މަތީ ތަޢުލީމާއި ތަމްރީނުގެ ދާއިރާ ފުޅާކުރުމަށް، ރ. އިންނަމާދޫއާއި ރ. ހުޅުދުއްފާރުގައި މުހިއްމު ދެ މަޝްރޫޢެއް ކުރިއަށްގެންދިއުމުގެ އެއްބަސްވުމުގައި މިއަދު ސޮއިކޮށްފިއެވެ. 

މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓުން ކުރިއަށްގެންދާ މި މަޝްރޫއުތަކުގެ ދަށުން، ރ. އިންނަމާދޫގައި ޓެކްނިކަލް ވޮކޭޝަނަލް އެޑިޔުކޭޝަން އެންޑް ޓްރެއިނިންގ (ޓިވެޓް) ސެންޓަރެއް ބިނާކުރުމާއި، ރ. ހުޅުދުއްފާރުގައި އެކަމަޑޭޝަން ފެސިލިޓީއެއް ތަރައްޤީކުރާނެއެވެ. 

ޑިޒައިން އެންޑް ބިލްޑް އުސޫލުން ތަރައްޤީކުރާ މި މަޝްރޫއުތަކަކީ ދަރިވަރުންނަށް އެ ރަށްތަކުގައި ތިބެގެން މަތީ ތަޢުލީމާއި ތަމްރީނު ހޯދުމުގެ ފުރުޞަތު ފަހިކޮށްދިނުމަށް ފެށި މަސައްކަތްތަކެއް ކަމަށް ވުޒާރާއިން ވަނީ ބުނެފައެވެ. 

އިންނަމާދޫގައި ތަރައްޤީކުރާ ޓިވެޓް ސެންޓަރު ޚާއްޞަކުރާނީ ރާއްޖޭގެ ސަގާފީ އަދި އިޤްތިޞާދީ ގޮތުން މުހިންމު ދާއިރާއެއް ކަމަށްވާ ބޯޓް-ބިލްޑިންގ ނުވަތަ ދޯނިފަހަރު ބަނުމުގެ ދާއިރާއިން މީހުން ތަމްރީނު ކުރުމަށެވެ.

މަސައްކަތުގެ ދުވެލި އަވަސްކުރުމުގެ ގޮތުން މި އިމާރާތުގެ މަސައްކަތް ކުރިއަށްގެންދަން ނިންމާފައިވަނީ ޕްރީ-ފެބް އުސޫލުންނެވެ. މި އިންސްޓިޓިއުޓްގައި ކިޔަވައިދިނުމަށް ބޭނުންވާނެ އެންމެހާ ޒަމާނީ ވަޞީލަތްތައް ޤާއިމުކުރުމަށް ވަނީ ހަމަޖެހިފައެވެ.

މި މަޝްރޫއުގެ މަސައްކަތް ކުރިއަށް ގެންދިއުމަށް ހަވާލުކުރީ ސެންޓްރަލް ލައިން ޕްރައިވެޓް ލިމިޓެޑާއެވެ. 

ހުޅުދުއްފާރުގައި އެކަމަޑޭޝަން ފެސިލިޓީއެއް ގާއިމުކުރަނީ، އެރަށުގައި ކިޔަވާ ދަރިވަރުންނަށް ބޯހިޔާވަހިކަން ފޯރުކޮށްދިނުމުގެ ގޮތުންނެވެ. މި ފެސިލިޓީގައި ތަފާތު މޮޑެލްތަކުގެ އެކަމަޑޭޝަން ހިމެނެއެވެ. އެގޮތުން ދަރިވަރުންގެ އާއިލާތަކަށް އެކުގައި ތިބެވޭނެ ފަދަ 2 ކޮޓަރީގެ އަދި 3 ކޮޓަރީގެ އެޕާޓްމަންޓްތަކުގެ އިތުރުން، ވަކިން ދިރިއުޅެވޭނެ ސްޓޫޑިއޯ އެޕާޓްމަންޓްތައް ހުންނާނެއެވެ. ކޮންމެ އެޕާޓްމަންޓެއްގައިވެސް ކެއްކުމާއި ލޯންޑްރީ ފަދަ އަސާސީ ހުރިހާ ޚިދުމަތްތަކެއް ލިބެން ހުންނާނެއެވެ.

މި މަޝްރޫއުގެ މަސައްކަތް ހަވާލުކުރީ އެމް.ޓީ.ސީ.ސީ އާއެވެ.

މަޝްރޫޢުތަކުގެ އެއްބަސްވުމުގައި ސޮއިކުރުމުގެ ރަސްމިއްޔާތުގައި ވާހަކަދައްކަވަމުން ހަޔަރ އެޑިއުކޭޝަން މިނިސްޓަރ ޢަލީ ހައިދަރު އަޙްމަދު ވިދާޅުވީ، މި މަޝްރޫއުތަކުގެ މައިގަނޑު ބޭނުމަކީ ރަށުގައި ތިބެގެން ފެންވަރު ރަނގަޅު ތަޢުލީމު ހޯދުމުގެ ފުރުޞަތު ރައްޔިތުންނާ ވީހާވެސް ގާތުން ފޯރުކޮށްދިނުން ކަމަށެވެ. 

މި މަޝްރޫއުތަކުގެ ސަބަބުން މަސައްކަތްތެރިކަމުގެ ބާޒާރަށް ބޭނުންވާ ފަންނީ އަދި ހުނަރުވެރި ދިވެހި ޒުވާނުން އުފެއްދުމަށް ބޮޑު ބާރަކަށް ވެގެންދާނެކަމަށް ވަޒީރު ވިދާޅުވިއެވެ.  

ސަރުކާރުގެ އަމާޒަކީ ދިވެހި ކޮންމެ ކުއްޖަކަށްވެސް، އެކުއްޖަކު ހުރި ރަށަކުން ނުވަތަ ކައިރި ރަށަކުން މަތީ ތަޢުލީމުގެ ފުރުޞަތު ހޯދައިދިނުންކަމަށް ވަޒީރު ވިދާޅުވިއެވެ.

ވަޒީރު ވަނީ މަސައްކަތް ހަވާލުކުރެވުނު ކޮންޓްރެކްޓަރުންނަށް، ވީ އެންމެ އަވަހަކަށް ޑިޒައިންގެ މަސައްކަތްތައް ނިންމައިދެއްވާ އަމަލީ މަސައްކަތް ފެށުމަށް އިލްތިމާސްކުރައްވާފައެވެ.