ފުވައްމުލަކު ސިޓީ އިގްތިސާދީ ހަބެއްގެ ގޮތުގައި ތަރައްގީކުރުމަކީ ތަސައްވުރެއްކަމަށް ކުރިއަށް އޮތް ލޯކަލް ކައުންސިލް އިންތިހާބުގައި ޕީއެންސީގެ ޓިކެޓްގައި ފުވައްމުލަކު މޭޔަރުކަމަށް ވާދަކުރައްވާ އަލީ މަސީހް ވިދާޅުވެއްޖެއެވެ.

ޕީއެންސީން ފުވައްމުލަކުގައި ރޭ ބޭއްވި ޖަލްސާގައި ވާހަކަދައްކަވަމުން މަސީހް ވަނީ އެ ދާއިރާއާ މެދު އޭނާ ގެންގުޅުއްވާ ތަސައްވުރު ރައްޔިތުންނާ ހިއްސާކުރައްވާފައެވެ. 

އެގޮތުން ފުވައްމުލަކަކީ އިގްތިސާދީ ގޮތުން ވަރުގަަދަ ތަނަކަށް ހެދުމަކީ ބޮޑު އަމާޒެއްކަމަށާއި އިގްތިސާދީ ހަބެއްގެ ގޮތުގައި އެ ސިޓީ ތަރައްގީކުރުމަށް ކައުންސިލްގެ ދައުރުގައި ގިނަ މަސައްކަތަކެއް ކުރައްވާނެކަމަށް ވިދާޅުވިއެވެ.

ފުވައްމުލައް ރައްޔިތުން ވަޒީފާގެ ފުރުސަތުތައް ބޭނުންވާކަމަށާއި އެ ސީޓީގައި ތިބެގެން ވިޔަފާރިކުރުމުގެ ފުރުސަތުތައް ވެސް ރައްޔިތުން ބޭނުންވާކަމަށް މަސީހު ވިދާޅުވިއެވެ.

ވިޔަފާރީގެ ފުރުސަތުތައް ފުވައްމުލަކު ރައްޔިތުން ބޭނުންވީނަމަވެސް ފުވައްމުލަކުގެ ވިޔަފާރިކުރާ ފަރާތްތަކާއި ޒުވާނުންނާއި އިންވެސްޓަރުންނަށް ކައުންސިލުގެ ތެރެއިން އެފުރުސަތު މިއަދު ފަހިކޮށްދީފައި ނުވާކަމަށް މަސީހު ވިދާޅުވިއެވެ. 

އެހެންކަމުން އަންނަ ދައުރަށް ކުރިމަތިލީ އެ ފުރުސަތުތައް ރައްޔިތުންނަށް ފަހިކޮށްދިނުމަށް ކަމަށް މަސީހު ވިދާޅުވިއެވެ. 

މަސީހު އިތުރަށް ވިދާޅުވީ އަބަދުވެސް މަސައްކަތް ކުރައްވާނީ ރައްޔިތުންނާ ގާތުން ކަމަށާއި އޭނާއަކީ ފުވައްމުލަކުގެ ކޮންމެ އުމުރުފުރާއެއްގެ މީހަކާއި ވެސް ވާހަކަ ދެކެވޭ ފެންވަރުގެ މީހެއްކަމަށެވެ. 

ޕީއެންސީގެ ޓިކެޓްގައި ފުވައްމުލަކު މޭޔަރުކަމަށް ވާދަކުރަން ނިންމީ ފުވައްމުލަކު ރައްޔިތުންގެ މިހާރު ހުރި ކަންބޮޑުވުންތަކަށް ދާއިމީ ހައްލު ގެނެސްދިނުމަށްކަމަށް މަސީހު ވިދާޅުވިއެވެ. 

މަސީހު ވަނީ އެ ސިޓީއަށް ހެދިގެންދާ އިގްތިސާދީ ޕްލޭންތައް ތަންފީޒުކުރުމުގައި ސަރުކާރާއެކު މަސައްކަތްކުރެވޭނެ ކަމުގެ ކަށަވަރުކަން ރައްޔިތުންނަށް ދެއްވާފައެވެ.