ހަނގުރާމައިގެ ސަބަބުން ދައުލަތުގެ ބޭރު ފައިސާގެ ރަސްމީ ރިޒާވްއަށް ހީނަރުކަމެއް އައިސްފައިނުވާކަމަަށާއި، މި އަހަރު އަދާކުރަންޖެހޭ ސުކޫކުގެ ޕޭމެންޓު އަށެއް އޭޕްރީލުގައި ކުރިންވެސް އަދާކުރުމަށް ރޭވި ގޮތަށް އަދާކުރެވޭނެ ކަމުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

މިއަދު ނޫސްވެރިންނާ ބައްދަލުކުރައްވައި މިހާރު ހިނގަމުންދާ މެދުއިރުމަތީގެ ހަނގުރާމައާއި އެ ހަނގުރާމައިގެ ސަބަބުން ދިވެހިރާއްޖެއަށް ކުރަމުންދާ އަސަރުތަކާއި، އެ އަސަރުތައް ކުޑަކުރުމަށް ސަރުކާރުން އަޅަމުންދާ ފިޔަވަޅުތަކުގެ މައްޗަށް އަލިއަޅުވައިލައްވައި ރައީސް ވިދާޅުވީ އެ ހަނގުރާމައިގެ ސަބަބުން ކުރިމަތިވާ ގޮންޖެހުންތަކުން އަރައިގަތުމަށް ރާއްޖެއިން ހާލަތު ކައިރިން ބަލައި ތައްޔާރުވުމަށް ކުރަންޖެހޭ މަސައްކަތްތައްް ކުރަމުންދާ ކަމަށެވެ. 

އެގޮތުން ތެޔޮ ލިބުމުގައި ދަތިތަކެއް ކުރިމަތިނުވާނެކަން ކަށަވަރުކުރުމަށް ގިނަ މަސައްކަތްތަކެއް ކުރެވި އިއްޔެ އައު ތެޔޮ ޝިޕްމެންޓެއް ގެނެވިފައިވާއިރު، އަންނަ މަހުވެސް އިތުރު ތެޔޮ ޝިޕްމެންޓުތަކެއް ރާއްޖެއަށް ގެނައުމަށް ހަމަޖައްސަންޖެހޭ އިންތިޒާމުތައް ހަމަޖައްސަވާފައިވާ ކަމަށް ރައީސް ވިދާޅުވިއެވެ. 

ތެޔޮ ގެނެވި ތެލުގެ ސްޓޮކް ދެމެހެއްޓެނެވި ގޮތެއްގައި ބެލެހެއްޓެމުންދާކަމުގެ ޔަގީންކަން ދެއްވަމުން ރައީސް ވިދާޅުވީ ތެލުގެ އަގަށް ހަނގުރާމައިގެ ސަބަބުން އަންނަމުންދާ އަސަރުތައް ރައްޔިތުންނާ ހަމައަށް ފޯރާ މިންވަރު ވީހާވެސް ކުޑަކުރުމަށް ގިނަ މަސައްކަތްތަކެއް ސަރުކާރުން ކުރަމުންދާ ކަމަށެވެ. އަދި އެ އަސަރު ކުޑަކުރުމަށް ސަރުކާރުން މަސައްކަތްކުރަނީ އެ ދާއިރާގައި ހަރަަކާތްތެރިވާ އަމިއްލަ ވިޔަފާރިތައްވެސް ބައިވެރިކޮށްގެން ކަމަށް ވިދާޅުވިއެވެ. 

އިތުރަށް ރައީސް ވިދާޅުވެފައިވަނީ ދައުލަތުގެ ޖުމްލަ ރިޒާވް 18 މާޗާ ހަމައަށް އައިއިރުވެސް ހުރީ 1.2 ބިލިއަން ޑޮލަރަށްވުރެ މަތީގައި ކަމަށެވެ. އަދި ޔޫޒަބަލް ރިޒާވްވެސް ހުރީ 300 މިލިއަން ޑޮލަރަށްވުރެ މަތީގައި ކަމަށް އެމަނިކުފާނު ވިދާޅުވިއެވެ. އެއާއެކު ކުރިން ރޭވި ގޮތަށް ޔޫޒަބަލް ރިޒާވްގައި ހުރި ފައިސާއާއި ސޮވެރިން ޑިވެލޮޕްމެންޓު ފަންޑުގައި ރައްކާކޮށްފައި ހުރި ފައިސާ ބޭނުންކޮށްގެން އޭޕްރީލު މަހުގެ އަށްވަނަ ދުވަހު ސުކޫކުގެ ޕޭމެންޓު ހަދައި ނިންމައިލެވޭނެ ކަމުގައި ރައީސް ވިދާޅުވިއެވެ.