ރިސޯޓުތަކުގައި ވަޒީފާ އަދަކުރާ މުވައްޒަފުންގެ ސާވިސް ޗާޖު ޑޮލަރުން ދިނުން ލާޒިމުކޮށް ވަޒީފާއާ ބެހޭ ގާނޫނަށް އިސްލާހު ގެނައުމަށް އިދިކޮޅު އެމްޑީޕީން ހުށަހެޅި ބިލު މަޖިލީހަށް ބަލައިގެންފި އެވެ. 

މި ބިލު މަޖިލީހަށް ހުށަހެޅުއްވީ ކެންދޫ ދާއިރާގެ އެމްޑީޕީގެ މެމްބަރު މައުރޫފް ޒާކިރެވެ.

އެ ބިލު ބަލައިގަތުމަށް މަޖިލީހުގެ މިއަދުގެ ޖަލްސާގައި ފެންނަ ކަމަށް 67 މެމްބަރުންނެވެ. ވޯޓު ދެއްވާފައި ވެއެވެ. ނުފެންނަ ކަމަށް އެއްވެސް މެމްބަރަކު ވޯޓު ދެއްވާފައެއް ނުވެ އެވެ. 

މި ބިލު ހުށަހެޅި ސަބަބެއް ކަމަށް މެމްބަރު ވިދާޅުވީ ވަޒީފާއާބެހޭ ޤާނޫނު ގައި ފަތުރުވެރިކަމުގެ ޞިނާޢަތުގައި ހިންގާ ވިޔަފާރިތަކުން ފޯރުކޮށްދޭ، ކޮންމެ ޚިދުމަތަކުން 10 އިންސައްތަ އަށްވުރެ މަދުނޫން ޢަދަދަކުން ސަރވިސްޗާޖް ނަގަންވާނެކަމަށާއި، އަދި ސަރވިސްޗާޖުގެ ގޮތުގައި ނަގާ ފައިސާ، ވަޒީފާދޭ ފަރާތުގެ ހުރިހާ މުވައްޒަފުންގެ މެދުގައި ހަމަހަމަކަމާއެކު ބަހަންވާނެކަމަށް ބަޔާންކޮށްފައިވީ ނަމަވެސް، ސަރވިސްޗާޖުގެ ގޮތުގައި ނަގާ ފައިސާ ބާވަތުން ބެހުމުގައި އަމަލުކުރާ ގޮތުގެ ސަބަބުން ކަމަށެވެ. ގާނޫނުގައި އެގޮތަށް ބަޔާންވެފައިވިޔަސް އޭގެ ބަދަލުގައި އެ ފައިސާ މާރުކޮށްގެން، ބައެއް ތަންތަނުން، މުވައްޒަފުންނަށް ދިވެހި ރުފިއާއިން ސަރވިސްޗާޖު ދިނުމުގެ ސަބަބުން، ސަރވިސްޗާޖުގެ ގޮތުގައި ނަގާ ފައިސާ، މުވައްޒަފުންގެ މެދުގައި ބެހުމަށް ލާޒިމުކޮށް، މި ޤާނޫނުގައި ކަނޑައަޅައިފައިވާ އުސޫލުގެ މަންފާ އެންމެ ފުރިހަމައަށް މުވައްޒަފުންނަށް ލިބުމަށް ހުރަސްއެޅޭ ކަމަށް ވަނީ ބުނެފަ އެވެ.

ބިލު ހުށަހެޅުމުގެ މައިގަނޑު މަޤްޞަދަކީ، ފަތުރުވެރިކަމުގެ ޞިނާޢަތުގައި މަސައްކަތްކުރާ މުވައްޒަފުންނަށް ވަޒީފާއާބެހޭ ޤާނޫނުން، ކަށަވަރުކޮށްދީފައިވާ ސަރވިސްޗާޖް ލިބުމުގެ ޙައްޤު އެންމެ ފުރިހަމައަށް ތަނަވަސްކޮށްދިނުންކަމަށް ބިލުގައި ވަނީ ބަޔާންކޮށްފަ އެވެ. 

ބިލު މަޖިލީހަށް ބަލައިގަނެ އިތުރަށް ދިރާސާ ކުރުމަށް ސަލާމަތީ ހިދުމަތްތަކާ ބެހޭ ކޮމިޓީއަށް މިހާރު ވަނީ ފޮނުވައިފަ އެވެ.