ރާއްޖޭގައި އެންމެ އާއްމު އެއް ބައްޔަކީ ކިޑްނީ ބަލި ކަމުގައިވާތީ އަތޮޅު ތެރެއިން ކިޑްނީ ބަލީގެ ފަރުވާގެ މުހިއްމު ބައެއް ކަމުގައިވާ ޑައިލަސިސްގެ ހިދުމަތް ފޯރުކޮށްދިނުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ފާއިތުވި ދެ އަހަރު ތެރޭ ދިހަ ރަށެއްގައި އެ ހިދުމަތް ގާއިމުކޮށް ނިމިފައިވާކަމަށް ސިއްހީ ވަޒީރު އަބްދުﷲ ނާޒިމް އިބްރާހީމް ވިދާޅުވެއްޖެއެވެ. 

ޑައިލަސިސް ހިދުމަތް ފުޅާކުރުމަށް ސަރުކާރުން ކުރަމުންދާ މަސައްކަތުގެ ތެރެއިން ދ.ކުޑަހުވަދޫގައި ހުންނަ އެ އަތޮޅު ހޮސްޕިޓަލުގައި ޑައިލަސިސް ހިދުމަތް ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުން ވަޒީރު ވިދާޅުވީ ކިޑްނީ ބަލި ރާއްޖޭގައި އާއްމުވުމުގެ ސަބަބުން ހަފުތާއަކު ދެތިން ފަހަރަށް ޑައިލަސިސް ހަދަންޖެހޭ މީހުންގެ އަދަދު ވަރަށް ބޮޑަށް އިތުރުވެފައިވާ ކަމަަށެވެ. 

ކިޑްނީ ބައްޔަށް ފަރުވާ ހޯދަންޖެހޭ މީހުން އިތުރުވަމުންދާތީ އެކަމަށް ރިއާޔަތްކުރައްވައި، އަސާސީ ހިދުމަތެއް ކަމުގައި ބައްލަވައިގެން ޑައިލަސިސްގެ ހިދުމަތް ރާއްޖޭގެ ހުރިހާ ކަންކޮޅުތަކަށް ފުޅާކުރެއްވުމަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަރަށް ބޮޑަށް އިސްކަންދެއްވާ ކަމެއްގެ ގޮތުގައި ނާޒިމު ފާހަގަކުރެއްވިއެވެ. 

ވަަޒީރު ފާހަގަކުރެއްވި ގޮތުގައި ޑައިލަސިސް ފަރުވާ ހޯދުމަށް ދަތުރުކުރަންޖެހުމުގައި އެކުލެވޭ ވޭނަކީ އެކަން ކުރަންޖެހޭ ބަލިމީހުންނާއި އެމީހުންގެ އާއިލާތަކަށް ނޫނީ ތަސައްވުރުނުކުރެވޭނެ ކަމެކެވެ. އަދި ޑައިލަސިސް ހިދުމަތް ފުޅާކުރެވި ފަރުވާ ހޯދުމަށް ކުރަންޖެހޭ ދަތުރުތައް ކުރުވުމަކީ ނުވަތަ ދަތުރުކުރަންނުޖެހުމަކީ ރައްޔިތުންނަށް ލިބޭނެ ބޮޑު ލުޔެއް ކަމުގައި ނާޒިމު ވިދާޅުވިއެވެ. 

ވަޒީރު ފާހަަގަކުރެއްވި ގޮތުގައި މި ހިދުމަތް ފުޅާކުރުމުގެ މަސައްކަތުގެ ތެރެއިން އެ ހިދުމަތް ދިނުމަށް ބޭނުންވާނެ ޖާގަތައް ގާއިމުކުރުމަށްޓަކައި އުމްރާނީ ވަސީލަތްތައް ފަހިކުރުމާއެކު، މެޝިނަރީސް ހޯދައި، އެ ފަރުވާ ދިނުމަށް ސިއްހީ ހިދުމަތްތެރިން ތަމްރީނުކުރުމުގެ މަސައްކަތްވަނީ ކުރެވިފައެވެ. އެގޮތުން ހިދުމަތް އަލަށް ތައާރަފުކުރެވުނު ގިނަ ރަށްރަށުގައި މި ހިދުމަތް ދިނުމަށް ތަމްރީނުވެފައި ތިބި މުވައްޒަފުން ނެތް ނަމަވެސް މިހާރު އެ ރަށްރަށުގައި ޑައިލަސިސްގެ ހިދުމަތް ދިނުމަށް ތަމްރީނުވެފައި ތިބި މުވައްޒަފުން ތިބޭނެއެވެ. 

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވި ފަހުން މިހާތަނަށް ސިއްހީ ހިދުމަތް ދޭ ދިހަ މަރުކަޒެއްގައި އަލަށް ޑައިލަސިސް ހިދުމަތް ފެށުނެވެ. އެއީ؛ 

- އާމިނާދިޔޯ ޞިއްޙީ މަރުކަޒު

- ގއ. އަތޮޅު ހޮސްޕިޓަލް

- ށ. އަތޮޅު ހޮސްޕިޓަލް

- ނ. ވެލިދޫ ޞިއްޙީ މަރުކަޒު

- މުލި ރީޖަނަލް ހޮސްޕިޓަލް

- ތ. އަތޮޅު ހޮސްޕިޓަލް

- އއ. އަތޮޅު ހޮސްޕިޓަލް

- އދ. އަތޮޅު ހޮސްޕިޓަލް

- ބ. ދަރަވަންދޫ ޞިއްޙީ މަރުކަޒު

- ދ. އަތޮޅު ހޮސްޕިޓަލް

މި ހިދުމަތް ފުޅާކުރުމަށް ކުރަމުންދާ މަސައްކަތުގެ ތެރެއިން ސަރުކާރުންވަނީ ރާއްޖޭގައި ޕެރިޓޯނިއަލް ޑަޔަލަސިސް ނުވަތަ ޑިވައިސެއްގެ އެހީގައި އަމިއްލައަށް ހެދޭ ޑައިލަސިސްގެ ހިދުމަތް ތައާރަފުކޮށްފައެވެ.