ރައްޔިތުން ކައުންސިލްތައް ހަވާލުކުރަނީ ސިޔާސީ ޕާޓީއެއްގެ އެކްޓިވިސްޓެއްގެ ދައުރު އަދާކުރަން ނޫންކަމަށް ވިދާޅުވެ، ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާ ބެހޭ ވުޒާރާގެ ސްޓޭޓް މިނިސްޓަރު މޫސާ ފަތުހީ އާދަމް، އިދިކޮޅު ކެންޑިޑޭޓުންނަށް ފާޑު ވިދާޅުވެއްޖެއެވެ. 

"އެމްއެމްޓީވީ"ގެ "ދިވެހީންގެ ރާއްޖެ" ޕްރޮގްރާމުގައި ވާހަކަ ދައްކަވަމުން ފަތުހީ ވިދާޅުވީ ކައުންސިލްތަކަކީ ރައްޔިތުންނާ ގާތުން ހިދުމަތް ދިނުމަށް އޮންނަ ސަރުކާރުގެ ފަށަލައެއްކަމަށާއި، ސަރުކާރަކުން ރައްޔިތުންނަށް ކޮށްދޭ ކަންކަމަށް ހުރަސް އެޅުމުގެ ފުރުސަތު ގާނޫނުން ވެސް ކައުންސިލްތަކަށް ލިބިދީފައި ނުވާނޭކަމަށެވެ. 

ކައުންސިލްތަކަށް ހޮވަންޖެހޭނީ އަހުލާގު ރަނގަޅު މީހުންކަން ފާހަގަކުރައްވަމުން މާލޭގެ މޭޔަރުކަމަށް ޕީއެންސީގެ ޓިކެޓުގައި ވާދަކުރައްވާ ރިޓަޔަޑް މޫސާ އަލީ ޖަލީލަކީ ގައުމަށް ވަފާތެރި، ރައްޔިތުންނަށް އިހުލާސްތެރި، ވަޠަން ދެކެ ލޯބިވާ ދަރިއެއްކަމަށް ފަތުހީ ވިދާޅުވިއެވެ. 

ފަތުހީ ވިދާޅުވީ ކައުންސިލަރުންނާ ހަވާލުކުރެވޭ މަސައްކަތަކީ ރައްޔިތުންނަށް ހިދުމަތް ކުރުން ކަމަށާއި، ސިޔާސީ ޕާޓީއެއްގެ އެކްޓިވިސްޓެއްގެ ދައުރު އަދާކުރުން ނޫންކަމަށެވެ. 

މާލޭގެ މޭޔަރުކަމުގެ ގޮޑި ލިބިއްޖެނަމަ ސަރުކާރު ނީސްތައްޓަށް އަރުވާލާނެކަމަށް އިދިކޮޅު ފަރާތްތަކުން ބުނަމުން އަންނަކަމަށާއި ސަރުކާރު ޖަވާބުދާރީ ކުރުވުމަކީ އެއްވެސް ކައުންސިލެއްގެ އިހުތިސާސްގެ ތެރޭގައި ހިމެނޭ ކަމެއް ނޫންކަމަށް ފަތުހީ ވިދާޅުވިއެވެ. އަދި ސަރުކާރު ކުރާ ކަންކަމަށް ހުރަސް އަޅަން ގާނޫނު ތަން ނުދޭކަމަށް ވިދާޅުވިއެވެ. ރައްޔިތުން ނޭދޭ ކަމެއް ކުރަން ސަރުކާރަކުން ކައުންސިލްތަކަށް ނާންގާނޭކަމަށް ވެސް ފަތުހީ ވިދާޅުވިއެވެ. 

ފަތުހީ ވަނީ މިހުރިހާ ކަމަކަށް ބަލާއިރު މާލޭގެ މޭޔަރުކަމަށް އެންމެ ކުފޫ ހަމަވާ، އެންމެ ގާބިލު ކެންޑިޑޭޓަކީ މޫސާ އަލީ ޖަލީލުކަން ފާހަގަކުރައްވައި، މިފަހަރުގެ އިންތިހާބުގައި މާލޭގެ މޭޔަރުކަމުގެ ގޮޑީގެ އިތުރުން، ކައުންސިލްތަކުގެ މެޖޯރިޓީ ޕީއެންސީއަށް ދިނުމަށް ގޮވާލައްވާފައެވެ.