ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމުގެ މަސައްކަތް ރޯދައިގެ ފަހުން ފެށިގެން ދާނޭ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ. 

މިއަދު ސޯޝަލް މީޑިއާގައި އާއްމު ކުރެއްވި ޕޯސްޓެއްގައި ވަޒީރު ވިދާޅުވީ ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމުގެ މަސައްކަތް ރޯދަމަހުގެ ފަހުން ފެށިގެންދާނެ ކަމަށެވެ. އަދި މި މިސްކިތް އެޅުމަށް ބޭނުންވާ މިކަމަށް އެހީތެރިކަން ދީލަތި ފަރާތަކުން ހަމަޖައްސާދީފައިވާ ކަމަށާއި މި މިސްކިތާއެކު މާލެގެ ބޮޑެތި ހުރިހައި މިސްކިތެެއް އައުވެގެން ދިޔައީ ކަމަށް ވަޒީރު ވިދާޅުވި އެވެ.

ރައީސުލްޖުމުހޫރިއްޔާ ޑރ. މުޙައްމަދު މުޢިއްޒުގެ ޒަޢާމަތުގައި އިސްލާމީ ދާއިރާއިން ގިނަ މަޝްރޫޢުތަކެއް އަންނަނީ ކުރިއަށް ގެންދަމުންނެވެ. 

އެގޮތުން މި އަހަރުގެ ރިޔާސީ ބަޔާނުގައި ރަމަޟާން މަހަށް މުޅިން އަލަށް 15 މިސްކިތް ހުޅުވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާނު ކުރެއްވި ކުރެއްވުމާ އެއްގޮަށް މި އަހަރުގެ ރަމަޟާން މަހުގެ މިހާތަނަށް 15 މިސްކިތް ހުޅުވާފައިވާ ކަމަށް އިސްލާމީ ކަންތައްތަކާއި ބެހޭ ވުޒާރާއިން ވަނީ ބުނެފަ އެވެ.

އޭގެ ތެރޭގައި ސަރުކާރުން ބިނާކުރި މިސްކިތްތަކާއި އަމިއްލަ ފަރާތްތަކުން ބިނާކުރި މިސްކިތްތައް ހިމެނެ އެވެ. 

 ރޯދަ މަސް ނިމޭއިރަށް ހުޅުވޭ މިސްކިތްތަކުގެ އަދަދު ވިއްސަށް އަރާނެ ކަމަށް ބެލެވޭ ކަމަށް ސަރުކާރުން މައުލޫމާތު ދެއެވެ. 

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޒަޢާމަތުގައި މިސްކިތްތައް ބެލެހެއްޓުމާއި މާރަމާތު ކުރުމާއި މިސްކިތްތައް ބިނާކުރުމަށް ވަރަށް ޚާއްސަ ސަމާލު ކަމެއް ދެއްވަމުން ގެންދަވަ އެވެ. ޚާއްސަކޮށް ބައު މިސްކިތްތަކުގެ ބަދަލުގައި ޒަމާނީ މިސްކިތްތައް ބިނާކުރުމުގެ ބޮޑު މަޝްރޫޢުއެއް ދަނީ ހިންގަމުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާއި އެއްގޮތަށް މާލެ ސަރަޙައްދުގައި ހުރި ބޮޑެތި މިސްކިތްތަކުގެ މައި ހޯލާއި އަންހެނުން ނަމާދުކުރާ ބައި އޭސީކޮށް ނިންމާ ބޭނުންކުރަން ވެސް މި ރޯދަ މަހު ވަނީ ފަށާފަ އެވެ.