އިދިކޮޅު ފަރާތްތަކުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އިސްތަށިފުޅުގައި ދޮގު އިލްޒާމުތައް އަޅުވަމުންދަނީ ރައްޔިތުންގެ އުންމީދުތައް މަރައިލުމުގެ މަގުސަދުގައި ކަމަަށް ރައްޔިތުންގެ މަޖިލީހުގެ މައްޗަންގޮޅީ އުތުރު ދާއިރާގެ މެންބަރު އިބްރާހީމް މުޙައްމަދު ވިދާޅުވެއްޖެއެވެ. 

ކުރިއަށް އޮތް ލޯކަލް ކައުންސިލު އިންތިހާބާ ގުޅިގެން އިދިކޮޅު އެމްޑީޕީން ކުރިއަށްގެންދާ ކެމްޕެއިނުގައި ރައީސަކީ ހުދުމުހުތާރު ބޭފުޅެއްކަމަށް ސިފަކޮށް ފަތުރަމުންދާ ވާހަކަތަކަށް ރައްދުދެއްވައި، އެމްއެމްޓީވީގެ "ދިވެހީންގެ ރާއްޖެ" ޕްރޮގުރާމުގައި ދެއްކެވި ވާހަކަފުޅުގައި މެންބަރު އިބްރާހީމް ފާހަގަކުރެއްވި ގޮތުގައި ރާއްޖޭގެ ވެރިކަމަށް އެމްޑީޕީ އައި ކޮންމެ ފަހަރަކުވެސް އެ ޕާޓީގެ ސަރުކާރުތަކުން ފެނުނީ ހުދުމުހުތާރު ކަމެވެ. 

އެގޮތުން އެމްޑީޕީގެ ފުރަތަމަ ވެރިކަމުގައި ރައީސް މުހައްމަދު ނަޝީދުގެ ޒައާމަތުގައި ކޯޓެއްގެ ފަނޑިޔާރަކު ރަހީނުކުރިކަން ފާހަގަކުރައްވަމުން މެންބަރު ވިދާޅުވީ އެއީ ހަގީގީ ހުދުމުހުތާރުކަން ކަމަށެވެ.

އަދި ރާއްޖޭގައި ކުރިން ކަންކަން ހިނގި ގޮތާއި މިހާރު ކަންކަން ހިނގަމުންދާ ގޮތުގެ ތަފާތު ވިދާޅުވެދެއްވަމުން މެންބަރުވަނީ ނިމުނު މަޖިލިސް އިންތިހާބު ކުރިއަށްދިޔައިރު އަދި ލޯކަލް ކައުންސިލު އިންތިހާބާ ކުރިމަތިލަމުންދާއިރު ރާއްޖޭގެ އެއްވެސް ސިޔާސީ ލީޑަރަކު ޖަލުގައި ނުވަތަ ބަންދުގައި އެބަހުންނެވިތޯ ސުވާލުކުރައްވާފައެވެ. 

"މުޒާހަރާތައް އެއޮތް ކުރެވެނީ ސީދާ ސަރުކާރުން ހިމާޔަތް ދީގެން. ރާއްޖޭގެ ފުލުހުން ރައީސް މުއިއްޒުގެ ސަރުކާރުން، ޕީއެންސީގެ ސަރުކާރުން މިއަދު ހަވާލުވެގެން ހިންގާ ފުލުހުންގެ އެޑްމިނިސްޓްރޭޝަނުން ނޫންތޯ ހިމާޔަތް އެދެނީ؟،" މެންބަރު ވިދާޅުވިއެވެ. 

ފާއިތުވި އެމްޑީޕީގެ ދައުރަށް އިޝާރާތްކުރައްވަމުން މެންބަރު ވިދާޅުވީ އެ ދައުރުގައި އެއިރުގެ ސަރުކާރުން އިދިކޮޅު ސިޔާސީ ބޭފުޅުންނާމެދު ނާޖައިޒު ގޮތުގައި ބާރުގެ ބޭނުންކުރިކަން ރައްޔިތުންނަށް އެނގޭ ކަމަށެވެ. އެ މަންޒަރު ސާފުކޮށް ރައްޔިތުންނަށް ފެނިފައިވާ ކަމަށެވެ. 

އެއާ ހިލާފަށް ރައީސް ޑރ.މުޢިއްޒުގެ އަތްޕުޅުގައި ހުރި ބާރުތައްވެސް އެމަނިކުފާނު ގެންދަވަނީ ދޫކޮށްލައްވަމުން ކަމަށް މެންބަރު ވިދާޅުވިއެވެ. އެގޮތުން ރާއްޖޭގެ ސަރަހައްދާ ގުޅޭ އެއްވެސް ނިންމުމެއް ނިންމާނަމަ ސީދާ ރައްޔިތުންގެ ވޯޓެއް ނަގައިގެން އަޣުލަބިއްޔަތުން ފާސްކޮށްގެން ނޫނީ އެ ނިންމުން ނުނިންމޭ ގޮތަށް ގާނޫނުއަސާސީއަށް ގެންނެވި އިސްލާހަކީ އެމަނިކުފާނުގެ އަތްޕުޅުގައި އޮތް ބާރެއް ރައްޔިތުންނަށް ދެއްވުންކަމަށް މެންބަރު ވިދާޅުވިއެވެ. 

އަދި ކައުންސިލުތަަކުގައި ހުރި ބިންތަކާއި އިހުތިސާސުގައި ހުރި ފަޅު ރަށްތައް ސަރުކާރަށް ނަގަމުންދިޔައީ އެމްޑީޕީ ވެރިކަމުގައިކަން ފާހަގަކުރައްވަމުން މެންބަރު ވިދާޅުވީ މިއަދު ފެންނަނީ ކައުންސިލުތަކަށް ބިންތައް ހަވާލުކޮށް، ފަޅުރަށްތައް ރަށްރަށުގެ އިހުތިސާސުގައި ހިމަނުއްވައިދެއްވާ މަންޒަރު ކަމަށެވެ. 

"ތިދައްކަވާ ވާހަކައާއި އެ ބޭފުޅުން ކުރައްވާ ތުހުމަތާ ދިމަލެއް ނުވޭ. ހަގީގީ ބޭނުމަކީ ރައީސްގެ އިސްތަށިފުޅުގައި ދޮގު ތުހުމަތު އެޅުވުން، ޕީއެންސީގެ ސަރުކާރު ބަދުނާމުކުރުން. ރައްޔިތުންގެ އުންމީދުގައި ކޮޅުފައިން ޖެހުން، އަޅުގަނޑު ދަންނަވާނީ އެއީ ވަރަށް ބޮޑު ގޯހެކޭ. މީހަކު މަރައިލުމަށްވުރެ މީހެއްގެ އުންމީދު ކަތިލުމަކީ މާ ނުބައި އަމަލެއް،" މެންބަރު ވިދާޅުވިއެވެ. 

ރައްޔިތުންގެ އުންމީދުތައް ގުޅިފައިވަނީ ރައީސްގެ ސިޔާސަތުތަކާ ކަން ފާހަގަކުރައްވަމުން މެންބަރު ވިދާޅުވީ އެމްޑީޕީން މަސައްކަތްކުރަނީ މާލޭ ރައްޔިތުން ގެދޮރުވެރިކުރުން ފަދަ މުހިއްމު ސިޔާސަތުތައް ތަންފީޒުވިޔަނުދީ ހުއްޓުވުމަށްޓަކައި ކައުންސިލުގެ ބާރު ހޯދުމަށް ކުރަމުންދާ ނޭނގާނީ މަސައްކަތެއް ކަމަށެވެ.