މިނިސްޓްރީ އޮފް ޔޫތު އެމްޕަވާމަންޓް، އިންފޮމޭޝަން އެންޑް އާރޓްސްއިން ބާއްވާ "އޯޕަން ޑޭ2026 " ފަށަައިފި އެވެ.

ދެ ދުވަހުގެ މުއްދަތަށް ކުރިއަށް ގެންދާ މިއިވެންޓު މާލަޭގައި ގާއިމުކޮށްފައިފާ ޒުވާނުންގެ ވެހީގައި ކުރިއަށްދާނީ ހުކުރު އަދި ހޮނިހިރު ދުވަހުގެ ހަވީރު 4:00 އިން ރޭގަނޑު 11:00އަށެވެ.

ޒުވާނުންނަށް ހާއްސަކޮށްގެން ބާއްވާ މި އިވެންޓުގައި މިނިސްޓްރީގެ ދަށު އޮފީސްތަކާއި ޑިޕާޓްމަންޓްތަކުގެ މަސައްކަތްތައް ކުރިއަށްދާ ގޮތާއި ވަޒީފާގެ ފުރުސަތުތަކާއި އަދި ލިބޭ ހިދުމަތްތަކުގެ މައުލޫމާތު ފޯރުކޮށްދެވިގެންދާނެކަމަށް މިނިސްޓްރީން ބުނެއެވެ.

މި އިވެންޓުގައި މިނިސްޓްރީގެ ދަށުން ހިންގާ ނެޝަނަލް ލައިބްރަރީ، އެންސީބީ، ގައުމީ އަރުޝީފް، ނެޝަނަލް ސެންޓަރ ފޯ ދަ އާރޓްސް (އެންސީއޭ)ގެ ސްޓޯލްތައް ވަނީ ހުޅުވާފައެވެ. މީގެ އިތުރުން މިނިސްޓްރީގެ ޑިޕާޓްމަންޓްތައް ކަމަށްވާ އެންޖީއޯ ޑިޕާޓްމަންޓް، ޔޫތު ހެލްތު އެންޑް ވެލްބިއިން އަދި ޔޫތު އެމްޕަވާމެންޓް ޑިޕާޓްމަންޓްގެ ސްޓޯލްތައް ވެސް ވަނީ ހުޅުވާފައެވެ.

ނެޝަނަލް ލައިބްރަރީގެ ސްޓޯލްގައި ހުޅުވިފައިވާ ވަޒީފާތަކުގެ ފުރުސަތުތަކުގެ މައުލޫމާތާއި ލައިބްރަރީން ދޭ ހިދުމަތްތަކުގެ މައުލޫމާތުގެ އިތުރުން ތަފާތު ގޭމްސްތައް ކުޅުމަށް ހަމަޖެހިފައިވާކަމަށާއި އެންސީއޭގެ ސްޓޯލްއިން ލައިވް ކަރޯރޭ، ކުރެހުން، އާޓިސްޓިކް ޑައިރެކްޓްރީގައި ރަޖިސްޓްރީވުމުގެ ފުރުސަތު އަދި ލައިވްކޮށް މިއުޒިން އިންސްޓްރުމެންޓް ޕާފޯމްކުރުމުގެ ފުރުސަތު ލިބިގެންދާނެކަމަށް މިނިސްޓްރީން މައުލޫމާތުދެއެވެ.

މީގެ އިތުރުން ޔޫތު ޑިޕާޓްމަންޓް ސްޓޯލްއިން ޑިޕާޓްމެންޓްތަކުގައި ހުރި ވަޒީފާގެ ފުރުސަތުތަކުގެ މައުލުމާތު ލިބިގެންދާނެއެވެ. ޔޫތު ހެލްތު އެންޑް ވެލްބިއިންގެ ސްޓޯލްއިން ހެލްތު ސްރީނިންގެ ހިދުމަތް ވެސް ލިބިގެންދާނެއެވެ.

އޯޕަން ޑޭގައި ބައިވެރިވާ ފަރާތްތަކަށް އިނާމާއި އަދި އެހެނިހެން ސަޕްރައިޒްތައް ވެސް ލިބިގެންދާނެކަމަށް މިނިސްޓްރީން ވަނީ ބުނެފައެވެ. މި އިވެންޓުގައި ލައިވް ޕަފޯމަންސް ވެސް ކުރިއަށްދާނެއެވެ.