މާލޭ ސަރަހައްދުން ލިބޭ ސިއްހީ ހިދުމަތް ފުޅާކޮށް ސަރުކާރު ހޮސްޕިޓަލުތަކަށް އޮންނަ ޕްރެޝަރު ކުޑަކުރުމަށް ސަރުކާރުން މާލޭ ސަރަހައްދުގައި ގާއިމުކުރަމުންދާ ޖީޕީ ކްލިނިކުތަކުގެ ތެރެއިން ހުޅުމާލޭގައި ހުޅުވާ ދެވަނަ ޖީޕީ ކްލިނިކު އެފްޑީސީ ފުލެޓުތަކަކުގެ ތެރެއިން އަމާން އުދަރެސް ޓަވަރެއްގައި ގާއިމުކޮށް އަންނަ މާޗު މަހުގައި ހިދުމަތް ދޭން ފަށާނެކަމަށް ހުޅުމާލޭ ހޮސްޕިޓަލުން ބުނެފިއެވެ. 

އެ ހޮސްޕިޓަލުގެ މީޑިޔާ އޮފިޝަލެއް ވިދާޅުވި ގޮތުގައި ހުޅުމާލޭ ދެވަނަ ފިޔަވަހީގައި އާބާދުވެ ދިރިއުޅޭ ރައްޔިތުންގެ އަދަދު އިތުރުވަމުންދާއިރު، އެ ސަރަހައްދުގައި ސިއްހީ ހިދުމަތް ހޯދުމަށް އޮތް ޑިމާންޑުވެސް ވަރަށް ބޮޑަށް އަންނަނީ އިތުރުވަމުންނެވެ. އެ ޑިމާންޑާ އެއްވަރަށް ހިދުމަތް ފުޅާކޮށް ހަރުދަނާކުރުމަށް ގިނަ މަސައްކަތްތަކެއް ކުރަމުންދާކަމަށް އޭނާ ވިދާޅުވިއެވެ. 

މާލޭ ސަރަހައްދުގައި ސިއްހީ ހިދުމަތް ފުޅާކޮށް، ފަސޭހައިން އަވަހަށް ހިދުމަތަށް ވާސިލުވެވޭނެ ގޮތްތައް ފަހިކުރުމުގެ ގޮތުން ސަރުކާރުން ކުރަމުންދާ މަސައްކަތްތަކުގެ ތެރެއިން ހުޅުމާލޭ ދެވަނަ ފިޔަވަހީގައި ގާއިމުކުރާ ޖީޕީ ކްލިނިކު އަމާން އުދަރެސްގެ ހަވަނަ ޓަވަރުގެ އެއްވަނަ ފަންގިފިލާގައި ގާއިމުކުރުމަށް ހހުޅުމާލޭ ހޮސްޕިޓަލުން އަންނަނީ ތައްޔާރުވަމުންނެވެ. 

މައުލޫމާތު ލިބޭ ގޮތުގައި ޖީޕީ ކްލިނިކު ގާއިމުކުރުމަށް ބޭނުންވާ ޖާގަ ރަސްމީކޮސް މާލޭ ސިޓީ ގްރޫޕު އޮފް ހޮސްޕިޓަލްސްއާ ފާއިތުވި ޑިސެންބަރު މަހުގައިވަނީ ހަވާލުކޮށްފައެވެ. އެ ގުރޫޕުގެ ދަށުން ހިންގާ ހުޅުމާލޭ ހޮސްޕިޓަލުން  ބުނެފައިވަނީ އަންނަ މާޗު މަހުގެ ތެރޭގައި ޖީޕީ ކްލިނިކު ހުޅުވައި އެތަނުން ހިދުމަތް ދިނުމަށް އަންނަނީ ތައްޔާރުވަމުންނެވެ. 

މިގޮތަށް ގާއިމުކުރެވޭ ޖީޕީ ކްލިނިކުތަކުން އާއްމު ބަލިތަކުގެ ޑޮކްޓަރުންނަށް ދެއްކުމާއި، ޓެސްޓު ހެދުމަށް ނަގަންޖެހޭ ސާމްޕަލްތައް ނެގުމާއި އެކްސްރޭ ހެދުން ފަދަ ހިދުމަތްތައް ލިބޭނެއެވެ. މާލޭ ސަރަހައްދުގެ ފުރަތަމަ ޖީޕީ ކްލިނިކު މާފަންނުގައި ހުޅުވާފައިވާއިރު، ހުޅުމާލޭގެ ހިޔާ ޓަވަރުގައިވެސް ޖީޕީ ކްލިނިކެއް ގާއިމުކޮށްފައިވެއެވެ. އަދި ހެންވޭރުގައި ޖީޕީ ކްލިނިކު ގާއިމުކުރުމުގެ މަސައްކަތްވެސް އަންނަަނީ ކުރަމުންނެވެ. 

މި ކްލިނިކުތަކުގެ ސަބަބުން މާލޭ ސަރަހަައްދުގެ މައި ހޮސްޕިޓާތަކުގެ ކިއު ކުޑަކުރެވިގެންދާނެއެވެ. އަދި އާއްމުންނަށް ފަސޭހައިން ބޭސްފަރުވާގެ އަސާސީ ހިދުމަތްތައް ލިބުމަށް މަގުފަހިވާނެއެވެ.