ މަޤާމު ހޯދި ޝައިމް ވަނީ، ތިން އިވެންޓަކުން ރަން މެޑެލް ހާސިލްކޮށްފައެވެ. އެހެންކަމުން މި ފަހަރުގެ ޤައުމީ އެތުލެޓިކްސް މުބާރާތުގެ އެންމެ ކާމިޔާބު އެތުލީޓަކީ ވެސް އައްޑޫ އަށް އުފަން، ޝައިމް އެވެ.

މި އަހަރުގެ ޤައުމީ އެތުލެޓިކްސް މުބާރާތުގައި ޤައުމީ ރެކޯޑެއް ޤާއިމުކުރި ޝައިމް ވަނީ އަންހެނުންގެ ޖެވަލިން އުކުމުގެ އިތުރުން ހައި ޖަމްޕް އަދި ލޯންގް ޖަމްޕް އިވެންޓުން ރަން މެޑެލް ހޯދައިފައެވެ.

ޤައުމީ އެތުލެޓިކްސް މުބާރާތުގެ އެންމެ މޮޅު އަންހެން ޓީމުގެ އިތުރުން ފިރިހެން ޓީމަށް ހޮވުނީ ވެސް ޓްރެކް އެންޑް ފީލްޑް އެސޯސިއޭޝަނެވެ.