މިއަދު 26 މިސްކިތެއްގައި ޚުތުބާ ދީ އިމާމުވެ ހުކުރު ކުރީ ޒުވާން ޚަތީބުން ކަމުގައި އިސްލާމީ ކަންތައްތަކާއި ބެހޭ ވުޒާރާއިން ބުނެފި އެވެ.

ވުޒާރާއިން ވަނީ މިއަދަކީ ތާރީހީ ހުކުރެއްގެ ގޮތުގައި ސިފަކޮށްފަ އެވެ. 

އެގޮތުން މާލޭގެ އެންމެ ބޮޑު މިސްކިތްތައްކަމަށްވާ އިސްލާމީ މަރުކަޒާއި ސަލްމާން މިސްކިތް ހިމެނޭހެން 26 މިސްކިތެއްގައި މިއަދު ޒުވާން ޚަޠީބުން އިމާމުވެ ހުކުރު ކޮށްފައި ވެއެވެ.

އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ރޭ ވިދާޅުވީ، ޒުވާން ޚަޠީބުންނަށް މި ފުރުސަތު ދޭން ނިންމާފައިވަނީ އު ޒުވާނުންގެ ލީޑާޝިޕް ބަލައިގަންނަކަމާއި އިސްލާމީކަންކަން ހިންގުމާއި އިސްލާމީ ޚިދުމަތުގައި އެ ޒުވާނުންނަށް އޮތް ފުރުސަތުގެ ތަނަވަސްކަން ޔަޤީންކޮށްދިނުމަށް ކަމަށެވެ.

އަދި މިއީ ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު ޒުވާން ޖީލު ބިނާކުރެއްވުމަށް ފެއްޓެވި މަސައްކަތްޕުޅަށް ބާރު ދިނުމުގެ ގޮތުން ކުރެވިގެންދާކަމެއްކަމަށް ވަޒީރު ވިދާޅުވިއެވެ.

އިސްލާމީކަންތައްތަކާ ބެހޭ ވުޒާރާއިން ފަށާފައިވާ ޒުވާން ޚަޠީބުން ތަމްރީން ޕްރޮގުރާމުގެ ދަށުން މިހާތަނަށް 500 އަށްވުރެ ގިނަ ޒުވާން ޚަޠީބުން ތަމްރީންކުރެވިފައިވާއިރު، ވުޒާރާގެ އަމާޒަކީ މި ފަސް އަހަރު ތެރޭގައި 1،000 ޒުވާން ޚަޠީބުން ތަމްރީން ކުރުމެވެ.