ކުރިއަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބަށް ތައްޔާރުވުމުގެ ގޮތުން ހދ. އަތޮޅުގެ ކެމްޕޭނަށް ޚާއްޞަ ޖަގަހައެއް މާލޭގައި ހުޅުވައިފި.

މާލޭގައި ގާއިމުކުރި ހދ. އަތޮޅު ކެމްޕޭން ޖަގަހަ ނައިބު ރައީސް ހުޅުއްވައިދެއްވަނީ. ފޮޓޯ: ޕީއެންސީ

މާރިޗު 6 ވަނަ ދުވަހުގެ ރޭ މި ކެމްޕޭން ޖަގަހަ ހުޅުއްވައިދެއްވީ ރައީސުލްޖުމްހޫރިއްޔާގެ ނާއިބު އަލްއުސްތާޒު ޙުސައިން މުހައްމަދު ލަތީފް. މި ޖަގަހަ ޤާއިމުކުރީ އިރުދޭމާ ހިނގުމުގައި ހުންނަ ހ.އޮއިސްޓަރގަ. 

ޖަގަހަ ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާގެ ނާއިބުގެ އަރިހުގައި، ޕާޓީގެ ލީޑަރޝިޕްގެ ބޭފުޅުން އަދި ކެންޑިޑޭޓުން ބައިވެރިވެވަޑައިގެންނެވި. ޚާއްޞަކޮށް، ހދ. އަތޮޅުގެ އެކި ދާއިރާތަކަށް ވާދަކުރައްވާ ކެންޑިޑޭޓުން ބައިވެރިވެވަޑައިގެންފައިވޭ. 

ކެމްޕޭން ޖަގަހަ ހުޅުވި ޙަފްލާގައި ބައިވެރީން. ގިނަ އަދަދެއްގެ ބަޔަކު ޙަފްލާއަށް ހާޒިރުވި. ފޮޓޯ: ޕީއެންސީ

ޖަގަހަ ހުޅުވުމުގެ ޙަފްލާގައި ރައީސުލްޖުމްހޫރިއްޔާގެ ނާއިބު އަލްއުސްތާޒު ހުސެއިން މުހައްމަދު ލަތީފާއި، ވިލިމާލޭ ދާއިރާގެ މެމްބަރު އަދި ކޮންގްރެސް ޕާޓީގެ ޑެޕިއުޓީ ޕީޖީ ލީޑަރު މުހައްމަދު އިސްމާއީލާއި، އިގްތިސާދީ ތަރައްގީއާ ވިޔަފާރިއާ ބެހޭ ވުޒާރާގެ ސްޓޭޓް މިނިސްޓަރު ހުސެއިން ޒާމިރާއި، ހދ. ނައިވާދޫ ކައުންސިލުގެ ރައީސް އަލީ ރަޝީދާއި، ހދ. ވައިކަރަދޫ ކައުންސިލް މެމްބަރު ކަމަށް ވާދަކުރައްވާ ހުދާ މުހައްމަދު ވާހަކަދައްކަވާފައިވޭ. 

ހދ. އަތޮޅުގެ ކެމްޕޭން ޖަގަހަ ހުޅުވުމުގެ ޙަފްލާގައި ކެންޑިޑޭޓަކު ވާހަކަދައްކަވަނީ. އަތޮޅުތެރޭގެ ކެމްޕޭން ޖަގަހަތައް ވެސް މާލޭގައި އަންނަނީ ހުޅުވަމުން. ފޮޓޯ: ޕީއެންސީ

 ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ ވޯޓުލުން އޮންނާނީ އޭޕްރީ 4 ވަނަ ދުވަހު.