އައްޑޫ ސިޓީ ފޭދޫ ބަނދަރު ބޭރުގައި އަޅާފައި އޮތް ޑައިވިން ދޯންޏެއްގައި އަލިފާން ރޯވެގެން އަލިފާން ނިއްވަން މަސައްކަތް ކުރަމުން ދަނިކޮށް އެދޯނި އަޑިއަށް ގޮސްފައިވާ ކަމަށް، މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.

އެމްއެންޑީއެފް އިން ބުނި ގޮތުގައި އަލިފާން ރޯވި ކަމުގެ ރިޕޯޓް ކޮށްފައިވަނީ، މިއަދު މެންދުރު 13:30 ކަން ހާއިރުއެވެ.

މީގެ އިތުރުން މި ހާދިސާގެ މައުލޫމާތު ލިބުމާއެކު އެމްއެންޑީއެފްގެ ސަދަން އޭރިއާ ކޮމާންޑް، އައްޑޫ ސިޓީ ހިތަދޫ ފަޔަރ ސްޓޭޝަނުން ހަރަކާތްތެރިވެފައިވާ އިރު، އަލިފާން ނިއްވުމުގެ މަސައްކަތް ކުރަމުން ދަނިކޮށް މިއަދު 3:15 ހާއިރު އެ ދޯނި އަޑިއަށްގޮސްފައިވާކަމަށް އެމްއެންޑީއެފުން ވަނީ ބުނެފައެވެ. 

ޑައިވިން ދޯނީގައި އަލިފާން ރޯވުމާއެކު ދޯނީގައި ތިބި މީހުން އެރީ ދޯނި ކައިރީގައި އޮތް ސަފާރީއަކަށެވެ.

އެމްއެންޑީއެފް އިން މައުލޫމާތު ދިން ގޮތުގައި، މި ހާދިސާގައި އެކެއްގެ ފައި ފިހިގެން އައްޑޫ ސިޓީ ފޭދޫ ސިއްހީ މަރުކަޒުގައި ފަރުވާ ދިނުމަށްފަހު ވަނީ ދޫކޮށްލާފައެވެ.

އެ ދޯނީގައި އަލިފާން ރޯވި ސަބަބެއް އަދި މިހާތަނަށް އެނގިފައެއް ނުވެއެވެ.