އިދިކޮޅު އެމްޑީޕީގެ ސަރުކާރު ނިމުނުއިރު ރައްޔިތުންނަށް ދީފައި އޮތް ކޮންމެ ގަނޑަކަށް ބިން ދައްކައި އެތަނުގައި އިމާރާތްކުރެވޭނެ ގޮތް ހަދައިދިނީ މި ސަރުކާރުން ކަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު އަހުމަދު ނަސީރު ވިދާޅުވެއްޖެއެވެ. 

"އެމްއެމްޓީވީ"ގެ "ބޮޑު ޚަބަރު" ޕްރޮގްރާމުގައި ވާހަކަފުޅު ދައްކަވަމުން މެމްބަރު ވަނީ ގައުމުގައިި ހުރި ބޮޑެތި މައްސަލަތަކަށް ހައްލު ހޯދުމުގެ މަސައްކަތް ސަރުކާރުން ފަށާއިރަށް އެމްޑީޕީން އެކަންކަން ހުއްޓުވުމަށް މަސައްކަތް ކުރަމުންދާކަމުގެ ކަންބޮޑުވުން ފާޅުކުރައްވާފައެވެ. މަޝްރޫއުތައް ހުއްޓުވަނީ ވެރިކަމަށް އައުމަށް ސަރުކާރަށް ކަމެއް ނުވާކަން ދެއްކުމަށްކަމަށް މެމްބަރު ވިދާޅުވިއެވެ.

ބޯހިޔާވަހިކަމުން މިސާލު ނަންގަވައި މެމްބަރު ވިދާޅުވީ އެމްޑީޕީ ސަރުކާރުގެ ފަހު ދައުރުގައި ގޯތިތައް ދީފައިހުރީ ކަނޑުފަޅުން ކަމަށާއި އެއިން އެންމެ ގޯއްޗެއްގައި ވެސް އިމާރާތްކޮށް ރައްޔިތަކަށް ފައިދާއެއް ވާނެ ގޮތެއް ނެތްކަމަށެވެ. 

މެމްބަރު ވިދާޅުވީ ސަރުކާރުން ބިން ހިއްކުމުގެ މަސައްކަތްތައް ހަލުއި މިނުގައި ކުރިއަށް ގެންދަންޖެހުނީ ބޯހިޔާވަހިކަމަށް އެމްޑީޕީގެ ފަސް އަހަރުގައި ވެފައިވާ އިހުމާލުގެ ސަބަބުން ކަމަށެވެ. 

އެމްޑީޕީގެ ސަރުކާރު ނިމުނުއިރު ރައްޔިތުންނަށް ދީފައި އޮތް ކޮންމެ ގަނޑަކަށް ބިން ދައްކައި އެތަނުގައި އިމާރާތްކުރެވޭނެ ގޮތް ހަދައިދިނީ މި ސަރުކާރުން ކަމަށް މެމްބަރު ވިދާޅުވިއިރު، އެމްޑީޕީގެ ނިމުނު ވެރިކަމުގައި ހުޅުމާލޭ ފަޅު ތެރެއިން ދޫކުރި ގޯތިތައް ދިނުމަށްޓަކައި ހިއްކަންޖެހޭ ހުޅުމާލޭ ތިންވަނަ ފިޔަވަހީގެ ބިން ހިއްކުމުގެ މަސައްކަތް އެއްކޮށް ވަނީ ނިންމާލާފައެެވެ.

އަދި އެ ގޯތިތައް ހަވާލުކުރުމުގެ މަސައްކަތް ހަލުވި ދުވެލީގައި ކުރިއަށް ދާކަމަށް ސަރުކާރުން ވަނީ ހާމަކޮށްފައެވެ. 

އައު ސަރުކާރު ވެރިކަމާ ހަވާލުވީއިރު މާލެ ސަރަހައްދުން 9،000 އަށް ވުރެ ގިނަ ގޯތި ދިނުމަށް އެމްޑީޕީގެ ނިމުނު ވެރިކަމުގައި އޮތީ ނިންމާފައެވެ. މި ގޯތިތަކުގެ ތެރެއިން ހުޅުމާލޭގެ ތިންވަނަ ފިޔަވަހިން އެކަނި ވެސް 698 ގޯތި ދޫކުރުމަށް އޮތީ ނިންމާފައެވެ. ނަމަވެސް އެމްޑީޕީގެ ވެރިކަން ނިމުނުއިރު ހުޅުމާލޭގެ ތިން ވަނަ ފިޔަވަހިން ހިއްކާފައި އޮތީ ވަރަށް ކުޑަ ސަރަހައްދެކެވެ.

ރައީސް މުއިއްޒުގެ ވެރިކަމުގެ ދެ އަހަރުގެ ތެރޭގައި ވަނީ ހުޅުމާލޭ ތިން ވަނަ ފިޔަވަހިން 63 ހެކްޓަރުގެ ބިން ހިއްކައި ނިންމާފައެވެ. މި މަސައްކަތް މިދިޔަ ދެ މަހުގެ ތެރޭގައި އިތުރަށް ވަނީ ހަލުއިކޮށްފައެވެ.

ހުޅުމާލޭ ތިންވަނަ ފިޔަވަހީގެ އިތުރަށް ގުޅިފަޅާއި ރަސްމާލޭގެ ބިން ހިއްކުމުގެ މަސައްކަތް ހަލުއިކޮށް އަންނަނީ ކުރަމުންނެވެ. އަދި ހުޅުމާލޭ ތިންވަނަ ފިޔަވަހި ހިއްކައި ނިމުމުން ގިރާވަރުފަޅުން ދޫކުރި ގޯތިތައް ރައްޔިތުންނަށް ފޯރުކޮށްދިނުމަށް އެ ފަޅު ހިއްކުމުގެ މަސައްކަތްވެސް މިއަދުވަނީ ފެށިފައެވެ.  

ރައީސުލްްޖުމްހޫރިއްޔާ ޑރ. މުޙައްމަދު މުޢިއްޒު ގެންދަވަނީ ކުރީ ސަރުކާރުން މާލޭ ރައްޔިތުންނަށް ދޫކުރި ގޯތި ދޫކޮށްފައިވާ ތަންތަނުން އެ ރައްޔިތުންނަށް ހޯދައިދެއްވުމުގެ މަސައްކަތްކުރެއްވުމާއެކު، މާލޭ ސަރަހައްދުގައި އޮތް ބޯހިޔާވަހިކަމުގެ ދަތިކަން ހައްލުކުރެއްވުމަށް ރަސްމާލެ ތަރައްގީކުރައްވައި، ފުރަތަމަ މަރުހަލާގައި 15،000 ގޯތި ދޫކުރެއްވުމަށް މަސައްކަތްކުރައްވަމުންނެވެ.