ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބަށް ތައްޔާރުވުމުގެ ގޮތުން، ޕީޕަލްސް ނޭޝަނަލް ކޮންގްރެސް ޕާޓީ (ކޮންގްރެސް) ޕާޓީގެ ގަލޮޅު އުތުރު ދާއިރާގެ ކެމްޕޭން ޖަގަހަ ފަސްޓް ލޭޑީ ސާޖިދާ މުޙައްމަދު ހުޅުއްވައިދެއްވައިފިއެވެ. 

ގަލޮޅު އުތުރު ދާއިރާގެ ޖަގަހަ ހުޅުވީ ހުސްނުހީނާ މަގު، ގ. ހެޕީސައިޑްގައެވެ. 

ޖަގަހަ ހުޅުއްވައިދެއްވުމުގެ ޙަފްލާގައި، ފަސްޓް ލޭޑީގެ އަރިހުގައި ކޮންގްރެސް ޕާޓީގެ ޕީޖީ ލީޑަރު އަދި މިފަހަރުގެ ކެމްޕޭންގެ އެ ޕާޓީގެ ކެމްޕޭން މެނޭޖަރު އިބްރާހީމް ފަލާޙްއާއި ޕާޓީގެ ލީޑަރޝިޕްގެ ބޭފުޅުން ބައިވެރިވެވަޑައިގެންނެވިއެވެ. 

ޙަފްލާގައި ކޮންގްރެސް ޕާޓީގެ ފަރާތުން މާލޭ ސިޓީގެ މޭޔަރުކަމުގެ މަޤާމަށް ވާދަކުރައް މޫސާ ޢަލީ ޖަލީލް އާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ ރައީސާ ކަމަށް ވާދަކުރައްވާ އަލްއުސްތާޛާ އާޝިޔަތު އަލައިކާ އަދުނާންގެ އިތުރުން ގަލޮޅު އުތުރު ދާއިރާގެ ކެންޑިޑޭޓުން ވެސް ބައިވެރިވެވަޑައިގެންނެވިއެވެ. މި ދާއިރާއިން މާލޭ ސިޓީ ކައުންސިލްގެ މެންބަރުކަމުގެ މަޤާމަށް ވާދަކުރައްވަނީ މިހާރުގެ ވެސް މެންބަރު މަރްޔަމް ރީހާން ނާޒީމް އެވެ. އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވާދަކުރައްވަނީ ޚަދީޖާ ޖަމީލް އެވެ. 

ޙަފްލާގައި ޚާރިޖީ ވަޒީރު ޑރ. ޢަބްދުﷲ ޚަލީލްއާއި ފުނަދޫ ދާއިރާގެ ރައްޔިތުންގެ މަޖިލީހުގެ މުޙައްމަދު މަމްދޫޙް ވާހަކަދެއްކެވިއެވެ. 

ވަޒީރު ޑރ. ޚަލީލް އަދި މެންބަރު މަމްދޫހްގެ ވާހަކަފުޅުގައި ވަނީ، މިފަހަރުގެ އިންތިޚާބުގައި ވެރިކަންކުރާ ކޮންގްރެސް ޕާޓީގެ މެންބަރުންނަށް ވޯޓުދިނުމުގެ މުހިއްމުކަމަށް އަލިއަޅުއްވާލައްވައިފައެވެ. އަދި، ސަރުކާރުގެ މަޝްރޫޢުތައް ކާމިޔާބުކަމާއެކު ނިންމާލުމުގައި ކޮންގްރެސް ޕާޓީއަށް ވޯޓު ދިނުމަށް އިލްތިމާސްކުރައްވާފައިވެއެވެ.