ފާއިތުވި ދޮޅުމަހެއްހާ ދުވަހުގެ ތެރޭގައި 7،000 ވޭޕް ސްޓިކް މޯލްޑިވްސް ކަސްޓަމުން އަތުލައިގަނެފައި ވާކަމަށް  ދާޚިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙުސާން ވިދާޅުވެއްޖެ އެވެ. 

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ވަނީ ދާހިލީ ސަލާމަތާއި ފަންނިއްޔާތާ ބެހޭ ވުޒާރާގެ އެކި ބަހާތަކުން ކުރަމުން އަންނަ މަސައްކަތްތަކުގެ އެންމެ ފަހުގެ އަދާހަމަ މައުލޫމާތު ނޫސްވެރިންނާ ހިއްސާކުރައްވާފަ އެވެ. 

އެގޮތުން ރާއްޖެއަށް މަނާ ތަކެތި އެތެރެކުރުން ހުއްޓުވުމަށް ކަސްޓަމުން ހިންގަމުންދާ އޮޕަރޭޝަންތަކުގެ ފަހުގެ މައުލޫމާތު ދެއްވަމުން ވަޒީރު ވިދާޅުވީ ދުންފަތާ ބެހޭ ޤާނޫނަށް ގެނައި އިސްލާހުގެ ދަށުން ވޭޕް ވިއްކުމާއި، ބޭނުންކުރުމުގެ އިތުރަށް ވޭޕްއާއި، އެއާ ގުޅުންހުރި ސާމާނު ރާއްޖެއަށް އެތެރެކުރުން މަނާކޮށްފައިވާއިރު ފާއިތުވީ ދޮޅު މަހުގެ ތެރޭގައި ވަގަށް އެތެރެކުރަނިކޮށް 7،000 ވޭޕް ސްޓިކް އަތުލައިގެންފައި ވާކަމަށެވެ. އޭގެ ތެރޭގައި ގަވާއިދާ ހިލާފަށް އެތެރެކުރަނިކޮށް އަތުލައިގެން ސިނގިރޭޓު ވެސް ހިމެނެ އެވެ. 

ޤާނޫނަށް އިޞްލާޙު ގެނެސް، ވޭޕް ވިއްކުމާއި، ބޭނުންކުރުމާއި ވޭޕްއާ ގުޅުންހުރި ތަކެތި މަނާކުރީ 2024 ނޮވެމްބަރު 15 އިން ފެށިގެންނެވެ. 

ރާއްޖޭގައި ދުންފަތުގެ ގާނޫނު ހަރުކަށި ކުރުމުން ވަގަށް ސިނގިރޭޓް އެތެރެކުރުމުގެ މަސައްކަތް ކުރާ މީހުން ހުއްޓުވަން ސަރުކާރުން ވަނީ ކާމިޔާބު މަސައްކަތްތަކެއް ކޮށްފަ އެވެ. މިހާރުވެސް އެފަދަ ބޮޑެތި އެތައް މައްސަލަތަކެއް ދަނީ ބަލަމުން ނެވެ.

އެކަމުގައި ވަކި މީހަކަށް ބެލުމެއް ނެތި ސަރުކާރުގެ އިދާރާތަކުން ދަނީ ގާނޫނު ތަންފީޒު ކުރަމުން ނެވެ.