ފާއިތުވި އަހަރު ވެލާނާ އިންޓަނޭޝަނަލް އެއާޕޯޓުގައި ހިންގި ވިޔަފާރި ހަރަކާތްތައް އިތުރުވެ، އެ އެއާޕޯޓު މެދުވެރިކޮށް ޓްރާންސްޝިޕްމެންޓުކުރި މުދަލުގެ ނިސްބަތް އަހަރުން އަހަރަށް 22 އިންސައްތަ މަތިވެފައިވާކަން ވީއައިއޭގެ ތަފާސްހިސާބުތަކުން ހާމަވެއްޖެއެވެ. 

ވެލާނާ އިންޓަނޭޝަނަލް އެއާޕޯޓުން ހާމަކުރި ތަފާސްހިސާބުތަކަށް ބަލާއިރު 2025 ވަަނަ އަހަރު އެއާޕޯޓުންވަނީ ޖުމްލަ 89،163 ޓަނުގެ މުދާ ހޭންޑްލްކޮށްފައެވެ. އޭގެ ތެރޭގައި ރާއްޖެއަށް އެތެރެކުރި މުދަލާއި، ރާއްޖެއިން ބޭރުކުރި މުދާ ހިމެނެއެވެ. 

އެގޮތުން ރާއްޖެއަށް އެތެރެކުރި 66،840 ޓަނުގެ މުދާ އެއާޕޯޓުން ހޭންޑްލްކޮށްފައިވެއެވެ. އަދި ރާއްޖެއިން ބޭރުކުރި 22،323 ޓަނުގެ މުދާ ހޭންޑްލްކުރިއެވެ. 

ރާއްޖެއިން ބޭރުކުރި މުދަލުގެ ތެރޭގައި ރާއްޖެއަށް ވައިގެ މަގުން ނުވަތަ ކަނޑުމަގުން ގެނައުމަށްފަހު އެހެން މަންޒިލަކަށް ރާައްޖެ މެދުވެރިކޮށް ބޭރުކުރި މުދާ ނުވަތަ ޓްރާންސްޝިޕްމެންޓު ހެދި މުދާ ހިމެނެއެވެ. ކަނޑު މަގުން ރާއްޖެއަށް ގެނެސް ވައިގެ މަގުން 3،192 ޓަނުގެ މުދާ ބޭރުކުރިއިރު، ވައިގެ މަގުން ގެނައި 13،180 ޓަނުގެ މުދާ ރާއްޖެއިން ބޭރުކުރިއެވެ. 

ރާއްޖެއަށް ހަތް ފްރެއިޓާ އެއާލައިނުން ދަތުރުކޮށްފައިވެއެވެ. އެ އެއާލައިންތަކުގެ ފްރައިޓާ ފުލައިޓުތަކުން 524 މޫވުމެންޓު ވީއައިއޭއިން ހަދާފައިވާއިރު، އެ މުއްދަތުގައި 4،300 ފްރައިޓާ ތުރޫޕުޓް ވީއައިއޭގައި ހަދާފައިވެއެވެ. މި މުއްދަތުގައި ރާއްޖެއަށް ދަތުރުކުރި ފްރައިޓާ އެއާލައިންތަކަކީ އެފްކޯމް، ފްލައި ވާޔު، ނޭޝަނަލް އެއާލައިންސް، އެއާ މާސްޓާ، އެމްއެންޖީ އެއާލައިންސް، އެމްޖެޓްސް އަދި ގަތަރު ކާގޯއެވެ.