ފުވައްމުލަކު ސިޓީ ކައުންސިލުގެ 2023 ވަނަ އަހަރުގެ ކޮމްޕްލަޔަން އޮޑިޓާއި 2024 ވަނަ އަހަރުގެ މާލީ ބަޔާންތަކުގެ އޮޑިޓުން ކައުންސިލަށް ހޯދަންޖެހޭ 3.6 މިލިއަން ރުފިޔާ ހޯދާފައި ނެތްކަން އަދި ޕަބްލިކް އެކައުންޓަށް ޖަމާކުރަންޖެހޭ މިލިއަނަކަށްވުރެ ގިނަ ރުފިޔާ އެކައުންޓަށް ޖަމާކޮށްފައި ނެތްކަން ހާމަވެއްޖެއެވެ. 

އޮޑިޓާ ޖެނެރަލްގެ އޮފީހުން އާއްމުކުރި ފުވައްމުލަކު ކައުންސިލުގެ އޮޑިޓު ރިޕޯޓުގައި ފާހަގަކުރި ގޮތުގައި، ޑިސެންބަރު 31، 2024 ވަނަ ދުވަހުގެ ނިޔަލަށް ކައުންސިލަށް ލިބެންޖެހޭ 4،387،485 (ހަތަރު މިލިއަން ތިންލއްކަ އަށްޑިހަ ހަތްހާސް ހަތަރު ސަތޭކަ އަށްޑިހަ ފަސް) ރުފިޔާ ނުލިބި ހުއްޓެވެ. 

އެ ފައިސާގެ ތެރެއިން ނިމުނު 2025 ވަނަ އަހަރު ކައުންސިލަށް ލިބުނީ އެންމެ 747،714 ރުފޔާއެވެ. އެހެންކަމުން ޖުމްލަ 3،639،771 (ތިން މިލިއަން ހަލައްކަ ތިރީސްނުވަހާސް ހަތްސަތޭކަ ހަތްދިހަ އެއް) ރުފިޔާ ކައުންސިލަށް ޑިސެންބަރު 25، 2025 ވަނަ ދުވަހުގެ ނިޔަލަށް ލިބިފައިނުވާކަމަަށް އޮޑިޓާ ޖެނެރަލްގެ އޮފީހުން ބުނެފައިވެއެވެ. 

ކައުންސިލުން ބުނެފައިވަނީ އެ ފައިސާ ހޯދުމށްޓަކައި ފައިސާ ދޭންޖެހޭ ފަރާތްތަކަށް ސިޓީ ފޮނުވައި، ފައިސާ ދެއްކުމަށް ހަނދާންކޮށްދީ ފޯނުން މެސެޖުކޮށްފައިވާ ކަމަށެވެ. އަދި ދައްކަންޖެހޭ ފައިސާ 12 މަހަށް ބަހާލައިގެން ދެއްކުމަށް ތާވަލެއް އެކުލަވައިލައިގެން ފައިސާ ހޯދުމަށް މަސައްކަތްކުރަމުންދާކަމަށްވެސް ކައުންސިލުން އޮޑިޓު އޮފީހަށް މައުލޫމާތު ދީފައިވެއެވެ. 

ނަމަވެސް އޮޑިޓާ ޖެނެރަލް އޮފީހުން ފާހަގަކުރި ގޮތުގައި މާލިއްޔަތު ގަވާއިދުގައި ދައުލަތުގެ އިދާރާއަކަށް ލިބެންޖެހޭ ފައިސާ ހޯދުމަށް އަޅަންޖެހޭ ފިޔަވަޅުތައް ބަޔާންކޮށްފައިވާ ގޮތަށް ކައުންސިލުން މި ފައިސާ ހޯދުމަށް ފިޔަވަޅު އަޅާފައިނުވެއެވެ. 

އޭގެ އިތުރަށް އޮޑިޓު ރިޕޯޓުގައި ފާހަގަކުރި ގޮތުގައި ކައުންސިލަށް ލިބޭ ފައިސާގެ ތެރެއިން ދައުލަތުގެ އާމްދަނީގެ ގޮތުގައި ބަލައިގަންފައިވާ ފައިސާ، ދައުލަތުގެ މާލިއްޔަތު ގާނޫނުގައި ބަޔާންކުރާ ގޮތުގެ މަތިން ޕަބްލިކް އެކައުންޓަށް ޖަމާކުރަންޖެހުނު ނަމަވެސް ގިނަ އަދަދެއްގެ ފައިސާ ޕަބްލިކް އެކައުންޓަށް ޖަމާކޮށްފައިނުވެއެވެ. 

ކައުންސިލުން ޑިސެންބަރު 31، 2024 ވަނަ ދުވަހުގެ ނިޔަލަށް ދައުލަތުގެ އާމްދަނީގެ ގޮތުގައި ބަލައިގަނެފައިވާ 1،040،405 (އެއް މިލިއަން ސާޅީސްހާސް ހަތަރު ސަތޭކަ ފަސް) ރުފިޔާ ޕަބްލިކް އެކައުންޓަށް ޖަމާކޮށްފައިނުވެއެވެ. އެއީ އައިޑީ ކާޑު ފައިސާގެ ގޮތުގައި ބަލައިގަނެފައިވާ 827،305 ރުފިޔާއާއި ސަލާމަތީ ސެޓްފިކެޓުގެ ފައިސާގެ ގޮތުގައި ބަލައިގަނެފައިވާ 213،100 ރުފިޔާއެވެ. 

މި މައްސަލަތަކުގެ އިތުރަށް ފުވައްމުލަކު ސިޓީގައި ބައްތި ޖެހުމުގެ މަސައްކަތް ޖަނަވަރީ 8، 2024 ވަނަ ދުވަހު 105 ދުވަސް ތެރޭ މަސައްކަތް ނިންމާ ގޮތަށް 1،049،976 (އެއް މިލއިަން ސާޅީސް ނުވަހާސް ނުވަސަތޭކަ ހަތްދިހަ ހަ) ރުފިޔާއަށް ހަވާލުކުރި ކުންފުނިން އެ މަސައްކަތް ކަނޑައެޅި މުއްދަތަށް ނުނިންމައިގެން، އިތުރަށް ދިން 30 ދުވަހުގެ މުއްދަތުގައިވެސް އެ މަސައްކަތް ނުނިންމުމުން، އޮކްޓޯބަރު 7، 2024 ގައި އެއްބަސްވުން ބާތިލުކޮށްފައިވެއެވެ. އެހެންނަމަވެސް ކައުންސިލުގެ އިހުމާލުން ޕާފޯމަންސް ގެރެންޓީގެ ގޮތުގައި ހޯދަންޖެހޭ 83،998 ރުފިޔާ ނުލިބި އޮތްކަމަށް އޮޑިޓު ރިޕޯޓުގައި ބުނެފައިވެއެވެ.