ބައިނަލްއަގުވާމީ މުބާރާތްތަކުން ރަޝިއާގެ އެތުލީޓުން ސަސްޕެންޑް ކުރުމަށް ވޯލްޑް އެތުލެޓިކްސް ކައުންސިލުން ނިންމާފައިވާ ނިންމުން ދެމެހެއްޓުމާ ގުޅިގެން، ކުޅިވަރާ ބެހޭ އެންމެ މަތީ ކޯޓުގައި އެ ނިންމުން އިސްތިއުނާފުކޮށްފައިވާ ކަމަށް ރަޝިއާގެ އެތުލެޓިކްސް ފެޑެރޭޝަނުން ބުނެފިއެވެ.

ޔޫކްރެއިނަށް އަރައިގަތުމާ ގުޅިގެން މީގެ ހަތަރު އަހަރު ކުރިން އަޅާފައިވާ ފިޔަވަޅުތަކަށް ބާރުދީ، ރަޝިއާ އާއި ބެލަރޫސްގެ އެތުލީޓުން މުބާރާތްތަކުން ބާކީކުރުމަށް ވޯލްޑް އެތުލެޓިކްސްގެ ކައުންސިލުން ނިންމި ނިންމުން މި މަހުގެ ތިންވަނަ ދުވަހު ވަނީ އަލުން ދަމަހައްޓާފައެވެ. 

އެއާއެކު ރަޝިއާގެ އެތުލެޓިކްސް ފެޑެރޭޝަނުން މިއަދު ނެރުނު ބަޔާނެއްގައި ބުނެފައިވަނީ، މިއީ ތަފާތުކުރުންތަކެއް އެކުލެވޭ ނިންމުމެއް ކަމަށް އެ ފެޑެރޭޝަނުން ގަބޫލުކުރާ ކަމަށާއި، ކޯޓް އޮފް އާބިޓްރޭޝަން ފޯ ސްޕޯޓް (ކާސް) ގައި މި މައްސަލަ އިސްތިއުނާފުކޮށްފައިވާ ކަމަށެވެ.

އިންޓަރނޭޝަނަލް އޮލިމްޕިކް ކޮމިޓީ (އައިއޯސީ) އިން ރަޝިއާގެ އޮލިމްޕިކް ކޮމިޓީގެ ސަސްޕެންޝަނުގެ ބައެއް މިދިޔަ އަންގާރަ ދުވަހު އުވާލާފައިވީ ނަމަވެސް، ވޯލްޑް އެތުލެޓިކްސް ކައުންސިލްގެ މި ނިންމުމުގެ ސަބަބުން ރަޝިއާގެ އެތުލީޓުންނަށް ބައިނަލްއަގުވާމީ މުބާރާތްތަކުގައި ބައިވެރިވުމުގެ ފުރުސަތު އަދިވެސް އޮތީ ބަންދުވެފައެވެ. އައިއޯސީގެ މި ނިންމުމަކީ ރަޝިއާ އަލުން އޮލިމްޕިކް އާއިލާއާ ގުޅުމަށް އެޅުނު މުހިންމު ފިޔަވަޅެކެވެ.

2024 ވަނަ އަހަރުގެ ޕެރިސް އޮލިމްޕިކްސް އާއި މި އަހަރު ބޭއްވުމަށް ހަމަޖެހިފައިވާ މިލާނޯ ކޮރްޓީނާ ވިންޓަރ ގޭމްސްގައި ރަޝިއާގެ އެތުލީޓުން ބައިވެރިވެފައިވަނީ އަދި ބައިވެރިވާނީ ވަކި ގައުމަކަށް ނިސްބަތްނުވާ "ނިއުޓްރަލް" އެތުލީޓުންގެ ގޮތުގައެވެ.