ހުވަދު އަތޮޅު ފަރެސްމާތޮޑާގެ ފުޓްބޯޅަ ދަނޑު ތަރައްޤީ ކުރުމުގެ މަސައްކަތްތަކުގެ ތެރެއިން މިހާރު ކުރިއަށްދަނީ ދަނޑުގެ ވަށާފާރުގެ ފެންސް ޖަހައި، ވެލްޑިންގ ކުރުމުގެ މަސައްކަތް ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނެފިއެވެ.

ދެ އަހަރު ދުވަހުގެ ދިގު މުއްދަތަކަށް ހުއްޓިފައި އޮތް ގދ. ފަރެސްމާތޮޑާގެ ފުޓްބޯޅަ ދަނޑުގެ މަސައްކަތްތައް މި ސަރުކާރުން އެމްޓީސީސީއާ ހަވާލުކޮށްގެން ފަށާފައިވަނީ މިދިޔަ އަހަރުގެ ތެރޭގައެވެ.

ފަރެސްމާތޮޑާގައި ތަރައްޤީކުރުމަށް ހަމަޖެހިފައިވާ ފުޓްބޯޅަ ދަނޑުގެ މަސައްކަތްތަކުގެ ތެރޭގައި، ފީފާ އިން ކަނޑައަޅާފައިވާ ފެންވަރުގެ ޓާފެއް އެޅުމާއި، ގޯލް ޕޯސްޓް ހަރުކުރުމާއި، ފެންސެއް ޖެހުމާއި އަދި ހަތަރު ބެންޗު ބެހެއްޓުމުގެ މަސައްކަތް އެ މަޝްރޫޢުގެ ތެރޭގައި ހިމެނެއެވެ.

ގާތްގަނޑަކަށް 1،800 މީހުންގެ އާބާދީއެއް ހިމެނޭ، ގދ. ފަރެސްމާތޮޑާގައި އޮންނަ ފުޓްބޯޅަ ދަނޑު ތަރައްޤީ ކުރުމާއެކު، އިޖުތިމާޢީ ގޮތުން ގިނަގުނަ މަންފާތަކަކާއި ފަސޭހަތަކެއް އެ ރަށު ރައްޔިތުންނަށް ލިބޭނެއެވެ.

މިއީ ރާއްޖޭގެ އެކި ރަށް ރަށުގައި ކުރިއަށް ނުގޮސް ހުއްޓިފައިހުރި މަޝްރޫޢުތައް ފުރިހަމަކުރުމަށް ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވަޢުދުވެފައިވާ ފަދައިން އެމްޓީސީސީއާ ހަވާލުކުރި މަޝްރޫޢެކެވެ.

ރާއްޖޭގެ އެކި ސަރަހައްދުތަކުގައި ކުރިއަށްގެންދާ ޕްރޮޖެކްޓްތައް ވީހާވެސް އަވަހަށް ނިންމައި ކުޅިވަރުގެ ގިނަ ވަސީލަތްތަކެއް ރަށްރަށުގައި ގާއިމްކުރުމަކީ ރައީސް ޑރ. މުޙައްމަދު މުޢިއްޒުގެ ވަޢުދުފުޅެކެވެ.